¹ Aduri hoŋ, egyoro ni erre huna jihatai jo oŋida itai ibyaŋata inyyahata iyyauna. Ati ara dwadi bu iyyauna tai, owon etimwarani hohoi ihosyere Monye, inyi Yesu Kristo ol obis’to. ² Ara inyi ehumi an itimwarak hohoi t’eyyata hohoi. Obeŋ bwo fe ara tohohoi hama ati ta laati daŋ hutta fau. ³ Al egotyere hohoi efahita honyi ettadi hohoi fwanna mijana jo emijak hohoi inyi. ⁴ Lya ol ojo’to jo, Amijak ni Yesu, ati omesyo efahita honyi, ara inyi ologesem bwo obeŋ nelahode jihonyi. ⁵ Ati al odulo obo atulo gotyere ekyanita honyi owon amuno ono Hollum ahode jihonyi. Tania efwonni hohoi mijana jo egolik hohoi jihonyi. ⁶ Lya ol ojo’to jo, agolik inyi jihonyi, oŋida inyi adaha ihwa inya adahari Yesu. ⁷ Illarak iko haniyarak hoŋ, abeŋ ni egiorok jihatai obo efahi aŋejuk; ati efahi amaruani, ninyia owon 'to ikatai many tetteri. Efahi amuarani ania, inyi asayyo hunyia itayiruna itai. ⁸ Ati ara inyi efahi aŋejuk on owon’to jyo Yesu iko itajya hatai, nyo olo nedumele addi bwo fe afaŋ nafaŋan an ara’to ahode. ⁹ Lya ol ojo’to jo, awon inyi ifaŋan, bwo oliwari illanyi, owon inyi idumele dwadi many iko ihwania. ¹⁰ Ati lya ol omuno’to illanyi, amanya inyi ifaŋan bwo obeŋ inyi ikosoro teyya. ¹¹ Bwo lya ol oliwari’to illanyi amanya inyi lidumele bwo iddiddaha dia, ette lak mijana aja olo inyi nyo itaŋodo nedumele inyi. ¹² Egyoro ni jihatai aduri hoŋ, nyo ahohinie eyyata hatai ta afure honyi. ¹³ Egyoro ni jihatai monyye, nyo imijana tai lya inya owon’to t’etteri. Egyoro ni jihatai monyomiji, nyo igalihina tai olorroho. Egyoro ni jihatai aduri, nyo imijana tai Monye. ¹⁴ Egyoro ni jihatai monyye, nyo imijana tai lya inya owon’to t’etteri. Egyoro ni jihatai monyomiji hul iwanata’to iko agolon, nyo odulo nekyana Hollum jihatai, bwo fe igalihina tai olorroho. ¹⁵ Hemunoti afau iko nerre hun owoni’to lifau. Al omuno obo atulo afau, obeŋ alya omuno Hollum. ¹⁶ Tania erre fau huna: ewahiti huno nahwan, ewahiti huno oŋite, iko netadara ono amanya; obeŋi huna ofwonni jyo Monye ati arai isi ahuno afau. ¹⁷ Nyo isid adi afau iko ewahiti honyi ati lya al ihanio’to awahan ono Hollum amanya adi tulaŋ. ¹⁸ Aduri hoŋ, ara ana oloŋ ono esidi ihwa itaniŋuna tai jo ottu adi amyotononi Kristo. Ihwania aleye amyorok Kristo arryai, inyi an emijaniere hohoi jo ara ana oloŋ ono esidi. ¹⁹ Ojiŋuni isi t’ehiji hohoi, olorrohoAra inyi Sitan. ati obeŋi nya isi arai ahulohoi. Ara nya an arai isi ahulohoi, arasai dwo isi jihohoi. Ati ofwoi isi addi jo oŋida omijani abyaŋan hosi rahan ahulohoi. ²⁰ Ihwania isyarak Hollum Oloyiri ol Olibo jihatai, bwo imijana tai nelahode. ²¹ Egyoro ni jihatai nyo imijana tai nelahode, ibyaŋata tai itimoti inyi, bwo imijana tai jo obeŋ agesemi owon ilahode. ²² Ŋai ologesem? Inyi atulo ol ojo’to jo, obeŋ Yesu ara olonyimoto olo Hollum. Alya ol omonio’to Monye iko Lonyi honyi inyi alya amyotononi Kristo. ²³ Ol omonio’to Lonyi Hollum obeŋ Monye jihonyi, ati alya al iruk’to Lonyi owon inyi iko Monye. ²⁴ Ati jihatai, ijara erre hunya itaniŋuna tai t’etteri hotodulorohi jihatai. Kuyya erre hunya itaniŋuna tai t’etteri ogolihini jihatai, igolihina adi bwo fe itai jyo Lonyi iko Monye tulaŋ. ²⁵ Bwo ecorit ana ninya ocorok inyi jihohoi inyi nesu on osyo fur. ²⁶ Egyorok ni erre huna jihatai to hya hul itipalye’to itai. ²⁷ Ati jihatai, arasa esyoryo an ara’to Oloyiri inya ifwotuna tai jyo Hollum, bwo ibyaŋata tai iwahata obo atulo ittiyenio itai. Ati ittiyenio Oloyiri itai erre daŋ, nyo ara inyi ahode bwo obeŋ ogesem. Oduloro golihina jihonyi ihwa ittiyenak inyi itai ihaniere. ²⁸ Ihwania aduri hoŋ, oduloro golihina jyo Yesu, jo al oleyo inyi oŋida hohoi eŋere bwo fe ebeŋ eloriri tohosyere honyi ta attuna honyi. ²⁹ Kuyya imijana tai jo obis inyi, imijana bwo fe itai jo laati daŋ hul ihanie’to ehanita hun obisi arai ahulonyi.