¹ Ka li pal tungani to buhorore tohi na lo tenyati o ning inyi o deu manyu o yen, ida hati o tulu, ara kipal nenge. ² Kode ka lo tir tungani lobo tohi i dwa, kode tyang na i dwa lo mwang kode lo kang kode tohi na lo kudita to kof kileng ngida o yen, i rumu inyi li bot manyu lo cifu loguce. ³ Kode ka lo tir lobo tohi i dwa to ken lo tungani kode lobo tohi na ngo tum ki iti bota inyi kileng ngida inyi o yen, ka lo lotu inyi o yen to kifwongi o lotu cia loguce i nief inyi. ⁴ Kode ka li buti tungani to dataru ara na lo cik ki tiyo lobo tohi i jir kode na i rohoi to tenya na li butia tungani to dataru lolunyaje, ati ka lo lotu inyi o yen, lo cifu inyi loguce. ⁵ Ka lo cifu tungani lobo loguce to kuno kikoihin, o jir o tulu kikoi na li palare inyi ⁶ manyu ara kidumi lo kipal na li tiyi inyi, o jir inyi i yauno diho Lahitok kito lo ker kode lo kine botor to twol nenge ara kiciorita lo kipal o lotu kadwarani o pul kipal nenge. ⁷ Ka lida inyi o tum rumuno kito lo ker, o jir inyi i yauno kurihin are kode amami are diho Lahitok ara kitobita lo kipal nenge ara lobito kiciorita lo kipal, lobito kiciorita locurat. ⁸ O jir inyi i yauno icieng diho kadwarani o jir re i tem ki cwara lobito ara kiciorita lo kipal. O jir inyi i niru kue nenge to murut ida hati o ngote tur, o jir ⁹ o rwacahi okoto nenge ngatihin kulo ciali, otonge lo okoto nenge o jir i tiijahi fotiri lo ciali. Ara inyi kiciorita lo kipal. ¹⁰ Oto hati kadwarani i cio na bito ara kiciorita locurat iya na li iti mohunorehin o jir o pul inyi to kipal na li tiyi inyi, oto cia o launi inyi. ¹¹ Ati ka lida inyi o tum rumuno kurihin kode amami are, o jir inyi i yauno lokirie lo kofwo kuna i tinyaha lobito ara kiciorita lo kipal nenge. O jir inyi ida i karut to ngoroni kode iheru tonyio ara na kiciorita lo kipal. ¹² O jir inyi i yauno diho kadwarani o ngonyu kana lobito ara kitiiunita o curahi kue lo ciali iyo kiciorita kuna lo curahinoti to kima diho Lahitok. Ara na kiciorita lo kipal. ¹³ To na kikoi, o pul cia kadwarani inyi to kuno kipalipali li tiyi inyi oto cia o launi inyi. Otonge lo kiciorita fad o jir ara lo kadwarani iya na lo ngonore to kiciorita lo ngamang. ¹⁴ O teny Lahitok diho Moses o joo, ¹⁵ "Ka li iti bahas tungani lolunyaje i pal to tenyitenyi kuna lo cihi iyo sangite kuna i nyuji, o jir inyi i yauno diho Lahitok mongo lo ker na lo ru madati to twol nenge ara kidumita na manyu lo tumohino wel nenge iyo rial na lo tumohino ko sekel na lo temitarehin to faji na i Nyu. Ara inyi kiciorita lo loguce. ¹⁶ O jir inyi i cio kidumi to tohi na lida inyi i tiyi na li jifita sangite kuna i nyuji o sodohi manyu kitimieti lo tomon iyo na i cio fad diho kadwarani, na lo pul inyi to mongo lo ker ara kiciorita lo loguce oto cia o launi inyi. ¹⁷ Ka li pal tungani manyu i tiyi tohi na lo beru cik lo Lahitok, kileng manyu adi ngo lunyia inyi, lo cifu inyi loguce manyu i niefita na tenya inyi. ¹⁸ O jir inyi i yauno mongo lo ker na lo ru madati diho kadwarani ara kiciorita lo loguce na lo cam to wel. To na kikoi o pul cia kadwarani inyi to kipal na li tiyi inyi lolunyaje, manyu o launi cia inyi. ¹⁹ Ara na kiciorita lo loguce, tonyio o cifu inyi loguce lo ki pala diho Lahitok.