¹ Ihwania te eram ono alwahyo aati Hollum, oŋida ani abeŋ egyoro jihatai, ² nyo amijak ni awahan hatai ilwahyere isi. Eramak ni laati Masedonia te etahuyo, jo ihuhumani laati Akaya esyorita hosi many toŋoleŋai. Bwo fe te efiriwa hatai itawuloto tai atajya wati arryai ihaniere ihwo nya. ³ Ati efak ni illarak hohoi jihatai jo oŋida obeŋ etahuyo hohoi tetai ara asai. Bwo fe oŋida ihuhumana ahwattek hatai isyoryere ihwa ekyana nya ni. ⁴ Nyo kuyya efwonni omuk hulo Masedonia ikoŋ bwo onyurani isi ibyaŋata tai ihuhumana esyoryo hatai, eloriri adi hohoi ikatai daŋ te etahuyo hohoi. ⁵ Tania egigilo ni jo, oyyu al ofwoi illarak hulo jihatai ahosyere hoŋ, ihuhumaniere esyoryo hatai ihwa icoronia nya itai, jo oŋida esyoryo hatai ara ta awahan hatai obyaŋara ta arrosonia. ⁶ Igigiloti ta ana, Lya ol oyehi’to ema bok bok odeŋu adi inyi hun omutari, bwo fe lya ol oyehi’to hun olwaji odeŋu adi inyi hun olwaji. ⁷ Ijara laati daŋ ababo isyori ihwa ocoroni isi itajya hosi, obyaŋara ta amijan taji kuyya ta abaŋi, nyo omuno Hollum lya al isyo’to agurusi ta namuno taji honyi. ⁸ Bwo fe oremik Hollum itufutana esyorita honyi daŋ jihatai jo oŋida iwanata tai iko erre daŋ hun iwahata tai oŋitek daŋ, tania iremehina tai ilwahyere egyamita daŋ hun oyiji’to. ⁹ Ihwa igyoroni jo, “Lya al itisarrahi ebariti bwo isyo jyo alocaŋak, Odulo adi amehino honyi fur.” ¹⁰ Ati Hollum al isyo enyomo jyo layani iko emune iŋiyere, isyo adi inyi jihatai bwo ofonik adi inyi erre jihatai itisarrahiniere, tania iyaŋuno adi amehino hatai aŋer hun olwaji. ¹¹ Ifwanna adi itai ratan ahabarak te erre daŋ bwo fe al eyaro hohoi esyorita huna, isyori adi laati ahumo jyo Hollum. ¹² Nyo obeŋi esyorita huna arai elwahiti huno laati Hollum hama, ati ifuti isi iko ahumo on osyaro jyo Hollum. ¹³ Nyo al igonyuni laati esyoryo ana, itahabuye adi isi Hollum te efaha hatai asayyo huno Kristo an ikyanati tai, bwo fe te emorotita hatai jihosi iko jyo laati daŋ. ¹⁴ Bwo omojoi isi tetai bwo awahi atajya hosi itai, nyo ta amehino ono Hollum on obolo’to itwajin hatai. ¹⁵ Humo jyo Hollum te esyoryo honyi on obolo’to, en ettallik hohoi ekyanari.