¹ O joo Lahitok diho Moses, ² "To teny diho cio kulo Israel tijio, 'Ka li pal lobo tungani ara na lida o fik ara lo atii, i tiyi tohi na li iti dwara iyo cik lo Lahitok. ³ Ka li pal kadwarani na lo twei, i yauno loguce iyo cio. O jir inyi i yauno mongo na lo ngarihi diho Lahitok na lo ru lofunya ara kiciorita lo kipal to kipal na li tiyi inyi. ⁴ O jir inyi i yauno na mongo agwala lo kema lohiricore i fotohi ketemoni lo Lahitok. O jir inyi o fik kac kunenge kue nenge oto hati o ngotohi inyi inyia ketemoni lo Lahitok. ⁵ Tinyia o jir kadwarani na lo twei o dumu lobo okoto lo na mongo o rutorore kema lohiricore. ⁶ O jir inyi i lutohi kafiele nenge katua lo na okoto o rwac iyo ketemoni lo Lahitok kakeny mietare ken lo kyela kigenit lo faji na i Nyu. ⁷ Oto hati kadwarani i juhohi okoto lobo iyo muriaha kulo ciali lo iheru na lo ngon ketemoni lo Lahitok katua lo kema lohiricore. Otonge lo okoto lo na mongo fad o jir i juhohi fotiri lo ciali locurare lo kiciorita na lo ngon ketemoni lo agwala lo kema lohiricore. ⁸ O jir inyi o wadu somia fad iyo na mongo lo kiciorita lo kipal, somia fad na lo bubur sangite kulo katua lo kocehe, ⁹ talangur are fad ko somia na lo bubur icieng fad na lo nyiha ko irafu ko opei lo munya na li tiimuni ara lobito ko talangur ¹⁰ iya na lo dumaritarehin somia iyo kiciorita lo kimoraru. Oto hati kadwarani o curahi icieng kai lo ciali lo kiciorita. ¹¹ Ati cioni lo na mongo ko tyang nenge fad ko kue ko kejuha ko monyi, ¹² sangite kulo ken lo na mongo kula kude fad o jir inyi i yaru oleng to katua lo kem iya faji na li iti nyuji na lara lokuroni lo ingula o jir o curahi inyi ijia kai lo ingula. ¹³ Ka li pal ilulung lo cio kulo Israel fad kipal na lida ara lo atii, i tiyi tohi na na lo beru cik lo Lahitok, kileng ngida ilulung o yen na tenya ara icieng kapalak. ¹⁴ Ka lo fwonu icieng o yen kipal neicieng, o jir ilulung i yauno mongo na lo rihe o ngarihi ara kiciorita lo kipal, i totorohini ketemoni lo kema lohiricore. ¹⁵ O jir lohitwaha kulo cio o fik kac kuneicieng kue lo na mongo to ketemoni lo Lahitok manyu o ngotohini na mongo inyia ketemoni lo Lahitok. ¹⁶ Oto hati kadwarani na lo twei i yaru lobo okoto lo na mongo o rutorore kema lohiricore. ¹⁷ I lutohi cia inyi kafiele iyo na okoto o rwace ketemoni lo Lahitok iyo kigenit kakeny mietare. ¹⁸ O jir i juhohi lobo okoto iyo muriaha kulo ciali na lo ngon ketemoni lo Lahitok iyo kema lohiricore. Otonge lo okoto fad o jir i juhohi fotiri lo ciali locurare lo kiciorita na lo ngon ketemoni lo kema lohiricore. ¹⁹ O jir inyi o wonyu somia na lo ngon katua nenge fad o curahi kue lo ciali. ²⁰ O jir i tiyore ene mongo iya na li tiyore mongo lo kiciorita lo kipal token. Tona, oto cia kadwarani o caf icieng oto manyu o launi icieng l. ²¹ Oto cia inyi i yaru na mongo oleng to kem o loo o cure iya na lo curarore inyi lo ketemoni. Ara ene mongo kiciorita lo kipal lo ilulung. ²² Ka li pal kaboloroni lolunyaje, manyu i tiyi lobo tohi na lo beru cik lo Lahitok Lobanga nenge, lo cifu inyi loguce. ²³ Ka lo lotu inyi o yen kipal nenge, o jir i yauno kore ara kiciorita lo kipal nenge na lo ru madati. ²⁴ o jir inyi o fik kac kunenge kue lo na kore manyu o ngotohi inyi faji na lo ngotorehin kiciorita ketemoni lo Lahitok. Ara na kiciorita lo kipal. ²⁵ O jir kadwarani o dutu lobo okoto lo na kiciorita lo kipal to kafiele nenge o twehi muriaha kulo ciali locurare lo kiciorita, i juhohi hati otonge lo okoto fotiri lo ciali lo cura lo kiciorita. ²⁶ O jir inyi o curahi somia nenge fad ciali iya na lo curare kiciorita lo kiciorita lo kimoraru. Tona o caf cia kadwarani kipal lo na tungani oto cia o launi inyi. ²⁷ Ka li pal lobo tungani to kiji lo ilulung lolunyaje, manyu i tiyi lobo tohi lo beru cik lo Lahitok, lo cifu inyi loguce. ²⁸ Ka lo lotu inyi o yen kipal nenge, o jir inyi i yauno kiciorita lo kipal na li pal inyi, kine botor na lo ru madati. ²⁹ O jir inyi o fik kac kunenge kue lo na kine oto hati o ngotohini longotore lo kiciorita locurat. ³⁰ Oto hati kadwarani o dutu lobo okoto to kafiele nenge o twehi muriaha kulo ciali locurare lo kiciorita manyu i juhohi otonge lo okoto fotiri lo ciali locurare lo kiciorita. ³¹ I ngohi inyi to dumu somia fad iya na lo dumarorehin somia iyo kiciorita lo kimoraru o jir kadwarani o curahi ciali ara na li iti kwama uron nenge Lahitok, tona o pul cia kadwarani inyi manyu o launi cia inyi. ³² Ka li yauno inyi kito lo ker ara kiciorita lo kipal nenge, o jir i yauno botor na lo ru madati. ³³ O jir inyi o fihahi kac kunenge kue nenge o ngot hati ara kiciorita lo kipal faji na lo ngotorehin kiciorita kuna lo curati. ³⁴ Tinyia o jir kadwarani o dutu lobo okoto lo na kiciorita lo kipal to kafiele nenge o twehi muriaha kulo ciali lo cura lo kiciorita, i juhohi otonge lo okoto fotiri lo ciali lo cura lo kiciorita. ³⁵ O jir inyi o dumu somia fad iya na lo dumunitarehin somia iyo kiciorita lo kimoraru, manyu o jir kadwarani o curahi ciali kai lo kiciorita na li fotohini Lahitok to kima. Tona o pul cia kadwarani inyi iyo kipal na li tiyi inyi manyu o launi cia kipal nenge.