¹ Tania al odyaha ataji hoŋ bebe ta abyaŋan hoŋ igonyuna itai, egigilo nya ni jo, oyyu arasari ni hama imiji Atena, ² ette ni fahina Timoteo illa hohoi al ara egyamani olo Hollum ta asayyo hun oyiji huno Kristo. Ottu adi inyi itagolyere itai bwo itilihyere itai ta neruk hatai, ³ jo oŋida ettigemita huna obeŋi ituhutori obo atulo addi. Nyo imijana tai ta ahwattek hatai jo onyimuni hohoi idihuniere ettigemita. ⁴ Nyo ahode, ninya hewon hohoi ikatai eramyo nya hohoi itai ahosyere jo enyurak adi hohoi ettigemita. Idwoŋi nya erre huna ihwa imijana tai. ⁵ Odyaha ataji hoŋ bebe ta abyaŋan hoŋ igonyuna itai. Te eram ana efak ni imijaniere neruk hatai, ŋadi esuswani isusuyo itai, ette egyama hoŋ ratan asai. ⁶ Ati ihwania afany Timoteo jihoŋ tetai, bwo iramak inyi ani asayyo huno neruk hatai iko namuno hatai, bwo iduloti tai igigilo toni on oyyu. Iramak inyi ani bwo fe jo iwahata tai igonyuna ani, ihwa awak ni bwo fe igonyuna itai. ⁷ Illarak hoŋ, te eram ono neruk hatai enyurak hohoi etilihyo tetai ihiji edyahita iko ettigemita hohoi daŋ. ⁸ Ihwania esu hohoi ahode al emijak hohoi jo iwotyati tai on ogol jyo Hobu. ⁹ Aŋai esyarak hohoi ahumo jyo Hollum on osiru tetai? Nyo te eram hatai ewon hohoi iko amuno on obolo ihosyere Hollum hohoi. ¹⁰ Emojotyo hohoi bebe ta attari iko ta afanni jo oŋida hohoi egonyu omomite hatai, bwo oŋida hohoi etafutak neruk hatai te erre hun ibyaŋata tai imijana. ¹¹ Ihwania ijara Hollum Monye hohoi ta ahwan honyi iko Hobu hohoi Yesu itadihoroi hohoi te ekoi ifanyari jihatai. ¹² Ijara Hobu ofonik jihatai namuno many osyaro jyo illarak hatai iko jyo laati daŋ, ihwa emuno hohoi itai. ¹³ Jo oŋida inyi itagol atajya hatai ta alibori iko ta abyaŋan ipali ihosyere Hollum Monye hohoi, ta attuna ono Hobu hohoi Yesu iko aati honyi daŋ.