¹ Ninya latuhuno edyefer itasar Paulo leyiyanak ette ittittoyo isi nyo ojo inyi alo ifau Masedonia. ² Adahatyo inyi iŋaco daŋ itagolyere atajya hosi ette inyi fanyan many jyo Grik. ³ Itoŋo inyi dia ayafajin hunihoi. Ilyaha aleten honyi ifau Sirya ati itaniŋu inyi jo awahi Yudea ’tohoro inyi ette inyi caharo ifau Masedonia. ⁴ Adahai nya Paulo iko laati hulo; Sopato lonyi Piro olo Berea, Aristako iko Sikundo hulo Tesalonika, Gaio olo Darba, Timoteo, bwo Tikiko iko Trofimo hulo Asia. ⁵ Ofwoi hulo ahosyere ette itilauna hohoi to miji Trosa. ⁶ Ihalu hiyom ono emune on obeŋi bula efwo nya hohoi to Filipi ta ababur. Ati ihalu oŋitek miet efany hohoi jihosi imiji Trosa ette hohoi itoŋo dia oŋitek hattarik. ⁷ To oloŋ etteri ono esabit al ettubanio hohoi iŋiyere emune, ikyana Paulo jyo laati nyo ojo inyi edehi amaji ania nya motye. Ikyana inyi fur many arari aharwe. ⁸ Etoŋo nya hohoi itugul on owon ihide haji bwo owoni allomohyen dia arryai. ⁹ Owon nya obo leito horwoŋ, afure honyi Eutiko, el itoŋo ittulit haji. Ette inyi ibunyita dia nyo ikyana nya Paulo fur. Ojo gaa ette inyi kwahuno t’ettulit haji many lifau. Attati laati hya kafuna inyi bwo isi igigiloi jo aye inyi. ¹⁰ Ati isur Paulo ette irrafa jihonyi bwo fe ette toŋ inyi ta ahas honyi ette jaran, Hebaŋata isu inyi. ¹¹ Acaharu inyi ihide ette ŋiyo emune bwo ikyana jyo aati fur many arari amotye hanyik, ette inyi leten. ¹² Ette isi iyaro eito odwo alya addi al isu bwo fe ilihi atajya hosi bebe. ¹³ Teyya ecaharo hohoi ibabur ette fwatan imiji Aso nyo egigilo hohoi irwaŋaniere iko Paulo dia ihwa ikyana dwo inyi jo adaha inyi te ejek. ¹⁴ Ninya afany inyi Aso eyaro hohoi inyi ta ababur many Mitaline. ¹⁵ Bwo teyya efany hohoi ta amotye iger Cio, bwo nya motye imiji Samo, bwo fe nya motye obo amiji ono Milito. ¹⁶ Nyo awak nya Paulo galaro Efisa jo oŋida abeŋ inyi etoŋo ifau Asia fur, nyo awak nya inyi fanyan Yerusalem to oloŋ ono Pentikoste. ¹⁷ To miji Milito itasara nya inyi jyo laati Efisa iloŋuniere eleittaha hulo eklesya ifwonniere jihonyi. ¹⁸ Al afwonni isi ojo inyi jihosi, Imijana tai jo oŋitek daŋ hunya etoŋori ni ihiji hatai, to noloŋ etteri inya attuniere ni ifau hatai Asia, ¹⁹ egyama ni jyo Hobu ta abijon hwan bwo fe ta neyyo iko ettigemita hunya ofwonni’to jihoŋ te ewahiti huno Yudea. ²⁰ Bwo fe abeŋ nya ni etik erre daŋ hun oyiji jihatai al ettiyenio ni ihiji wati bwo fe ihasik hatai. ²¹ Etamijanak nya ni jyo Yudea iko paganohyen jo oŋida isi iloiti atajya hosi t’eyyata hosi bwo fe heteyihiniehe jyo Hobu Yesu Kristo. ²² Ihwania imijyete, halo ni Yerusalem iniŋyere Oloyiri ol Olibo bwo abeŋ ni amijak anyo adi idwoŋ jihoŋ dia. ²³ Ati ninya heddiddaha ni imisihi itahutak Oloyiri ol Olibo ani jo owon adi efita iko ettigemita jihoŋ. ²⁴ Ati abeŋ ni egigilo jo ara nesu hoŋ ihwa ariŋ on ogol te enyyaŋa jo oŋida ani errirrya inyi bebe, ati awak ni ituk adaha hoŋ iko egyama an efwotu nya ni jyo Hobu Yesu, ittiyeniere asayyo huno amehino ono Hollum. ²⁵ Ihwania imijyete, amijak ni jo itai daŋ hunya ettiyenio ni eram ono nolobye Hollum, ibyaŋata adi itai igonyuna omom hoŋ inyyak. ²⁶ Tania eramak ni jihatai ahana etamijani hoŋ jo kuyya ottu aŋoco ono Hollum jihatai ara eram hatai, obyaŋara onoŋ. ²⁷ Nyo abeŋ nya ni apwak ettiyenio jihatai ekyanita huno Hollum daŋ. ²⁸ Ihwania ihumata irrirrya ahwattek hatai bwo fe aati daŋ hul isyo Oloyiri ol Olibo jihatai. Bwo fe ittiyeniete isi nyo arai isi eklesya ono Hobu an inyyaŋu nya inyi ta nooto honyi. ²⁹ Amijak ni jo ihalu leten hoŋ ofwonni adi elewwom hun orrohoji ihiji hatai ittatturyere aati. ³⁰ Bwo fe tehiji hatai ikyanai adi omuk aati erre hun ipali’to irihotyere leyiyanak ihalu hosi. ³¹ Tania ihumata mijo bwo fe ogiluna jo, ta aŋasi hunihoi adulo nya ni oŋitek daŋ iko arwejin hosi esiŋyo itai ta neyyo. ³² Ihwania abusak ni itai jyo Hollum iko amehino honyi on oremik itaboloruna itai bwo fe isyo jihatai nemuniti ihiji wati hul olibori’to. ³³ Abeŋ nya ni attifya agurusi kuyya ayyel kuyya aboŋojin. ³⁴ Imijana tai ta ahwattek hatai jo, ta nahas huna egyama nya ni te erre hun awak ni iko laati hul edaha’to ikoŋ. ³⁵ Te erre hunia daŋ etahutak ni itai jo, te egyama oŋida hohoi elwak laati hul ilihi’to bwo fe oŋida hohoi egilu ekyanita huno Hobu Yesu jo, Oyyu esyarana hirre agalik efwotuna isi. ³⁶ Ninya ikyana inyi ihwania origoŋ inyi ette mojo ikosi. ³⁷ Ette isi daŋ iyyo bwo otoŋi Paulo ta ahas hosi ette jur omon honyi. ³⁸ Nyo ijiriŋai isi bebe agalik te ekyana honyi jo obeŋi adi isi inyyak igonyuna omom honyi to obo oloŋ. Ette isi iniamaro inyi ibabur.