¹ Howon nya Apolo imiji Korinto ati allaŋ Paulo amisik huttohide ette fanyan Efisa. Onyurak inyi omuk leyiyanak dia. ² Attati inyi ifiyo isi, To ninya holoŋ iruhoti tai, ifwotuna nya itai Oloyiri ol Olibo? Ojori isi, Obeŋ. Hebeŋ hohoi etaniŋu jo owon Oloyiri ol Olibo. ³ Ojo Paulo, Anani batisimo inya ifwotuna tai? Ati ojori isi, Batisimo ono Yoane. ⁴ Ojo Paulo jihosi, Ibatisyo nya Yoane jo ijara aati iloiti atajya t’eyyata hosi bwo oŋida iruhoto jyo lya ol ottu’to adi ihalu honyi, inyi Yesu. ⁵ Itaniŋuni isi neram ana ette ifwotuna batisimo ta afure Hobu Yesu. ⁶ Ninya iyyabak Paulo ahas honyi jihosi ottu Oloyiri ol Olibo jihosi ette isi ikyana ekyanita gele gele bwo fe ikilai. ⁷ Arai nya aati ’tomon harrihai. ⁸ Attati Paulo jiŋana ihaji imojit ette ikyana te eŋere bwo fe ette itiwwahyo laati bwo ittiyenio isi neram ono nolobye Hollum ta ayafajin hunihoi. ⁹ Ati itagoli omuk atajya hosi bwo fe ihari ekyana. Attati isi ikyana on orroho ihomomite wati te ekoi ono Hobu. Ette Paulo busana isi ette leten iko lomuk leyiyanak ittiyeniere jyo obo aji eneittok ono Tirana. ¹⁰ Attati Paulo itiwwahyo aati dia oŋitek daŋ ta aŋasi arrihai bwo aati daŋ hul amanyai’to ifau Asia itaniŋuni ekyana ono Hobu, isi Yudea iko Grik. ¹¹ Ihanio Hollum edwariti hun obolori ta ahas huno Paulo. ¹² Tania al iyarai aati amaniri kuyya aboŋojin hutto hwan Paulo jyo aŋwak ette adi isi ŋidari nyo ofuhoi ajohin hun orrohoji’to jihosi addi. ¹³ Tania owoni omuk amurok hulo Yudea bwo itterye isi illilleco afure Hobu Yesu jyo ajohin hun orrohoji’to ojori, Efuhu ni iye ta afure Hobu Yesu jyo ajohin hun orrohoji’to ojori, Efuha ni iye ta afure Yesu al ittittohitta Paulo. ¹⁴ Owon nya bwo fe obo ehumani olo Yudea afure honyi Seva iko lonyirok honyi hattarik hul ihanie ihwo nya. ¹⁵ Ati ajohin hun orrohoji’to itarraŋi jihosi jojo, Emijak hohoi Yesu bwo fe emijak hohoi Paulo, ati, haŋai itai? ¹⁶ Attati lya ol owon iko ajohin hun orrohoji’to ’luhina jihosi ette itarramayo isi ette inyi iyyalara isi daŋ. Ofuhoi isi addi to haji ette busuno aboŋojin hosi nyo adyahai ahwattek hosi. ¹⁷ Ninya amijani aati hulo Efisa daŋ neram ana ette isi baŋi bebe bwo fe ette itahabuyo afure Hobu Yesu, isi Yudea iko Grik. ¹⁸ Ofwonni nya omuk eruhok iwwahari eyyata hosi iko erre hun orrohoji’to hunya ihanie isi. ¹⁹ Iyaŋunie amurok abuhi hosi amurotya ette isi swahina isi ihosyere wati. Ninya liheni isi abuhi hun oswahini arai enyyaŋita hosi daŋ arobia esiha atomwana miet. ²⁰ Tania itisarrahini ekyana ono Hobu ette galihina erre daŋ. ²¹ Ihalu erre huna igigilo Paulo to