¹ Ijara laati igigiloi tohohoi jo era hohoi legyamak hulo Kristo bwo ahettiyanak hirre hunya idimani huno Hollum. ² Oŋida bwo fe ettiyanani ihanio egyama honyi daŋ on oyyu. ³ Ati obeŋ obo eram jihoŋ kuyya iŋocete tai ani kuyya okikoi oŋoti ani. Abeŋ bu ni aŋotoro ahwan hoŋ hama. ⁴ Nyo dwadi abeŋ ni amijak obo arrohoji jihoŋ, ettallik ni jaran jo alibo ni, nyo Hobu inyi aŋotoni hiram hoŋ. ⁵ Tania heŋocete obo hobeŋ Hobu ocohuno. Nyo ottu adi inyi nwohyo erre hun idimani ihwania idumele, bwo italeyehi adi inyi ewahiti huno atajya wati, tania ifwotuni adi laati daŋ amuno ono Hollum ihwa osiru jihosi. ⁶ Ihwania illarak hoŋ, ani iko Apolo era hohoi ahetamijanak jihatai te erre huna. Ihumata igigilo te erre hun igyoroni jo oŋida ibyaŋata itahuyete obo ettiyanani agalik obo. ⁷ Aŋai igalihina tai illarak hatai? Anyo riŋ on obeŋ Hollum isyo jihatai? Kuyya ifwotuna tai erre daŋ, aŋai itadarati tai ihwa obeŋi isi arai esyorita? ⁸ Ihwania igigiloti tai jo ifwotuna tai erre daŋ hun iwahata tai. Igigiloti tai jo irata tai ahabarak bwo fe ahobwok bwo ihara tai hohoi. Kuyya irata dwo itai ahobwok ahode amuno adi ni bwo fe eleittok dwo hohoi ikatai. ⁹ Egigilo ni ihanak Hollum hohoi hul era efahat awati hul emuta ihwa laati hul oŋoti aye ihosyere wati. Iŋiŋyalai aati daŋ hutta fau iko anjelohyen hohoi. ¹⁰ Ojori aati era hohoi abuyaŋak ta afure Kristo ati irata tai alofyorojok to Kristo. Elik hohoi ati igoloto tai. Itahabuye laati itai ati omyanai isi hohoi. ¹¹ Many iko ihwania eniama hohoi bwo fe ebwoto. Ebeŋ hohoi ewon iko aboŋojin, abahye isi hohoi bwo fe obeŋ amaji jihohoi imanyari. ¹² Egyama hohoi egyama ta ahas hohoi. Al omorye isi hohoi, emojo hohoi Hollum ihaniere on oyyu jihosi. Al ittigemye isi hohoi, edihu hohoi. ¹³ Al itisyahai isi hohoi, etarraŋ hohoi ta anyalami. Era hohoi ihwa eboti ono afau bwo fe eboti on oryeye laati many iko ihwania. ¹⁴ Abeŋ ni egyoro erre huna itiloririjyere itai, ati esiŋyo ni itai ihwa aduri hoŋ hul amuno ni. ¹⁵ Nyo dwadi iwanata tai iko ettiyanak alif ’tomon hulo Kristo, ara ni abotye monyatai. Nyo to Yesu Kristo attu ni rahan amonye hatai ta asayyo hun oyiji’to. ¹⁶ Elolya ni jihatai, jo oŋida irata ahejifak hoŋ. ¹⁷ Te eram ana efak ni jihatai Timoteo al ara’to lonyi hoŋ to Hobu, ol obi hwan, al amuno ni. Ottu adi inyi itagiluniere itai ehanita hoŋ to Kristo, ihwa ettiyenio ni imasik daŋ bwo iklesyahyen daŋ. ¹⁸ Itadarai omuk hulatai hul ojori jo abeŋ ni attu. ¹⁹ Ati kuyya ara awahan ono Hobu attu adi ni kokwak. Attu adi ni mijana kuyya owon adwaran jyo etadarak hulya, kuyya bu arai ekyanita hosi asai. ²⁰ Nyo obeŋ olobye ono Hollum owotya te ekyanita ati owotya inyi ta adwaran. ²¹ Anyo an inyimuna tai? Attu adi ni jihatai iko alyoto kuyya bu ta namuno iko ta anyalami taji?