¹ Ani Paulo efahata olo Yesu Kristo ta awahan ono Hollum bwo te ecorit ono nesu on owon’to jyo Yesu Kristo, ² egyoro ni jyo Timoteo lonyi hoŋ al amuno ni. Ijara amehino bwo namuno iko nelik taji on ottu’to jyo Hollum Monye iko Yesu Kristo Hobu hohoi hatawana jihoi. ³ Esyo ni ahumo jyo Hollum al adulo ni giluta iye ta attari iko ta afanni ta amojo hoŋ. Egyama ni jihonyi ta ataji on olibo ihwa igyamarik nya hohonyok hohoi. ⁴ Al agilu ni eyyo hoi, awak ni igonyuna iye bebe jo oŋida amuno hoŋ ifut. ⁵ Agilu ni neruk hoi on obeŋ’to owon iko enyobyo, ninya owon’to ahosyere jyo ahanyi hoi Losi iko jyo honyohoi Yunia, bwo amijak ni ahode owon inyi bwo fe jihoi. ⁶ Te eram ana etagilu ni iye jo, oŋida iye itawulo esyoryo Hollum on owon itaji hoi on ottu’to ta eyyabana has hoŋ jihoi. ⁷ Nyo obeŋ Hollum isyo jihohoi atajya hun abaŋi, ati isyo inyi jihohoi adwaran iko namuno bwo errirriyo hwattek. ⁸ Heloriri ikyanari eram Hobu hohoi, ara dwo bu toni al ara’to ababus tenyi. Ati odihu ettigemita te eram ono asayyo hun oyiji ta adwaran ono Hollum. ⁹ Inyi alya al italahu’to hohoi bwo iloŋo hohoi te eloŋo on olibo, obyaŋara te egyamita hohoi, ati ara ta awahan honyi iko amehino honyi an isyo inyi jihohoi to Yesu Kristo hobeŋ etteri fau. ¹⁰ Itahutak inyi amehino honyi jihohoi ta attuna ono Etalahani hohoi Yesu Kristo, linya itattur’to naye, bwo fe itahutak inyi ekoi ono nesu on osyo fur ta asayyo hun oyiji. ¹¹ Onyimu inyi ani ahettittoni iko alefahata bwo fe ahettiyanani sayyo hun oyiji. ¹² Te eram ana adihu ni edyahiti huna, ati abeŋ ni eloriri nyo amijak ni lya inya eruk ni bwo fe amijak ni ahode oremik inyi irrirriyo erre hun attunak ni jihonyi many jo oloŋ ania. ¹³ Ijifatye ettiyenita hun oyiji hunya itaniŋu iye jihoŋ, ta neruk iko namuno on owon’to jihohoi to Yesu Kristo. ¹⁴ Irrirryai nelahode ninya isyori jihoi. Irrirryai inyi to Oloyiri ol Olibo al amanya’to jihohoi. ¹⁵ Imijak iye ana jo, laati daŋ hulo Asia oyitotyai isi orwoŋitek hosi jihoŋ. Ihiji laati hulya owoni Fugelo iko Erumonege. ¹⁶ Ijara Hobu omehino jyo laati hutta haŋ ba Onesiforo nyo enyyahita arryai olwahyo inyi ani bwo obeŋ inyi iloriri ta aririk hoŋ. ¹⁷ Nyo inya awanari inyi Roma ottifya inyi ani bebe ette nyurana ani. ¹⁸ Ijara Hobu isyo jihonyi inyuraniere amehino ono Hobu iholoŋ ania. Bwo ihwa imijak iye bebe olwaji elwahiti honyi jihoŋ imiji Efisa.