¹ Mottyarak hoŋ hul amuno ni, heruhoto laati daŋ hul ojori ewon isi iko oloyiri, ati okyamata isi imijaniere kuyya arai isi ahulo Hollum, nyo olwaji ebwanak hul ipali’to arryai hul ofwoi ifau daŋ. ² Iremehina tai mijana Oloyiri olo Hollum nyo aati daŋ hul iruhi’to jo ottu Yesu Kristo ihwa atulo, arai isi hulo Hollum. ³ Ati aati daŋ hul obeŋi’to iruhi Yesu, obeŋi arai ahulo Hollum. Ara ana etamijani ono amyotononi Kristo bwo itaniŋuna tai attuna honyi, ati ihwania owon inyi ifau. ⁴ Aduri hoŋ, irata tai ahulo Hollum bwo fe igalihina tai isi, nyo alya ol owon’to itwajin hatai obolo inyi agalik ol owon’to lifau. ⁵ Arai isi huno afau, te eram ana ikyanai isi ihwa laati hulo afau, bwo itaniŋye aati jihosi. ⁶ Ati era hohoi ahulo Hollum. Alya ol omijak’to Hollum itaniŋyo jihohoi, bwo lya ol obeŋ’to ara aholo Hollum, obeŋ inyi itaniŋyo jihohoi. Tania emijak hohoi alufaji ono oloyiri ono nelahode iko ono oloyiri an ipal’to. ⁷ Mottyarak hoŋ hul amuno ni, hamunoti ahwattek hohoi nyo ara amuno ahono Hollum, bwo ol omuno’to ara inyi eito olo Hollum bwo fe omijak inyi Hollum. ⁸ Alya ol obeŋ’to omuno obeŋ inyi omijak Hollum, nyo ara Hollum ahamunoni wati. ⁹ Inyi ana inya itahutanierek amuno Hollum jihohoi, te efahuna honyi Lonyi honyi olobotye ifau, jo oŋida hohoi esu tenyi. ¹⁰ Bwo amuno ana, obyaŋara jo emuno hohoi Hollum, ati jo omuno inyi hohoi, bwo ifahu inyi Lonyi honyi irari emori te eyyata hohoi. ¹¹ Illarak hoŋ hul amuno ni, al amuno Hollum hohoi, oŋida bwo fe hohoi emuno illarak hohoi. ¹² Hobeŋ tulo igonyu Hollum ’tuŋ ati al emuno hohoi illarak hohoi, amanya Hollum jihohoi bwo osohino amuno honyi jihohoi. ¹³ Tania efwonni hohoi mijana jo egolik hohoi jihonyi bwo inyi jihohoi, nyo isyarak inyi hohoi oloyiri honyi. ¹⁴ Egonyu hohoi bwo fe era ahetamijanak jo ifahu Monye Lonyi irari ahetalahani wati hutta fau. ¹⁵ Al iruk obo atulo jo ara Yesu Lonyi Hollum, ogolik Hollum jyo atulo alya, bwo inyi jyo Hollum. ¹⁶ Emijak hohoi bwo fe eruk jyo amuno an omunori Hollum hohoi. Ara Hollum ahamunoni wati bwo lya ol ogolik’to imuno ogolik inyi jyo Hollum, ogolik bwo fe Hollum jihonyi. ¹⁷ Ara ana amuno on osohino’to jihohoi jo oŋida hohoi ewon iko eŋere iholoŋ ono aŋoco, nyo era hohoi jyo afau ana ihwa an arari inyi. ¹⁸ Obeŋ abaŋi to muno, nyo amuno on osiru’to iya abaŋi addi. Nyo iyaŋuno abaŋi eburaŋatyo, bwo lya al abaŋ’to obeŋ amuno honyi osiru. ¹⁹ Emuno hohoi Hollum nyo omuno nya inyi hohoi beryen. ²⁰ Al ojo obo atulo jo, Amuno ni Hollum, ati oliwari inyi illanyi, ogesem inyi; nyo lya ol obeŋ’to omuno illanyi al igonyu inyi, obeŋ inyi oremik muno Hollum al hobeŋ inyi igonyu. ²¹ Bwo isyo Hollum efahi ana jihohoi jo, lya ol omuno’to Hollum, oŋida inyi bwo fe omuno illanyi.