¹ Eramak ni iye erre huna ihosyere Hollum iko Yesu Kristo ol oŋot adi eswok iko ayyak. Eramak ni iye erre huna ta attuna honyi iko olobye honyi jo, ² ittiyenie nekyanita Hollum. Heminyaro, ittiyenie to oloŋ on oyyu’to iko to oloŋ on orroho’to, ituruhye isi, isiŋye isi, ittittoye isi, ittiyenie isi ta adihan taji daŋ. ³ Nyo ottu adi oloŋ on obyaŋarik laati awaharik itaniŋyere ettiyenita hun oyiji, ati awahi ayyaha hosi itaniŋuna erre hun olufaji bwo itattubani adi isi ettiyanak arryai hul ittiyenie’to isi ihwa awahi isi itaniŋyo. ⁴ Iloice adi isi ayyaha hosi addi jyo nelahode, bwo oyitotye isi jyo eyabita asai. ⁵ Ati iye Timoteo, ihuma irrirrya erre daŋ, odihu ettigemita, igyamai egyama ono etisarrani sayyo hun oyiji, otuhok negyamita daŋ. ⁶ Nyo ihwania ilyaha naye hoŋ nyo esyo ni nesu hoŋ ihwa ehuma jyo Hollum, bwo attuba asaa en edyahari ni itai. ⁷ Atuk ni arrem on oyyu, iko aŋettyo hoŋ. Adulo ni ’rirrya neruk. ⁸ Tania ottunani toni egorya ono abisan an ilaman an iyyafaniere ihou, an isyo adi Hobu jihoŋ iholoŋ ania, Hobu alya inyi aŋotoni ol obis. Obyaŋara egorya ania toni hama, ati ara ta laati daŋ hul omunoi’to ta aleyo honyi. ⁹ Ottifyai bebe ittuniere jihoŋ kwak, ¹⁰ nyo obusaro ani Demo, nyo omuno inyi erre huno afau ana ette inyi leten Tesalonika. Alo Kresente ifau Galatia. Alo Tito ifau Dalmatia. ¹¹ Luka hama al ewon’to ikoŋ. Iyaŋunie Marko, ifwanna ikonyi daŋ nyo olwahyo adi inyi ani te egyama hoŋ. ¹² Ati efak ni Tikiko imiji Efisa. ¹³ Al ittu iye iyaŋunie aboŋo ninya agwohi ni imiji Trosa jyo Karupo iko abuhi, ati agalik daŋ oŋida iye iyaŋuno awaragat huno amuhuny. ¹⁴ Alesandro ehuhumani felehi, ihanio inyi jihoŋ on orroho bebe. Oduma adi Hobu inyi te ehanita honyi. ¹⁵ Ihuma irrirrya inyi bwo fe, nyo iha inyi nekyanita hohoi ta agolon. ¹⁶ To okikoi hoŋ etteri, obeŋ obo esiyoni al isiyo’to ani, ati obusarai isi ani daŋ. Helaha Hollum oŋot eram ana jihosi. ¹⁷ Ati owotya Hobu iger hoŋ bwo itagol inyi ani ittittoyere asayyo hun oyiji ette paganohyen daŋ itaniŋuna. Italahu inyi ani bwo fe to hutuk lemye. ¹⁸ Italahu adi Hobu ani jyo egyamita daŋ hun orrohoji’to bwo iyaŋuno adi inyi ani ilobye honyi idou. Ijara etahabuyo hatawana jihonyi fur. Amen. ¹⁹ Itifonyak Pirisa iko Akwila bwo fe hutta haŋ ba Onesiforo. ²⁰ Arasa Erasto imiji Korinto bwo oŋwai Trofimo ette ni busaro inyi imiji Milito. ²¹ Oŋida ifwanna jihoŋ hobeŋ ameyu. Itifonyai laati iye, isi Ebulo, Pudeno, Lino, Klaudia iko illarak daŋ. ²² Ijara Hobu hatawana jyo oloyiri hoi. Ijara amehino hatawana jihoi.