¹ Ka li yauno lobo tungani kiciorita lo ngamang diho Lahitok, o jir kiciorita nenge ara kofwo kuna i tinyaha. O jir inyi i juhohi ngoroni, manyu o fik iheru katua ² i yaru hati diho tee kulo Aron kadwarak. O jir kadwarani o ngonyu kuna kofwo li karuto to ngoroni ko iheru i fut kana o curahi ciali ara kiciorita kitiiunita, kiciorita na li fotohini diho Lahitok to kima na li iti kwama uron nenge Lahitok. ³ Kuna kude kofwo fad ara kulo Aron ko tee kunenge ara kiciorita na i nyu noo na li fotohini Lahitok to kima. ⁴ Ka li yauni kiciorit lo ngamang na lo funi to furnuk lo mugati, o jir ara na li tiyi to kofwo kuna i tinyaha lido, kode mugati kuna isisihi kuna lo funi o ru ibula to katua ida manyu i karuti to ngoroni lo oliv, kode kuna i gereweha ida i karuti to ibula ati o lilingi to ngoroni lo oliv. ⁵ Ka lara kiciorita lo ngamang kunino lo mugati kuna lo feji to tobok lo biliet, o jir i tiyi to kofwo kuna i tinyaha lido kuna li karuti to ngoroni ati o ru ibula. ⁶ To culuyuk ito hati i juhohi ngoroni, ara kiciorita lo ngamang. ⁷ Ka lo ngoji kiciorita lo ngamang kunino to ongojit, o jir ara to kofwo kuna i tinyaha lido ko ngoroni lobo. ⁸ I yauno kiciorita lo ngamang kuna li tiyi to kuno sangite iyo Lahitok, i fotohi diho kadwarani o jir i yaru ciali. ⁹ O jir inyi o dumu lobo iyo kiciorita ara ki iti iyita o curahi kai lo ciali ara daha kiciorita na lo curahini na i ur iti kwama Lahitok. ¹⁰ Beciek lo kuna kiciorita kulo ngamang ara kulo Aron ko tee kunenge tonyio ara daha na i nyu noo na li fotohini diho Lahitok. ¹¹ Kicioriti kulo ngamang fad kuna li yauno ite diho Lahitok, o jir i tiyi o ru ibula tonyio o jir ite ida i curahi ibula kode otoro iyo daha na li cwarati diho Lahitok. ¹² I tum ite ki fotohino ara kiciorita kulo kwama lo denguno ati o jir ida i fotohini ara kiciorita locurat kue lo ciali na li iti kwama uron nenge Lahitok. ¹³ Iti jijimata kiciorita kuningi fad to balang. Ke ngohi balang lo ciharu lo Lobanga ningi iyo kiciorita lo ngamang kuningi, iti fik balang iyo kicioriti kuningi fad. ¹⁴ Ka li yauno ite kicioriti ngamang kulo daha ngejuk diho Lahitok, i yaunoti ngamang kuna lo siduni i bonyi manyu o feji to kima. ¹⁵ To fik ngoroni ko iheru katua, ara na kiciorita ngamang. ¹⁶ O jir kadwarani o curahi ngati lo kuna ngamang li bonyi, ko ngoroni ko iheru fad ara daha na li ciori diho Lahitok.