¹ Illarak hoŋ, awak ni iramana jihatai jo aŋai igyama amehino ono Hollum jyo aati hutto klesyahyen Masedonia. ² Dwadi owon jihosi ettigemyo on obolo osyaro amuno hosi, bwo dwadi ilocaŋi isi bebe isyori isi esyorita hosi ihwa abarak. ³ Nyo amijak ni ahode isyori isi esyorita hosi ihwa oremehini isi. Ahode, ta awahan hosi isyori isi arobia hun olwaji agalihini. ⁴ Ilolyai isi jihohoi bebe iyari esyorita hunia ilwahyere aati Hollum. ⁵ Isyori isi agalihini egigilita hohoi, ati ahosyere isyori isi ahwattek hosi jyo Hobu iko jihohoi ihaniere awahan ono Hollum. ⁶ Tania efak hohoi Tito ilari jihatai ifwotuniere arobia huno esyorita nyo itteryo inyi beryen egyama ihiji hatai. ⁷ Ati ihwa igalihina tai te erre daŋ; te eruk, ta nekyana, ta amijana, te efiriwa, ta amuno hatai jihohoi, ottifyati bwo fe igalihiniere te egyama ono amehino ana. ⁸ Abeŋ ni ekyana efahi jihatai, ati ekyana ni ikemyere amuno hatai jo kuyya ara inyi ahode, ihwa amuno ono laati omuk. ⁹ Nyo imijana tai amehino ono Hobu hohoi Yesu Kristo, jo ara dwo bu abara inyi, ottu inyi rahan olocaŋ tetai jo oŋida itai ifwanna rahan ahabarak te elocaŋ honyi. ¹⁰ Ihwania eramak ni itai egigilo hoŋ te eram ana. Toŋoleŋai itteryete tai isyoryere esyorita ahosyere daŋ, bwo obeŋ ara ania ijai, ati imunoti tai ilwahyere laati bwo fe. ¹¹ Ati ihwania otuhonia eram ania. Iwahata nya itai ihanio tania otuhonia inyi ihwania ihwa iremehina tai. ¹² Nyo kuyya awak ataji tulo isyoryere esyorita, ifwotu Hollum esyoryo honyi ihwa owoni erre jihonyi. Ati obeŋ Hollum ifiyo esyoryo on obolo jyo olocaŋ. ¹³ Abeŋ ni ajo ana jo oŋida laati omuk itoŋoi dee bwo itai iwatta iko ettigemyo. ¹⁴ Ati ajo ni jo, ihwania oŋida alwaji hatai olwahyo elocaŋ hosi, bwo ihalu olwahi adi ebariti hosi elocaŋ hatai bwo irrijoro adi itai ikosi. ¹⁵ Ihwa igyoroni jo, “Lya ol ohuru nya hun olwajic obeŋ ofitok omuk, bwo fe lya ol ohuru nya hun omutari obeŋ oniama.” ¹⁶ Ati humo jyo Hollum al ihanak’to efiriwa tetai itaji Tito ihwa efiriwa hoŋ. ¹⁷ Nyo iruk inyi ekyanita hohoi bwo awak inyi leten jihatai ta awahan on obolo. ¹⁸ Bwo fe efak hohoi illa hohoi ikonyi al itahuye eklesyahyen daŋ te ettiyenio honyi asayyo hun oyiji’to. ¹⁹ Obyaŋara ania hama ati onyimuni eklesyahyen inyi ifwarri Yerusalem ikohoi iyari esyoryo on oyyu’to ana. Eharak adi hohoi esyoryo ana itahabuyere Hobu bwo fe itahutaniere amuno hohoi jihosi. ²⁰ Oŋida hohoi ehum irrirrya ŋadi obo atulo arrasak hohoi te eram ono esyoryo ana on obolo’to an efwo hohoi iharaniere. ²¹ Nyo ewak hohoi ihanio erre daŋ on obis obeŋ ara ihosyere Hobu hama, ati ihosyere wati bwo fe. ²² Efak hohoi bwo fe illa hohoi obo ikosi linya ekemyo hohoi enyyahita arryai, bwo enyurak hohoi efiriwa honyi te erre arryai. Ihwania ifiriwa inyi agalik nyo omuno inyi itai ahode. ²³ Te eram ono Tito ara inyi illaŋ iko egyamani al egyama ikoŋ tetai. Bwo arai illarak hohoi omuk lefahat hulo eklesyahyen hul itahutani akwatan ono Kristo. ²⁴ Tania itahutana amuno hatai ihosyere wati hutto klesyahyen, bwo fe itahutana jyo illarak hulo jo obeŋ etahuyo hoŋ tetai ara asai.