¹ Illarak hoŋ, imijana tai ta ahwattek hatai jo obeŋ afwanna hohoi ihiji hatai ara asai. ² Imijana tai enyurak nya hohoi edyahiti iko ettigemita hun orrohoji imiji Filipi, ati ta adwaran ono Hollum hohoi enyurak hohoi eŋere ikyanari jihatai asayyo hun oyiji huno Hollum, ara dwo bu ihiji ŋalafa. ³ Nyo ebeŋ hohoi ettiyenio epalita, kuyya ebotita, kuyya enyobita. ⁴ Ati omuno Hollum isyaraniere jihohoi asayyo hun oyiji, tania ekyana hohoi. Ebeŋ hohoi ekyana itamunoyere laati ati ekyana hohoi itamunoyere Hollum lakemani tajya hohoi. ⁵ Ati imijana tai ebeŋ hohoi etamunoyo itai ta nekyanita asai bwo ebeŋ hohoi ettifya erre hatai te enyobyo. Ara Hollum etamijanani hohoi. ⁶ Ebeŋ hohoi ettifya etahabuyo wati ara dwo bu jihatai kuyya bu jyo laati omuk dwadi eremik hohoi ’tifya etahabuyo, nyo era hohoi efahat Kristo. ⁷ Ati inya ewanari hohoi ihiji hatai, enyalam nya hohoi ihwa aŋotte on omuno’to aduri honyi. ⁸ Tania ta amuno hohoi itai ewak hohoi ikyanari jihatai asayyo hun oyiji huno Hollum. Obyaŋara ania hama, ati esyo hohoi bwo fe ahwattek hohoi jihatai, nyo emuno hohoi itai bebe. ⁹ Nyo illarak hoŋ, igotyete tai egyama hohoi iko ehanita hohoi. Egyama nya hohoi ta attari iko ta afanni inyuraniere agurusi jo oŋida hohoi ebeŋ ettigemyo itai al ettiyenio hohoi jihatai asayyo hun oyiji’to huno Hollum. ¹⁰ Irata tai etamijanak arabotye iko Hollum jo, emanya nya hohoi ihiji hatai heruhok ta alibori iko ta abisan bwo ta abyaŋan ipali. ¹¹ Imijana tai aŋai esiŋyo hohoi itai ababo te elolya ihwa isiŋyo monye aduri honyi, bwo etawulo hohoi atajya hatai bwo eramak hohoi itai jo, ¹² oŋida imanyati on osiru jyo Hollum al iloŋo’to itai ijiŋaniere ikwatan honyi iko ilobye honyi. ¹³ Te eram ana edulo hohoi esyoryo ahumo jyo Hollum jo al ifwotuna tai nekyanita huno Hollum hunya itaniŋuna tai jihohoi, ibyaŋata tai ifwotuna isi ihwa ekyanita wati, ati ihwa ekyanita Hollum. Arai isi ahode ekyanita huno Hollum hun igyamai’to itwajin hatai heruhok. ¹⁴ Illarak hoŋ, ifwanna nya itai rahan ahejifak hulo eklesyahyen huno Hollum hun owoni’to itwa Yesu Kristo ifau Yudea. Idihuna nya itai ettigemita jyo laati hutto miji hatai ihwa odiuni nya isi ettigemita jyo laati Yudea. ¹⁵ Isi Yudea hunya ottohori’to Hobu Yesu iko leyak sayyo, bwo ifuhari isi hohoi addi to fau hosi. Obeŋi isi itamunoye Hollum bwo fe arai isi amyorok jyo laati daŋ. ¹⁶ Itihye isi hohoi ikyanari jyo paganohyen nyo ŋadi isi italahuni. Odulori isi afwafwanaro eyyata hosi, bwo ottu ajore ono Hollum jihosi on obolo. ¹⁷ Ati illarak hoŋ, dwadi ebeŋ hohoi ewon ikatai to omuk oŋitek, ewon hohoi ikatai ta atajya bwo fe ewak hohoi bebe igonyuna omomite hatai. ¹⁸ Ahode ani Paulo, awak nya ni iko illarak omuk ifwonniere jihatai enyyahita arryai, ati itik Sitan hohoi. ¹⁹ Irata tai neyihina hohoi, iko namuno hohoi, bwo egorya ono etahabuyo hohoi. Emuno adi hohoi tetai al ewotya hohoi ihosyere Hobu hohoi Yesu ta attuna honyi. ²⁰ Nyo itai, irata tai akwatan hohoi iko namuno hohoi.