¹ Ati omijak ana, te esidi fau ofwonni adi oŋitek huno ettigemita hun obolori. ² Nyo arai adi laati ahamunok hwattek hosi, lamunok gurusi, etadarak, ahetahwok hwattek, lamorok, amyosok hesyok, abyaŋak isyoryo ahumo, eharak libori, ³ eharak illarak hosi, eharak itattana, etisyahak, eharak ’rirrya hwattek hosi, abyaŋak mehino, iko eharak yiji. ⁴ Bwo fe arai isi ahenyabak, afiriwajak, ahetahwok hwattek, bwo omunoi isi ebaliti hosi agalik amuno Hollum. ⁵ Ojori isi era isi aduri Hollum ati ihari isi adwaran honyi. Oyitotyai orwoŋ hoi addi jihosi. ⁶ Ihiji hosi owoni omuk hul ojiŋatai kai kai ihasik inyobyere aŋorwo hun osilari’to, hun ifuti’to iko eyyata bwo hun ijifatye ewahiti huno ahwattek hosi. ⁷ Odulori aŋorwo hunia itaniŋyo ati obeŋi isi onyurani amijana ono nelahode. ⁸ Ihwa ninya ihari Yane iko Yambere ekyanita Mose, ihari bwo fe aati hulya nelahode. Orrohoji egigilita hosi bwo obeŋi isi arai aduri Hollum. ⁹ Ati ittallihi adi isi ihanio arrohojita arryai nyo oleyo adi asilara hosi jyo laati daŋ, ihwa ebwanak hulya hinya ihari’to Mose. ¹⁰ Ati imijak nya iye ahode ettiyenita hoŋ, iko ehanita hoŋ, awahan hoŋ, neruk hoŋ, anyalami hoŋ, namuno hoŋ, iko adihan hoŋ. ¹¹ Imijak iye bwo fe ettigemita hoŋ, ejiriŋita hoŋ, iko erre hun idwoŋi’to jihoŋ imisihi Antioka bwo Ikonia iko Listara. Imijak iye ettigemita hun obolori hun adihu ni ati italahu Hobu ani t’ehiji hosi daŋ. ¹² Ahode, laati daŋ hul awahi manya on obis jyo Yesu Kristo onyurani adi ettigemita. ¹³ Ati odulori adi arrohojak iko enyabak ihanio on orroho agalik. Inyobye isi laati, bwo inyobye isi ahwattek hosi. ¹⁴ Ati oŋida iye igolik jyo erre hunya ittiyenu iye iko hunya imijak iye, nyo imijak iye lya al ittiyenio’to iye. ¹⁵ Many hera iye ahito imijak iye egyerita huno Hollum hun isyori’to jihoi ofyoro inyuraniere etalahuna ta neruk jyo Yesu Kristo. ¹⁶ Ofwonni egyerita daŋ jyo Hollum bwo oyiji isi ittiyeniere, isiŋyere, itabisyere bwo ittittoyere laati ekoi ono abisan, ¹⁷ jo oŋida atulo olo Hollum owon iko egoliti daŋ hun oremehiniere inyi igyamari on oyyu.