¹ Ati illarak hoŋ, abeŋ ni aremik ikyana jihatai ihwa laati hul owoni iko Oloyiri, ati oŋida ekyana ni jihatai ihwa laati hul owoni iko egigilita huno afau. Irata dwadi itai ihwa olodolyo jyo Kristo. ² Etamaco ni itai ta ale, abeŋ ni esyo jihatai eriŋo nyo ittallihoto tai ifwotuna inyi many iko ihwania. ³ nyo herasati tai iko egigilita huno afau. Kuyya al awon ahaini iko aŋalafa ihiji hatai, ibyaŋata tai iwanata so iko egigilita huno afau? Ibyaŋata tai idahati ihwa laati? ⁴ Nyo al ojo obo jo, Ani olo Paulo, bwo obo ojo, Ani olo Apolo, ibyaŋata so itai irata ihwa laati hutta fau? ⁵ ŋai ati Apolo? Bwo ŋai Paulo? Era hohoi legyamak bwo egyama hohoi ababo ihwa isyo Hobu jihohoi bwo te ettiyenita hohoi iruhoto tai. ⁶ Edulak nya ni bwo ijuhok Apolo aari, ati ara Hollum al itabolororo’to isi. ⁷ Tania obeŋ etahabuyo owon jyo lya al idulak’to, kuyya bu jyo lya al ijuhok’to aari, ati owon jyo Hollum al itabolororo’to isi. ⁸ Ihwania edulani iko ejuhoni hari igyamai arabotye, bwo ifwotuni adi isi daŋ ababo edumit hosi on osiru te egyama hosi. ⁹ Nyo era hohoi ahegyamak arabotye iko Hollum bwo irata tai ihwa amana Hollum. Irata tai bwo fe ihwa aji ono Hollum. ¹⁰ Ihwa isyo Hollum amehino jihoŋ, aduhok nya ni etteri lohitir to ofyoro ati oduhok obo atulo ihide honyi. Ijara laati daŋ ihumi mijo aŋai oduhoi isi. ¹¹ Nyo obeŋ obo atulo oremik duhonia obo etteri lohitir arari ninya oduhoni. Ara Yesu Kristo ihwa etteri lohitir ania. ¹² Oremik atulo duhonia ihide etteri lohitir ta ayyel, kuyya abilat, kuyya onoroi hun opipyahi’to, kuyya abau, kuyya ejuti, kuyya abahala. ¹³ Oleye adi egyamita wati ababo iholoŋ ono aŋoco. Oleye adi isi te eema nyo okemyo adi eema egyamita wati ababo imijyere arai isi ihwa anyo. ¹⁴ Kuyya arasa egyama ono obo atulo an igyama inyi ihide etteri lohitir, ifwotu adi inyi edumit. ¹⁵ Ati kuyya oswaharo egyama ono obo atulo, olitohi adi edumit honyi. Italahuni adi atulo alya ati ara ihwa ottu inyi to hima. ¹⁶ Ibyaŋata tai imijana jo irata tai aji ono Hollum bwo amanya Oloyiri olo Hollum itwajin hatai? ¹⁷ Kuyya itarroho obo atulo aji ono Hollum itattur adi Hollum inyi. Nyo olibo aji ono Hollum bwo irata tai aji ania. ¹⁸ Helaha obo atulo inyobyo ahwan honyi. Kuyya igigilo obo ihiji hatai jo elofyoro inyi te erre huno afau ana, ijara inyi hetera do olosita bwo ihalu ottu rahan atulo ofyoro. ¹⁹ Ibuyaŋai ofyoro huno afau ana to hoŋite Hollum. Nyo igyoroni ojo, “Inef inyi alofyorojok to ofyoro hosi.” ²⁰ Igyoroni bwo fe jo, “Omijak Hobu egigilita huno alofyorojok jo arai isi asai.” ²¹ Tania helaha obo atulo itadara ta laati, nyo isyo Hollum erre daŋ jihatai. ²² Isyo inyi Paulo iko Apolo bwo Kefa ittiyeniere itai. Isyo inyi afau daŋ iko nesu bwo naye iko erre huno ihwania, kuyya bu hun ofwonni adi, arai isi daŋ ahunatai. ²³ Bwo irata tai ahulo Kristo bwo ara Kristo olo Hollum.