Angati 5

1 Ahode ojori owoni erre somon ihiji hatai bwo ara asomon on orroho bebe on obeŋ onyurani ihiji paganohyen, nyo amanya obo atulo iko ŋorwoi monyonyi. 2 Bwo itadarati tai. Ati ibyaŋata tai itarihati many iyarik lya al ihanio’to ariŋ ana t’ehiji hatai addi. 3 Nyo dwadi abeŋ ni ikatai ta ahwan hoŋ awon ni ikatai to oloyiri hoŋ, bwo fe ta afure ono Hobu Yesu aŋot ni eram ono atulo alya ihwania ihwa awon ni ikatai. 4 Al ittubati tai arabotye bwo owon oloyiri hoŋ ikatai iko adwaran ono Hobu Yesu, 5 oŋida isyatta atulo alya ihas Sitan hetetatturo ewahiti hwan honyi, jo oŋida oloyiri honyi italahuni iholoŋ ono Hobu Yesu. 6 Obeŋ etadara hatai oyyu. Ibyaŋata tai imijana jo abula hun omutari’to itayafuni emune daŋ? 7 Iyara abula amarwahi addi jo oŋida irata tai emune aŋejuk on obeŋi bula ahode. Nyo oŋoti nya Kristo tohohoi, inyi aker olo ehuma hohoi. 8 Tania ijara hohoi daŋ eŋiyo akarama ta namuno, obyaŋara ta abula hun imarwahi hun arai ihwa aliwari iko arrohoji ati te emune on obeŋi bula an ara ihwa ayiji iko nelahode. 9 Egyoro ni jihatai ta awaraga hoŋ jo hebalati iko aati eruhok hul ihanie erre somon. 10 Ati abeŋ ni ekyana jo, hebalati iko paganohyen hul ihanie erre somon iko hul iŋaruji’to, iko hul ohorotye’to, bwo hul itahabuye arrijorihyen; nyo kuyya ibyaŋata tai itoŋoti iko laati ihwo hulo obeŋ obo amaji jihatai ifau. 11 Ati egyoro ni jihatai ihwania jo kuyya owon obo ol ojo ara inyi aheruhoni bwo ihanio inyi erre somon, kuyya iŋaru inyi, kuyya itahabuyo inyi arrijorihyen, kuyya omoryo inyi laati, kuyya oruma inyi, kuyya ohorotyo inyi, oŋida ibyaŋata tai ibalati ikonyi bwo fe heŋiyete ikonyi. 12 Ara inyi eram hoŋ iŋocere laati ilet? Obeŋ. Ara eram hatai iŋocere laati huttotwa klesya. 13 Bwo oŋot adi Hollum laati hutto let. Tania ifuhara atulo ol orroho’to t’eluluŋ hatai addi.