¹ Bwo ani illarak hoŋ, ninya attuniere ni jihatai abeŋ ni attu ikyanari asayyo huno Hollum te ekyanita huno olofyoro. ² Nyo abeŋ ni awak ikyanari omuk erre ihiji hatai arari eram ono Yesu Kristo linya isihoni. ³ Awon nya ni ikatai ta nelihi, iko ta abaŋi, bwo ekikiro on obolo. ⁴ Bwo fe obeŋi nya ekyanita hoŋ iko ettiyenita hoŋ arai ahuno olofyoro wati, ati itahutani isi Oloyiri iko adwaran, ⁵ jo oŋida obeŋ neruk hatai owotya to olofyoro wati, ati ta adwaran ono Hollum. ⁶ Ati ekyana hohoi ekyanita huno olofyoro ihiji wati hul obolo neruk hosi, ati obeŋi bu isi arai olofyoro huno afau ana kuyya bu huno eleittaha hulo afau ana nyo oyei adi isi. ⁷ Ati ekyana hohoi ofyoro huno Hollum hunya idimani. Isi hunia, jo many t’etteri fau awak Hollum italahuniere hohoi. ⁸ Obeŋi nya eleittaha hulo afau ana omijani eram ana, kuyya omijani nya isi, obeŋi nya bu isi isihoni Hobu olo akwatan. ⁹ Ati ihwa igyoroni, “Obeŋ obo onyek igonyu bwo obeŋ obo eyyok itaniŋu, Bwo obeŋ obo ataji igigilo Erre hun ihuhumak Hollum to hya hul omunoi’to inyi.” ¹⁰ Ati italeyeu Hollum isi jihohoi to Oloyiri honyi, nyo ottifya Oloyiri erre daŋ dwadi erre hun ogoli’to huno Hollum. ¹¹ Nyo ŋai tehiji wati ol omijak’to egigilita tulo arari oloyiri tulo on owon itwa honyi? Ihwo nya obeŋ tulo omijak egigilita huno Hollum arari Oloyiri olo Hollum. ¹² Ebeŋ bwo fe hohoi efwotu oloyiri ono afau ati efwotu hohoi Oloyiri ol ottu’to jyo Hollum jo oŋida hohoi emijak esyorita arryai hun isyo Hollum jihohoi. ¹³ Ekyana hohoi erre huna te ekyanita hun itahutak hohoi Oloyiri obyaŋarai isi ekyanita huno ofyoro wati, jo oŋida laati hul owoni iko Oloyiri omijani erre huno Oloyiri. ¹⁴ Ati atulo ol obeŋ’to owon iko Oloyiri obeŋ bu inyi ifwotu erre huno Oloyiri olo Hollum, nyo arai isi erre hun ofyahaji’to jihonyi. Obeŋ bwo fe inyi oremik mijana isi arari Oloyiri itahutak isi jihonyi. ¹⁵ Ati alya ol owon’to iko Oloyiri oremik mijana erre huna daŋ ati obeŋ tulo omijak erre hutto taji honyi. ¹⁶ Nyo ihwa igyoroni, “Ŋai ol omijak’to egigilita huno Hobu? Ŋai al ittiyenio inyi obo ariŋ?” Ati ewon hohoi iko egigilita huno Kristo.