¹ O tenya Lahitok ko Moses to kifwongi lo wei lo tee kulo Aron are kuna lo weihi ketemoni lo Lahitok. ² O joo Lahitok diho Moses, "To rihohi rece nino Aron ke cio o lotunita iya na lo wahare inyi iya faji na i Nyu noo korwong lo kyela kigenit ketemoni lo seger lo kisa na lo ngon kai lo sanduk lo cik to de o wei cia inyi tonyio a lotunita nan to idis kai lo seger lo kisa. ³ Ara ene koditi na lo rutoritare Aron faji na i Nyu o jir o lotu ko mongo na lo ngarihi ara kiciorita lo kipal ko mongo lo ker ara kiciorita locurat. ⁴ O jir inyi i cief kanyi na i nyu na lara kyela iribi ko pali lo kyela iribi o raf ken nenge: o jir inyi o todohi gas lo kyela ken nenge manyu o pucahi turubuc lo kyela iribi kue. Ara kuno kyelani kuna i nyuji orumu re li lal ken nenge to kifi o rihe re ida li ciefohi icieng. ⁵ Iyo ilulung lo cio kulo Israel o jir inyi o dumu korecio are kiciorita lo kipal ko mongo lo ker ara kiciorita locurat. ⁶ O jir Aron i fotohi mongo ara kiciorita lo kipal nenge lo pulo ken nenge ko kaji nenge. ⁷ Tinyia i yaru hati kuna korecio are i fotohi Lahitok agwala lo kema lohiricore. ⁸ O jir inyi i bir tobotobo to kuna korecio are - lobito lo Lahitok ko lobito aviria. ⁹ I ngohi Aron i yauno kore na lo dohi tobotobo nenge ara lo Lahitok i fotohi ara kiciorita lo kipal. ¹⁰ Ati kore na lo urohino tobotobo nenge ara lo aviria, o jir i fotohini ara na i war diho Lahitok o jir i tiyorehin inyi ara lo pulo lo ilulung lo lahahino inyi o loo katua lo kuny ara kore lo aviria. ¹¹ I yauno cia Aron mongo ara kiciorita lo kipal lo pulo ken nenge ko kaji nenge, manyu o jir inyi o ngot mongo lo kiciorita lo kipal nenge to ken nenge. ¹² O jir inyi o dumu ilebu lo iheru na li fut katalange to ciali na lo ngon ketemoni lo Lahitok ko kac are kulo iheru na i nyidita manyu i karuto o loorore korwong lo kyela kigenit. ¹³ O jir inyi o fik iheru katua lo kima ketemoni lo Lahitok oto cia furo lo iheru i muhe seger lo kisa na lo ngon kai lo sanduk lo cik o jir inyi ida o wei. ¹⁴ O jir inyi i yaru lobo okoto lo mongo o loo o rwacahi ketemoni lo seger lo kisa to kafiele nenge oto hati to kafiele nenge o rwacahi ken lo seger lo kisa kakeny mietare. ¹⁵ O ngot hati inyi kore lo kiciorita lo kipal lo ilulung lo cio manyu i yaru okoto nenge korwong lo kyela kigenit o loo i tiyi iya na li tiyore to okoto lo mongo o loo cia inyi o rwacahi iyo seger lo kisa ko ketemoni nenge. ¹⁶ To na kikoi o pul cia inyi faji na i Nyu noo to kipal ko silan lo cio kulo Israel kileng ngara kipal neicieng nyio. O jir inyi i tiyi o ri ji to kema lohiricore na lo ngon iyo icieng kiji lo rujon lo nyujon neicieng. ¹⁷ O jir cio o ru to kema lohiricore many to rutoro Aron faji na i Nyu noo many o rutu oleng lo looro pulo ken nenge, kaji nenge ko ilulung lo cio kulo Israel fad. ¹⁸ Oto hati o rutu o lotu ciali na lo ngon ketemoni lo Lahitok manyu o pul inyi. I yaru cia inyi lobo okoto lo mongo ko lo kore o loo o fik iyo muriaha kulo ciali fad. ¹⁹ O rwacahi cia inyi lobo okoto kakeny mietare iyo ciali lo ki iti nyujo inyi ko fiaru inyi iyo kipal lo cio kulo Israel. ²⁰ Langun lo keru Aron pulo faji na i Nyu noo, kema lohiricore, ko ciali, i yauno cia inyi na kore bito i war. ²¹ O jir inyi o fik kac kunenge fad kue lo na kore i war manyu o tulohi rohojun ko silan lo cio kulo Israel fad ko kipalipali kuneicieng pili o fik kue lo na kore i war. O cule cia inyi na kine katua lo kuny iyo kenga lo tungani na lo nyumuni to na tic. ²² O tingoro cia na kore kipalipali kuneicieng iya faji na i loma o jir na tungani o rihoro inyi o loo o lahahi katua lo kuny. ²³ Tinyia o jir Aron o rute katua lo kema lohiricore o loo o puce kyelani iribi kulo adi li cief inyi o rihe ida o rute faji na i Nyu noo o jir inyi o ngerihi icieng ijia. ²⁴ O jir inyi i lal ken nenge to kifi to katua lo faji na i Nyu oto hati i ciefohi kyelani kunenge kulo tiktik. O jir hati inyi o rutu i fotohi kiciorita locurat lo ken nenge ko kiciorita locurat lo cio lo pulo ken nenge ko kenite kulo cio. ²⁵ O curahi manyu inyi somia lo kiciorita lo kipal kai lo ciali. ²⁶ Na tungani lo lahahi kine ara kore lo aviria o jir i lal kyelani kunenge manyu i lal ken nenge to kifi, langun lo keru o tum inyi lotuno katua lo kem. ²⁷ Mongo ko kore lo kiciorita lo kipal na li yari okoto neicieng katua lo faji na i Nyu noo o pulorehin o jir i yari iya oleng to kem; cionitok, tyangi ko monyi kuneicieng o jir o curari. ²⁸ Na tungani lo cur icieng o jir i lal kyelani kunenge manyu i lala to kifi, langun lo keru o tum inyi rutuno katua lo kem. ²⁹ O jir ene i tongo ara itidwar lo tur diho ite, far lo tomon lo ofa lo mietare o jir ite i toyo to mejun lo taulo ida i tiyi lobo tic kode tungani na lo tomonohini kiji ningi kode misiohoni kamanyani kiji ningi - ³⁰ tonyio ene far ki puloti cia ite lo kitinyujo ite, ito cia ite i nyuji iyo kipalipali kuningi fad to ketemoni lo Lahitok. ³¹ Ara Sabit lo kiyoma o jir ite i toyo to mejun lo taulo ara itidwar lo tur. ³² Kadwarani na li kweri manyu o twei lo lunyon faji lo apa nenge ara kadwarani na hitok o jir ara inyi lo pulo. O jir inyi i cief kyelani iribi kuna i nyuji ³³ manyu o pul faji na i Nyu noo, kema lohiricore, ko ciali, ko kadwarak kula kude ko cio pili kulo Israel. ³⁴ O jir ene ara itidwar lo tur iyo ite: o jir o puli kipalipali kulo Israel fad kakeny lobito iyo kari." Manyu o fwonuni i tiyi iya na lo cihare Lahitok.