1 Ka lara kiciorita nino kiciorita lo kimoraru, ito hati isi i cio kiteng mongo kode botor, o jir isi i cio diho Lahitok kiteng na lo ru lofunya to ken. 2 O jir isi i fik kac kunino kue lo kiciorita nino i ngotohi inyi agwala lo kema lohiricore. Oto hati kadwarak tee kulo Aron o rwacahi okoto nenge ngatihin fad kulo ciali. 3 Iyo kiciorita lo kimoraru o jir i yauno daha lo ki cwara diho Lahitok; sangite kulo katua lo kocehe ko somia fad na lo bubur icieng, 4 talangur are fad fad ko somia na lo bubur icieng na lo nyiha ko irafu, ko opei lo munya na lo jir i tiimu ara lobito ko talangur. 5 Oto hati tee kulo Aron ko curahino kai lo ciali kai lo kicioriti locurat na lo ngon kai lo keyek kulo kima kuna lo daha kima, ara inyi daha kiciorita na li iti kwama uron nenge Lahitok. 6 Ka li cwara isi kiciorita nino to twol lo kiri kode kera ara kiciorita lo kimoraru diho Lahitok, o jir isi i cio kore, mongo lo ker kode botor na lo ru lofunya to ken. 7 Ka li cwara isi kito lo ker o jir i fotohi ketemoni lo Lahitok, 8 i fik kac kunino kue nenge ito i ngotohi agwala lo kema lohiricore. Oto hati tee kulo Aron o rwacahi okoto nenge ngatihin kulo ciali. 9 Iyo na kiciorita lo kimoraru o jir i yauno daha lo ki cwara diho Lahitok; somia nenge ko tima na lo ngutuni many to lohirici lo komoc, sangite kulo kocehe fad ko somia na lo bubur icieng fad, 10 talangur are fad ko somia na lo bubur icieng o nyiha ko irafu, ko opei lo munya na lo jir i tiimu ara lobito ko talangur. 11 O jir kadwarani o curahi icieng ciali ara daha lo ki cwara na li fotohini diho Lahitok. 12 Ka lara kiciorita nino kine o jir isi i fotohi ketemoni lo Lahitok, 13 to fik kac kunino kue nenge, i ngotohi hati ketemoni lo kema lohirimorare. Oto hati tee kulo Aron o rwacahi okoto nenge ngatihin kulo ciali. 14 Iyo na kiciorita nino o jir isi i cio ene kicwara lo daha diho Lahitok; sangite kulo katua lo kocehe ko somia na lo bubur icieng. 15 talangur are fad ko somia na lo bubur icieng o nyiha ko irafu ko opei lo munya na lo jir i tiimu ara lobito ko talangur. 16 O jir kadwarani o curahi icieng ciali ara daha kiciorita na li iti kwama uron nenge, ara somia fad lo Lahitok. 17 Ara ene itidwar na lo sio to kofiang fad kuna li jifita, fajihit fad kuna li manyare ite o jir ite ida i nyia lobo somia kode okoto.