¹ Egyorok hohoi jihatai to lya linya owon’to t’etteri. Etaniŋu nya hohoi jihonyi, egonyu hohoi inyi to oŋite hohoi, eŋiŋyala hohoi bwo fe ettir inyi ta ahas hohoi; inyi Nekyana ono Nesu. ² Italeyeuni nya nesu ania jihohoi bwo egonyu hohoi inyi, ette hohoi ratan ahetamijanak honyi iramaniere jihatai nesu on osyo fur. Owon nya inyi iko Monye bwo italeyehini inyi jihohoi. ³ Inyi lya linya egonyu hohoi bwo fe etaniŋu, ette iramana jihatai jo oŋida itai erryaha ikohoi. Nyo erryaha hohoi iko Monye bwo fe iko Lonyi honyi Yesu Kristo. ⁴ Nyo al ara’to ahito Hollum agalik inyi afau, bwo ara ta neruk hohoi an egalihiniere hohoi afau. ⁵ Ŋai ati lya al agalik’to afau? Inyi alya al iruk’to jo ara Yesu Lonyi Hollum. ⁶ Yesu Kristo inyi alya ol ottu’to ta aari iko nooto, bwo obeŋ ara ta aari hama ati ara ta aari iko nooto. ⁷ Ikyana Oloyiri ol Olibo nelahode tania ara inyi ahetamijanani. ⁸ Nyo owoni etamijanak hunihoi, isi Oloyiri iko naari bwo nooto. Bwo hulo hunihoi iruhi eram abotye. ⁹ Eyihi hohoi etamijanita huno aati ati obolo etamijani ono Hollum agalik. Ara ana etamijani ono Hollum jo ara Yesu Lonyi honyi. ¹⁰ Lya al iruk’to jyo Lonyi Hollum owon inyi iko etamijani itaji honyi. Lya ol obeŋ’to iruk Hollum itagesemyo inyi Hollum, nyo obeŋ inyi iruk etamijani inya iramyo Hollum to Lonyi honyi. ¹¹ Bwo etamijani ana jo isyarak Hollum jihohoi nesu on osyo fur, bwo owon nesu ana jyo Lonyi honyi. ¹² Lya ol owon’to iko Lonyi, owon iko nesu, bwo ol obeŋ’to iko Lonyi Hollum obeŋ inyi iko nesu. ¹³ Egyorok ni nekyanita hunia jihatai jo oŋida imijana tai jo iwata tai iko nesu on osyo fur, itai hul iruhoto’to jyo nafure ono Lonyi Hollum. ¹⁴ Ihwania neyihina an eyihiniere hohoi jihonyi ana jo itaniŋyo inyi jihohoi al emojo hohoi obo ariŋ ta awahan honyi. ¹⁵ Bwo al emijak hohoi jo itaniŋyo inyi amojo hohoi, emijak hohoi jo erumak hohoi erre hun emojo hohoi jihonyi. ¹⁶ Al igonyu obo atulo motte honyi iyyau neyyau on obeŋ’to iyaŋuno naye, oŋida inyi omojo jyo Hollum bwo isyarak adi Hollum nesu jyo amotte lya kuyya obeŋ inyi iyyau neyyau an iyaŋuno’to naye. Owon neyyau an iyaŋuno’to naye; abeŋ ni ajo jo oŋida inyi omojo to lya al iyyau’to eyyau ania. ¹⁷ Erre hun orrohoji’to daŋ arai eyyata ati owon neyyau on obeŋ’to iyaŋuno naye. ¹⁸ Emijak hohoi jo al ara’to ahito Hollum obeŋ bu inyi iyyauta gaga, ati irrirriyo Lonyi Hollum inyi, bwo obeŋ olorroho ottir inyi. ¹⁹ Emijak hohoi arahan hohoi ahulo Hollum, bwo okyo afau daŋ jyo olorroho. ²⁰ Bwo emijak hohoi jo ottu nya Lonyi Hollum bwo isyarak inyi jihohoi etaniŋuna, jo oŋida hohoi efwonni mijana inyi al ara’to ahode. Ewon hohoi jihonyi al ara’to ahode, inyi Yesu Kristo Lonyi Hollum. Inyi Hollum ahode bwo fe nesu on osyo fur. ²¹ Aduri hoŋ, itihuna ahwattek hatai jyo arrijorihyen.