¹ O joo Lahitok diho Moses ko Aron, ² "I to tenyati ko cio kulo Israel iti joo diho icieng: Ko lo yit lobo tohi to ken lo tungani, ida yitan o nyu. ³ Kode i tiringa kitihita to ken lo tungani kode i gurahino, i cio cia inyi ida o nyu. Kikoi na li yaunore na yitan ida inyi o nyu ene: ⁴ Lobo kigeti lo getohino tungani na lo yit ken ijia ida o nyu, manyu lobo tohi li tongore inyi ida o nyu. ⁵ Tungani na lo tir kigetita nenge o jir i lal kyelani kunenge, i lala to kifi manyu i wasihi inyi ida o nyu many kurou. ⁶ Tungani na li tongohino iyo tohi na li tongore tungani na lo yit lobo tohi to ken, o jir i lal kyelani kunenge, i lala manyu inyi to kifi ati i wasihi cia inyi ida o nyu many kurou. ⁷ Tungani na lo tir tungani na lo yit lobo tohi to ken, o jir i lal kyelani kunenge i lala manyu to kifi ati i wasihi inyi ida o nyu many kurou. ⁸ Ka lo mitahi na tungani lo yit lobo tohi to ken kamilak ken lo lobo tungani i nyu, o jir na tungani i lal kyelani kunenge i lala manyu to kifi ati i wasihi inyi ida o nyu many kurou. ⁹ Lobo tohi keken li tongore lerok ka li feita to lakweny ida o nyu. ¹⁰ manyu lobo tungani lo tir tohi na lo orumu o ngon fotiri lo na tungani i wasihi cia ida o nyu many kurou; tungani na li numu kuna sangite o jir i lal kyelani kunenge, i lala manyu to kifi ati i wasihi inyi ida o nyu many kurou. ¹¹ Lobo tungani lo tir tungani na lo yit lobo tohi to ken ida i loloj kac to kifi o jir i lal kyelani kunenge manyu i lala to kifi ati i wasihi inyi ida o nyu many kurou. ¹² Moti lo kifi na lo tir na tungani o jir o borari manyu ka lara lobo tohi li kukumuni to kete, o jir i loloji to kifi. ¹³ Ka li iti nyujori tungani to yitan nenge, o jir inyi i ken faritin mietare kulo kitinyujo inyi. O jir inyi i lal kyelani kunenge, i lala to kifi kuna i libi oto cia inyi ko nyujon. ¹⁴ To far lo mietauni o jir inyi o dumu kurihin are kode amami kuna lo ngarihi are o lotunore ketemoni lo Lahitok agwala lo kema lohiricore i ciorihi icieng diho kadwarani. ¹⁵ O jir kadwarani i fotohi icieng; lobito ara kiciorita lo kipal, lobito ara kiciorita locurat. To na kikoi o pul cia inyi na tungani to ketemoni lo Lahitok iyo yitan nenge. ¹⁶ Ka li palu tungani retoni kula kulo otomone, o jir i lal ken nenge fad to kifi ati i wasihi ida o nyu many kurou. ¹⁷ Lobo kyela kode cioni na lo dohi kula kulo otomone ijia o jir i lali to kifi ati i wasihi ida o nyu many kurou. ¹⁸ Ka lo geto ngorwani ko retoni i juhoro kula kulo otomone o jir icieng fad i lala to kifi ati i wasihi icieng ida o nyuji many kurou. ¹⁹ Ka lo deya ngorwani ofa, i wasihi cia inyi ida o nyu to okoto nenge to faritin mietare. Manyu tungani na lo tir inyi i wasihi ida o nyu many kurou. ²⁰ Lobo tohi lo getore inyi kode lobo tohi li tongore inyi ida cia o nyu. ²¹ Tungani na lo tir kigetita nenge o jir i lal kyelani kunenge manyu i lala to kifi ati i wasihi ida o nyu many kurou. ²² Tungani na lo tir kitongi nenge o jir i lal kyelani kunenge manyu i lala to kifi ati i wasihi ida o nyu many kurou. ²³ Kode ka lara kigeti kode kitongi o tir lobo tungani, i wasihi na tungani ida o nyu many kurou. ²⁴ Ka lo geto tungani retoni ko inyi o tir hati okoto nenge inyi, ida cia inyi o nyu to faritin mietare; Lobo kigetita lo getore inyi, ida o nyu. ²⁵ Ka li juho okoto to ken lo ngorwani to faritin kuna i borengi ida ara okoto lo ofa nenge, kode o ngon ko yitan na lo gal faritin kulo ofa nenge, i wasihi cia inyi ida o nyu to faritin kulo na yitan lo okoto to ken nenge fad iya na lo ngonore to faritin kulo ofa nenge. ²⁶ Lobo kigeti lo getore inyi o rihe na yitan lo okoto nenge o sodoro, ida cia o nyu iya logetore nenge to faritin kulo ofa nenge manyu lobo kitongi li tongore inyi ida cia o nyu iya na lo ngonore to faritin kulo deya lo ofa nenge. ²⁷ Tungani na lo tir icieng ida cia o nyu, o jir i lal kyelani kunenge manyu i lala to kifi ati i wasihi ida o nyu many kurou. ²⁸ Ka li iti nyujori inyi to yitan nenge, o jir i kene faritin mietare to omot lo kuna faritin oto cia inyi ko nyujon. ²⁹ To far lo mietauni o jir inyi i yaru kurihin are kode amami kuna lo ngarihi i yauno diho kadwarani agwala lo kema lohiricore. ³⁰ O jir kadwarani i fotohi lobito ara kiciorita lo kipal, lobito ara kiciorita locurat. To na kikoi o pul cia kadwarani inyi to ketemoni lo Lahitok to yitan nenge na li ida inyi o nyujore. ³¹ O jir ite i ric cio kulo Israel iyo sangite kuna li cwara icieng ida o nyuji, o jir icieng ida o weiha iyo rujon lo nyujon to ki iti bota lomanyare nei na lo ngon kiji neicieng. ³² Ara kuno cihicihi to tungani na lo ngon ko yitan, to tungani na li ida o nyu to ki juhoro kula kulo otomone, ³³ to ngorwani na lo deya ofa nenge, to tungani retoni kode ngorwani na lo ngon ko yitan, ko to tungani retoni na lo geto ko ngorwani na li ida o nyu.