¹ Tania lonyi hoŋ, itagolo ataji hoi ta amehino an isyo Yesu Kristo jihoi. ² Bwo fe nerre hun itaniŋu iye jihoŋ tohosyere hetamijanak arryai, iramak jyo laati hul obiji hwattek, hul oremehini’to ittiyenio omuk bwo fe. ³ Odihu ettigemita ihwa oseŋeritanani ol oyyu’to olo Yesu Kristo. ⁴ Obeŋ obo oseŋeritanani igigilo te erre hutto miji al orrem inyi arrem, nyo awak inyi itamuno komodal honyi. ⁵ Bwo fe kuyya awak obo atulo iracari, obeŋ inyi onyurak esyoryo arari al irwat inyi on obis. ⁶ Aromoni ol oromo’to, oŋida inyi oŋiyo aŋer mana honyi ahosyere. ⁷ Igigiloi erre hun ekyana ni, nyo isyo adi Hobu jihoi amijana hirre daŋ. ⁸ Ogotyere Yesu Kristo inya ibuhu’to to ye, bwo inya odetuno’to to woyo ba Davide ihwa ettiyeniere ni ta asayyo hun oyiji’to. ⁹ Ta asayyo huna, anyurak ni ettigemita iko aririk ihwa olorroho. Ati obeŋ obo ariŋ oremik ifit ekyanita Hollum. ¹⁰ Tania adihu ni erre daŋ te eram ono onyimot hulo Hollum jo oŋida isi bwo fe onyurani etalahuna on owon’to jyo Yesu Kristo iko akwatan on osyo fur. ¹¹ Arai nekyanita huna ahode jo, “Al eye hohoi ikonyi, esu adi hohoi bwo fe ikonyi; ¹² Al edihu hohoi ettigemita, elohobu adi bwo fe hohoi ikonyi; Al eha hohoi inyi, iha adi bwo fe inyi hohoi. ¹³ Dwadi eloit hohoi atajya hohoi arasa inyi igigilo jihohoi, Nyo obeŋ inyi oremik ihara ahwan honyi.” ¹⁴ Itagilye laati te erre huna. Iramak isi ihosyere Hobu jo oŋida isi obeŋi aŋalafai ta nekyanita hun obeŋi’to olwahye isi, hun itarrohojye’to etaniŋok. ¹⁵ Ihuma gyama itamunoyere Hollum ihwa egyamani ol obeŋ’to iloriri, al ittiyenio on oyyu nekyana ono nelahode. ¹⁶ Ati ihai nekyanita hun arai’to asai nyo iyarai isi laati jyo abyaŋan iruk iko ehanita hun orrohoji. ¹⁷ Obobolororoi adi nekyanita hunia ihwa aŋodyo toŋosa. Ara ihwania jyo Humenayo iko Fileto. ¹⁸ Ipali isi addi jyo nelahode nyo ojori isi obeŋ obo nebuhuna. Itipalarai isi laati omuk addi to hiruk. ¹⁹ Ati owotya nelahode ono Hollum on ogol ihwa etteri lohitir nyo igyoroni dia jo, “Omijak Hobu hul arai ahulonyi,” bwo fe, “Ijara laati daŋ hul iruhi’to ta afure Hobu ihari erre hun obeŋi’to olibori.” ²⁰ Itwa haji on obolo’to owoni asahani huno nayyel iko omuk abilat hun opipyahi’to. Owoni bwo fe atogoli iko atobwaha. Arai omuk te egyamita hun oyiji’to bwo omuk te egyamita hun ofyahaji’to. ²¹ Tania kuyya obwanya atulo ahwan honyi addi te erre huna hun ofyahaji’to, ara adi inyi ihwa asahan on ottunani hama. Nyo ara inyi asahan an ilaman’to, an igyamari eleittok, an ihuhumani te egyamita daŋ hun oyiji. ²² Ofuhoi addi t’ewahiti hun orrohoji’to hun ihanie aduri horwoŋ, bwo ijifatye alibori, neruk, namuno, iko nelik taji arabotye iko laati hul omojoi’to jyo Hobu ta atajya hun olibori’to. ²³ Ihai nefita hun arai’to asai iko hun obeŋi’to ilofyoroji, nyo iyaŋunie isi aŋalafa. ²⁴ Oŋida apit Hollum obeŋ aŋalafa ati ijara inyi hetoŋoi ta anyalami jyo laati daŋ. Oŋida inyi ittyiyenio on oyyu, bwo odihu ettigemita daŋ. ²⁵ Oŋida inyi isiŋyo ta anyalami laati hul ihari’to inyi, nyo kuyya isyo adi Hollum jihosi iloicere atajya hosi imijaniere nelahode. ²⁶ Bwo fe ofuhoi adi isi addi jyo nofidik ono etisyahani ninya inefatyo’to isi ihaniere awahan honyi.