¹ Ojo lihalu, ninya labusak Paulo Atena, ette inyi leten imiji Korinto. ² Orumak inyi dia lobo olo Yudea, afure honyi Akwila olo Ponto ol ottu’to to fau Italya, iko ŋorwoi honyi Prisila nyo ojo nya Klaudio jihosi oŋida Yudea daŋ obusani Roma. Attati Paulo leten ifonyere isi, ³ ette itoŋo ikosi bwo fe ette igyama ikosi nyo orrijo nya egyama hosi. Arai nya isi daŋ ahehuhumak musyamahyen. ⁴ Ati iwwaha nya inyi iko laati lihaji imojit esabiti daŋ bwo ittittoyo nya inyi Yudea iko Grik ette isi iruk. ⁵ Ninya lafanyi Sila iko Timoteo to fau Masedonia onyurani isi Paulo igyama bebe te ettittoyo itamijaniere Yudea jo ara Yesu olonyimoto olo Hollum. ⁶ Ninya lihari isi inyi bwo fe ette moryo inyi illillik inyi aboŋojin honyi ette jaran, Kuyya ottu aŋoco ono Hollum jihatai ara eram hatai, obyaŋara onoŋ. Ihwania alo ni jyo paganohyen. ⁷ Obusak inyi amaji ania ette leten lihaji ono obo atulo afure honyi Tito Justo al iruk’to nya jyo Hollum. Owon nya aji honyi iger haji imojit. ⁸ Bwo iruk nya Krispo, eleittok olo aji imojit jyo Hobu iko aati hutta haŋ hosi daŋ. Bwo fe al itaniŋye aati hutto Korinto arryai, iruhi isi bwo ifwotuni batisimo. ⁹ Ati ninya liharwe ikyana Hobu jyo Paulo ta arigya ojo, Hebaŋ, bwo fe hedwa, ikyanai, ¹⁰ nyo errirriyo ni iye bwo obeŋ adi iye tulo ebak nyo aati hoŋ huttono amiji ana olwaji bebe. ¹¹ Tania itoŋo inyi dia eŋa abotye iko omuk ayafajin ille ittiyeniere ekyana ono Hollum jihosi. ¹² Ati ara nya Galio eleittok olo Akaya tania iŋereji Yudea jyo Paulo ette iyaŋuno inyi lilokikoi ette jaran, ¹³ Isusuyo atulo alya aati itahabuyere ajok obo ol obeŋ’to oleyo te efahita. ¹⁴ Ati ninya lajo Paulo alyau hunonyi ojo Galio jyo aati Yudea, Al ara ana eram ono ehanio honyi on orroho’to kuyya to obo eyyau, etaniŋyo adi ni jihatai aati Yudea. ¹⁵ Ati al ara ihwania te eram ono ekyanita bwo fe afureta, ojo efahita hatai, oŋocete eram ania ta ahwattek hatai. Abeŋ ni aŋototyo erre hun arai’to ihwo hunia. ¹⁶ Ette inyi ifuhara isi addi to lokiko. ¹⁷ Teyya inefuni isi Sostono eleittok olo aji imojit ette bahyo inyi ihosyere lokiko, ati obeŋ Galio igigilo te erre hunia. ¹⁸ Ihalu ana itoŋo Paulo fur oŋitek arryai. Attati teyya, imalayo nya inyi eruhok, ette leten ifau Sirya ta ababur iko Prisila bwo Akwila. Ati ninya howon Paulo imiji Cencere oŋer inyi nofir honyi te eram ono ellama. ¹⁹ Ninya lafanyi isi Efisa obusak Paulo isi dia, ette leten ihaji imojit iwwahari iko Yudea. ²⁰ Ninya lifiye isi inyi itoŋori ikosi do, ette inyi ihara, ati ninya lalo inyi ojo inyi jihosi, ²¹ Acohuno adi ni al aŋatak Hollum ani. Ette inyi busana Efisa ette leten ta ababur. ²² Ninya lafany inyi Cesarea olo inyi ahosyere lifonyere eklesya bwo ihalu ette leten Antioka. ²³ Itoŋo inyi dia to omuk oŋitek kai ette dyoto teyya ette leten limasik omuk daŋ huno Galatia iko Frigia itagolyere atajya heyiyanak. ²⁴ Ihwania, owon nya obo olo Yudea afure honyi Apolo, bwo ara inyi olo Alesandria. Ottu inyi Efisa. Inyi nya atulo ol omijak ekyana bebe bwo fe omijak inyi ekyanita huno Hollum hutto buk honyi bebe. ²⁵ Nyo iyiyana nya inyi eram ono Hollum bebe bwo fe ifiriwa inyi te ekyana hiram Hollum. Ittiyenio inyi eram ono Yesu on oyyu, ati omijak inyi batisimo ono Yoane hama. ²⁶ Itteryo nya inyi ettiyenio ihaji imojit te eŋere. Ati ninya itaniŋuni Prisila iko Akwila inyi, iyarai isi inyi ette ittiyenio inyi ekoi ono Hollum on obis. ²⁷ Ihalu al awak inyi leten Akaya itagoli nya eruhok ataji honyi ette igyoronia jyo leyiyanak hulo amaji nya ifwotuniere inyi. Ninya lafany inyi dia, olwak inyi eruhok bebe. ²⁸ Nyo itadwahi inyi Yudea te ewwaha ihosyere wati itahutaniere isi jo ara Yesu olonyimoto olo Hollum.