Oloyiri jo allaŋ inyi Masedonia iko Akaya ati inyi acaharo adi Yerusalem. Bwo ihalu ana oŋida inyi egonyu Roma. ²² Ette inyi ifahina egyamak honyi, Timoteo iko Erasto ifau Masedonia ati hetoŋo inyi ifau Asia kai. ²³ Ihwania ikikyanai laati bebe te ekoi ono Hobu. ²⁴ Nyo owon obo atulo afure honyi Dimitro, inyi egyamani bilat al ihuhumyo arrijorihyen huno ajok Artema. Obolo egyama honyi bebe bwo fe jyo legyamak honyi. ²⁵ Tania iloŋu nya inyi omuk egyamak ehuhumak bilat ette jaran jihosi, Hulo, imijana tai epocou hohoi agurusi arryai te egyama ana. ²⁶ Imijana tai bwo fe itaniŋutati jo obo atulo afure honyi Paulo itiruk aati arryai ette isi iloit atajya hosi, dini imiji Efisa iko ifau Asia daŋ. Ojo inyi jojo obeŋi arrijorihyen hun ihuhumi ta ahas arai ajohin ahode. ²⁷ Tania ebaŋ hohoi jo ofwonni adi laati myana egyama hohoi. Ati obyaŋara hohoi hama, ati omyanai adi bwo fe aji ono ajok hohoi on obolo, inyi Artema, bwo otturo adi akwatan honyi. Inyi ajok an itahabuye aati hutta fau Asia iko laati hutta fau daŋ. ²⁸ Ninya itaniŋuni isi nekyana ana ette isi iloŋojita bebe ette jaran, Odwa bebe Artema ono aati Efisa. ²⁹ Tania iwuwoŋitai aati hutto miji daŋ ette ŋyoron kwak ipihuniere Gaio iko Aristarko imargas. Arai isi hulo Masedonia hul adahai iko Paulo. ³⁰ Awak Paulo jiŋana ihiji wati ati obeŋi leyiyanak aharani inyi. ³¹ Owoni nya omuk laati, arai nya amottyarak Paulo hul igyamai jyo okuma. Ifahini nya isi ekyana jihonyi jojo, Hejiŋa imargas. ³² Bwo iwuwoŋitai laati arryai bebe. Ikikyanai isi gele gele nyo olwaji hulosi hul obeŋi omijani ta nanyo ottubai isi dia. ³³ Iloŋoi omuk Alisandro linya iyaŋunie Yudea ette inyi kaf aani honyi ikyanari jihosi. ³⁴ Ati igonyuni isi jo ara inyi olo Yudea iwuwoŋitai isi arabotye ta asahyen arrihai jojo, Odwa Artema ono aati Efisa. ³⁵ Ati obo olo egyamak okuma itadwa eluluŋ wati ette jaran, Itai aati hulo Efisa, omijani aati daŋ jo ara amiji Efisa amaji ono aji ono Artema bwo fe ono amorwo on odwa on odou nya t’edou. ³⁶ Emijak hohoi jo arai erre huna ahode bwo obeŋ obo oremik risa, tania oŋida itoŋoti ol okwai bwo hehaniete obo ariŋ on orroho. ³⁷ Iyaŋuniete tai aati hulo dini bwo isi obeŋi arai awati amyanak kuyya bu amorok jok hohoi. ³⁸ Tania kuyya awahi Dimitro iko legyamak honyi ’rosyo obo atulo, owoni okikohyen iko hobwok. Ijara isi hetekyanahi errositi dia ta ahwattek hosi. ³⁹ Ati kuyya ittifyati tai omuk erre, oŋida oŋoti al ottubanie monyomiji. ⁴⁰ Nyo ŋadi gala hohoi ahana oŋoti te edyefer asai nyo obeŋ obo elyat jihohoi. Ikyana inyi huna ette ifahina isi addi.