¹ Imijyete amuno on obolo an isyarak Monye jihohoi iloŋori hohoi aduri Hollum, bwo inyi ania an erari hohoi. Te eram ana obeŋi aati hutta fau omijani hohoi nyo obeŋi nya isi omijani inyi. ² Illarak hoŋ hul amuno ni, era hohoi aduri Hollum ihwania, ati hobeŋi italeyehini ewonita an efwonniere adi hohoi wanari. Ati emijak hohoi jo al italeyehini Kristo era adi hohoi ihwo inyi, nyo egonyu adi hohoi inyi ihwa an awanari inyi. ³ Alya al iyihi’to jyo eram ana italibo inyi ataji honyi ihwa olibo Kristo. ⁴ Al iyyau’to omesyo inyi efahita nyo ara neyyau amesyo ono efahita. ⁵ Bwo imijana tai jo ottu nya inyi iyari eyyata addi, nyo obeŋi eyyata jihonyi. ⁶ Alya ol ogolik’to jihonyi obeŋ bu inyi odulo iyyauta, bwo lya al amanya’to iyyata obeŋ inyi igonyu inyi, obeŋ bwo fe inyi omijak inyi. ⁷ Aduri hoŋ, helaha obo atulo inyob itai. Alya al ihanio’to ehanita hun obisi, obis inyi ihwa Kristo. ⁸ Alya al iyyau’to ara inyi aholo etisyahani,v nyo iyyau nya etisyahani t’etteri. Inyi ana inya ottuniere Lonyi Hollum, jo oŋida inyi itattur negyamita huno etisyahani. ⁹ Obeŋ bu nyi eito Hollum odulo iyyauta, nyo owon nesu ono Hollum jihonyi bwo obeŋ inyi omok iyyauniere nyo ara inyi ahito Hollum. ¹⁰ Inyi ana an itahutanierek aduri Hollum iko hulo etisyahani, jo alya ol obeŋ’to ihanio ehanita hun obisi obeŋ inyi ara ahito Hollum, dwadi bu lya ol obeŋ’to omuno illanyi. ¹¹ Nyo asayyo huna hunya itaniŋuna tai many t’etteri jo oŋida hohoi emuno illarak daŋ. ¹² Oŋida hohoi ebeŋ era ihwa Kaino olorroho inya etisyahaniAra inyi Sitan. ottoho’to illanyi. Nyo ottoho inyi illanyi? Nyo orrohoji nya ehanita honyi, bwo huno illanyi obisi. ¹³ Illarak hoŋ, hehawwati al odulo afau liwari itai. ¹⁴ Emijak hohoi jo ellaŋ hohoi to ye lisu nyo emuno hohoi illarak hohoi. Alya ol obeŋ’to omuno aati odulo inyi liye. ¹⁵ Alya ol oliwari’to illanyi ara inyi ahattohoni bwo imijana tai jo obeŋ attohoni owon iko nesu on osyo fur. ¹⁶ Te eram ana emijak hohoi amuno jo, isyo Kristo nesu honyi tohohoi, tania oŋida hohoi esyarak nesu hohoi te illarak hohoi. ¹⁷ Ati ol owon’to iko asaŋ huno afau ana bwo igonyu inyi illanyi al iratta, ati obeŋ inyi olwak illanyi, aŋai adi odulo amuno ono Hollum jihonyi? ¹⁸ Aduri hoŋ, helaha hohoi emuno laati te ekyanita hama hutto hutuhe hohoi, ati hamunoti laati te ehanita iko nelahode. ¹⁹ Tania efwonni hohoi mijana jo edaha hohoi ilahode, bwo ewon hohoi iko nelik tajya ihosyere Hollum. ²⁰ Al itahutani atajya hohoi eyyata jihohoi emijak hohoi jo obolo Hollum agalik atajya hohoi bwo omijak inyi erre daŋ. ²¹ Mottyarak hoŋ hul amuno ni, kuyya obeŋi atajya hohoi itahutani hohoi eyyata eremik hohoi iŋere ihosyere Hollum. ²² Bwo fe te erre daŋ hun efiyo hohoi efwotu hohoi jihonyi, nyo egotyere hohoi efahita honyi, bwo ehanio erre hun itamunoye’to inyi. ²³ Efahi honyi ana, jo oŋida dwo hohoi eruk ifure Lonyi honyi Yesu Kristo, bwo fe emuno illarak daŋ ihwa ifak inyi hohoi ihaniere. ²⁴ Alya ol ogotyere’to efahita huno Hollum ogolik jihonyi, bwo ogolik Hollum jyo lya. Tania emijak hohoi jo owon inyi jihohoi, to Oloyiri inya isyarak inyi jihohoi.