¹ Ihwa arai ecoriti huna ahunohoi illarak hoŋ hul amuno ni, hetaliboroto ahwattek iko oloyirihyen hohoi jyo erre daŋ hun itarrohojye’to isi, bwo hetafutana alibori hohoi ta abaŋi Hollum. ² Ifwotuna hohoi. Ebeŋ hohoi etarroho obo atulo, ebeŋ etasila obo atulo, ebeŋ enyob obo atulo. ³ Abeŋ ni ekyana ihwania iŋocere itai, nyo ajo nya ni iwanata tai itaji hoŋ, iyeri kuyya iswori arabotye ikoŋ. ⁴ Obolo eŋere hoŋ tetai bwo fe obolo etahuyo hoŋ tetai. Efut ni iko etilihyo bwo osyaro amuno hoŋ ihiji ettigemita hohoi daŋ. ⁵ Ninya efwonni hohoi Masedonia obeŋ obo ayiri jihohoi nyo owoni ettigemita iŋaco daŋ. Owoni erremiti ilet iko abaŋi itajya. ⁶ Ati Hollum alya al itilihyo hul ijiriŋai’to, itilik nya atajya hohoi ta attuna ono Tito. ⁷ Bwo fe obyaŋara ta attuna honyi hama, ati ara te etilihyo an ifwotu inyi jihatai. Bwo fe amuno ni bebe nyo iramak inyi ani jo iwahata tai igonyuna ani bebe, bwo ijiriŋati tai iko efiriwa hatai toni. ⁸ Nyo kuyya eyaŋuno ni jihatai adyaha tajya ta awaraga hoŋ, abeŋ ni eloit ataji hoŋ dwadi ejiriŋa nya ni, nyo egonyu ni ihwania obeŋ adyaha hatai ta awaraga ania odulo fur. ⁹ Bwo ihwania amuno ni, obyaŋara ta adyaha hatai, ati nyo ta adyaha hatai iloicete tai atajya hatai. Nyo amijak ni ara adyaha ania to Hollum, tania ebeŋ hohoi ehanio jihatai on orroho. ¹⁰ Nyo adyaha an aŋatak Hollum jihatai, iyaŋuno inyi eloico ono ataji an ara esidi honyi etalahuna. Obeŋ obo ejiriŋa teyya. Ati adyaha ono afau ana iyaŋuno naye. ¹¹ Ikemijyete do esidi ono ejiriŋa an aŋatak Hollum jihatai. Te efiriwa ikyanati tai elyeti. Bwo te eyyau ania iloŋojitati tai bwo fe ibaŋata. Tania iwahata tai ani ilwahyere itai. Bwo te efiriwa taji iŋocete tai lya al iyyau’to. Tania itahutana tai jo iliboroto tai te eram ana. ¹² Tania dwadi egyoro ni jihatai obeŋ ara te eram ono lya al iyyau’to, kuyya ono alya ol odyaha te eyyau ania, ati egyoro ni jo oŋida Hollum itahutak jihatai efiriwa hatai tohohoi. ¹³ Tania ilihi atajya hohoi. Obyaŋara te etilihyo hohoi hama an emuno hohoi, ati emuno hohoi an agalik ta amuno ono Tito nyo ilik oloyiri honyi te eram hatai daŋ. ¹⁴ Nyo kuyya etahuyo ni itai jihonyi abeŋ ni eloriri. Ihwa ekyana nya hohoi jihatai nelahode te erre daŋ, arai bwo fe erre hun etahuyo hohoi jyo Tito nelahode. ¹⁵ Bwo fe omuno ataji honyi agalik tetai, nyo ogilu inyi aniŋyo hatai daŋ bwo abaŋi iko ekikiro an ifwotuniette tai inyi. ¹⁶ Amuno ni nyo itoŋo ataji hoŋ dee te erre hatai daŋ.