¹ Tania illarak hoŋ te esidi emojo hohoi jihatai bwo elolya hohoi jihatai to Hobu Yesu jo, ihwa ifwotuna nya itai jihohoi ettiyenita imijana tai aŋai idahari itamunoyere Hollum, tania oduloti daha te ekoi on oyyu ihwa idahati tai ihwania. ² Nyo imijana tai efahita hunya esyo hohoi jihatai to Hobu Yesu. ³ Ara alibori hatai awahan Hollum, jo oŋida itai iwanyati addi jyo erre somon. ⁴ Jo oŋida itai daŋ ababo imijana itihyere ahwattek hatai ihwa ariŋ an ittaŋuni te etahabuyo. ⁵ Obyaŋara ihaniere ewahiti huno ahwan, ihwa ihanie paganohyen hul otimoi’to Hollum. ⁶ Tania oŋida obeŋ obo atulo iyyau itarrohojyere illanyi te eram ana, nyo inienu adi Hobu erre huna daŋ, ihwa ninya eramaniere hohoi itai te ekyanita hohoi. ⁷ Nyo obeŋ nya Hollum iloŋo hohoi ibotita ati iloŋo inyi hohoi ilibori. ⁸ Tania atulo al iha’to nekyanita huna, obeŋ inyi iha laati ati iha inyi Hollum al isyo’to jihatai Oloyiri honyi ol Olibo. ⁹ Te neram ono namuno jyo illarak, ibyaŋata tai iwahata ani egyoro jihatai, nyo Hollum ittiyenio itai imunori illarak hatai. ¹⁰ Ahode imunoti tai illarak daŋ hutto Masedonia. Ati elolya hohoi jihatai illarak, jo oŋida namuno hatai ifut hiny hiny. ¹¹ Ottifyati bebe itoŋori dee igyamari egyama hatai, bwo fe igyamari ta ahas hatai luŋa ihwa ninya eramaniere hohoi itai; ¹² jo oŋida obis adaha hatai ihosyere wati hutto let, adahati bwo fe ta abyaŋan wahan hirre. ¹³ Illarak hoŋ, ebeŋ hohoi ewak itai itimoti neram wati hul oye’to, bwo hejiriŋati ihwa laati omuk hul obeŋi’to iko eyihina. ¹⁴ Nyo kuyya eruk hohoi jo oye nya Yesu bwo fe ibuhu, tania eruk hohoi bwo fe jo al acohuno Yesu iyaŋuno adi Hollum ikonyi hul oyei’to. ¹⁵ Ejo hohoi ana jihatai ta nekyana ono Hobu jo, hohoi hul hesu’to, hul hewon’to ifau many jo oloŋ on ottuniere Hobu, ebeŋ hohoi eremik kyomoro jo laati hul oyei’to. ¹⁶ Nyo isuru adi Hobu ta ahwan honyi t’edou iko eloŋo, bwo te ewuwoŋita ono eleittok olo anjelohyen, iko ta aforojo ono Hollum. Bwo ahosyere ibuhuni adi ayak hunya oyei’to itwa Kristo. ¹⁷ Ihalu hohoi hul idyaharai, hul hesu, akafuni adi arabotye ikosi ihide idisi irwaŋaniere iko Hobu, bwo ewon adi hohoi iko Hobu tulaŋ. ¹⁸ Tania oŋida itilihyete atajya hatai ta nekyanita huna.