¹ Bwo egyama hohoi arabotye ikonyi, bwo elolya hohoi jihatai jo oŋida ibyaŋata tai ifwotuna amehino ono Hollum asai. ² Nyo ojo Hollum jo, “Etaniŋu nya ni itai ta asaa on osiru’to, Bwo alwak ni itai iholoŋ ono etalahuna.” Imijyete, ara ahana oloŋ ono asiruna ahode. Imijyete, ara ahana oloŋ ono etalahuna. ³ Ebeŋ hohoi ehanak obo ariŋ itikosyere obo atulo, jo oŋida obeŋ obo ikyana on orroho te ettiyenio hohoi. ⁴ Ati te erre daŋ etahutak hohoi jo era hohoi legyamak hulo Hollum, ta adihan on obolo, te eŋwati, te ettigemita, te erre hun orrohoji’to, ⁵ te ebahiti, te efitana ibabus, ta aŋalafita, te egyama on ogol, ta abyaŋan joto, iko ta ahure. ⁶ Bwo fe etahutak hohoi egyama hohoi jihatai ta alibori tajya, to ofyoro, ta adihan ettigemita, ta amehino, to Oloyiri ol Olibo, ta namuno on obeŋ iko enyobyo, ⁷ ta nekyana ahode, iko ta adwaran ono Hollum. Ewon hohoi iko erremiti huno alibori ihani iŋet iko ihani ihorroŋ. ⁸ Itahabuye laati hohoi bwo fe omyanai. Ikyanai isi on oyyu tohohoi bwo fe on orroho. Ojori laati era hohoi ahenyabak ati ettiyenio hohoi nelahode. ⁹ Ojori omuk era hohoi asai, ati omijak Hollum hohoi bebe. Elyaha hohoi aye, ati imijyete, esu hohoi; abahye isi hohoi, ati obeŋi isi ottohori hohoi. ¹⁰ Ejiriŋa hohoi, ati emuno hohoi oŋitek daŋ; elocaŋ hohoi ati eyaŋuno hohoi ebariti jyo laati arryai; obeŋi omuk erre jihohoi, ati ewon hohoi iko erre daŋ. ¹¹ Itai laati hulo Korinto, eramak ni itai erre daŋ hutto taji hoŋ bwo fe amuno ni itai bebe. ¹² Obeŋ amuno hoŋ omuta jihatai, ati omuta amuno hatai jihoŋ. ¹³ Ihwania itaboloroto amuno hatai jihoŋ. Ekyana ni jihatai ihwa aduri hoŋ. ¹⁴ Henosoti iko hul obeŋi’to iruhi, nyo aŋai oremik alibori ’ryaha iko neyyau? Bwo fe aŋai oremik afaŋan ’ryaha iko edumele? ¹⁵ Bwo fe aŋai orryahai Kristo iko Bilala? Bwo fe aŋai orryahai eruhoni iko alya ol obeŋ’to iruk? ¹⁶ Bwo fe aŋai iruhonie aji ono Hollum iko arrijorihyen? Nyo era hohoi ahaji ono Hollum leswoni, ihwa ojo Hollum, “Amanya adi ni itwajin hosi bwo adaha adi ni ikosi. Ara adi ni a Hollum hosi Bwo isi awati hoŋ. ¹⁷ Tania ojo Hobu, ifwanna addi t’ehiji hosi Bwo fe obwanyuniete addi jihosi. Hettiroto obo ariŋ en ebot Bwo efwotu adi ni itai. ¹⁸ Ojo Hobu Adwarani al agalik’to daŋ, Ara adi ni a Monye hatai Bwo fe irata adi itai olonyirok hoŋ iko ŋarryok hoŋ.”