¹ O joo Lahitok diho Moses, ² Ara kuno cihicihi kulo itidwar lo tungani kamwani to far na li iti nyujorehin inyi ka li yauni diho kadwarani. ³ O rute kadwarani oleng to kem o loo o her inyi. Ka lo furie tungani iyo mwai lo ken na li iti diho, ⁴ o cik cia kadwarani o joo o jir kweny kuna i nyuji kuna i wari are i yauni ko kete lo ciani ceda ko usi na imalang ko lodwa i yauni to tungani na li iti nyujoti. ⁵ Oto hati kadwarani o cik o joo o jir i fadari lobito kwenyite to kai lo kifi kuna i libi iyo moti lokulufi. ⁶ Oto hati inyi o dumu na kwenyite bito i war i lutohi ara lobito ko kete lo ceda ko usi na imalang ko lodwa katua lo okoto na li iti yijahini iyo kifi kuna i libi to katua lo moti lokulufi. ⁷ O jir inyi o rwacahi kuna kifi li karuto ko okoto kakeny mietare ken lo na tungani orumu lo mwai mwai lo ken na li iti diho manyu o tulu o joo lo nyu inyi. O jir dong inyi o lahahi na kwenyite i war oleng faji na i wang. ⁸ O jir na tungani li iti nyujoti i lal kyelani kunenge, o gite fofi kunenge fad manyu i lala to kifi oto cia inyi ko nyujon. To kifwongi lo ene o tum inyi lotuno katua lo kem ati o jir i tongo sita lo kema nenge faritin mietare. ⁹ To far lo mietare o jir inyi o gite fofi kunenge fad; o jir o gite kue, musula, lokoir kulo konyeha ko fofi kuna kude to ken nenge fad. O jir inyi i lal kyelani kunenge manyu i lala to kifi oto inyi ko nyujon. ¹⁰ To far lo mietauni o jir inyi i yauno tee kulo kera mongi are ko botor lobito kuna lara kari lobito kuna lo ru madati ara lobito ko kofwo kuna i tinyaha lokiriehin uni kuna li karuto to ngoroni ara kiciorita kuna lara ngamang ko ngoroni na lo tum cupa lobito. ¹¹ Oto hati na kadwarani lo tulu na tungani o joo lo nyu i fotohi inyi ko kiciorita kunenge ketemoni lo Lahitok iyo agwala lo kema lohiricore. ¹² Oto hati kadwarani o dumu kito lo ker mongo lobito i fotohi ara kiciorita lo loguce ara lobito ko cupa lo ngoroni, iti lor cia inyi icieng ketemoni lo Lahitok ara kiciorita lo kitilora. ¹³ O jir inyi o ngotohi na kito lo ker faji na i Nyu na lo ngotoritarehin kiciorita lo kipal ko kiciorita locurat. Iya kiciorita lo kipal, ara manyu kiciorita lo loguce lo kadwarani tonyio o nyu inyi noo. ¹⁴ O jir kadwarani o dumu lobo okoto lo kiciorita lo loguce o dutu to kafiele o fik iyo ipedit lo kiyok iteten, kafiele nahitok lo kana iteten ko kafiele nahitok lo keju iteten lo tungani na li iti nyujoti. ¹⁵ I ngohi kadwarani iti yitahi na ngoroni lobo to cupa iyo tadati lo kana ikajong nenge, ¹⁶ O dutu na ngoroni to tadati lo ikajong nenge to kafiele lo kana iteten o rwace ketemoni lo Lahitok kakeny mietare. ¹⁷ O jir kadwarani o twehi otonge lo na ngoroni to tadati lo kana ikajong nenge iyo tadati lo kiyok lo iteten lo na tungani li iti nyujoti, iyo kafiele nahitok lo kana iteten ko kafiele nahitok lo keju iteten kulo adi faji lo fik inyi okoto lo kiciorita lo loguce. ¹⁸ Otonge lo na ngoroni to kana nenge o jir kadwarani o twehi kue lo na tungani li iti nyujoti o pulore inyi to ketemoni lo Lahitok. ¹⁹ Oto hati kadwarani i fotohi kiciorita lo kipal o pulore tungani na li iti nyujoroti iyo rujon lo nyujon to ken nenge. To kifwongi lo na o ngot cia kadwarani kiciorita locurat, ²⁰ i fotohi ciali ara lobito ko kiciorita na lara ngamang o pulore inyi oto cia inyi ko nyujon. ²¹ Ati ka li ikilwaha inyi ida o tum rumuno kuna sangite, o jir inyi i yaru kito lo mongo lo ker ara kiciorita lo loguce o jir iti lori o pulorehin inyi ara lobito ko lokirie lo kofwo kuna i tinyaha kuna li karuti to ngoroni ara kiciorita na lara ngamang, cupa lo ngoroni, ²² ko kurihin are kode amami kuna lo ngarihi are kuna lo tum inyi rumuno, lobito ara kiciorita lo kipal, lobito ara kiciorita locurat. ²³ O jir inyi i yauno icieng ara kitinyujita nenge to far lo mietauni iyo kadwarani ketemoni lo kema lohiricore ketemoni lo Lahitok. ²⁴ O jir kadwarani o dumu na kito mongo lo ker lara kiciorita lo loguce ara lobito ko cupa lo ngoroni iti lor to ketemoni lo Lahitok ara kiciorita lo kitilora. ²⁵ O ngot cia inyi kito mongo lo ker na lara kiciorita lo loguce o dumu okoto kunenge o dutohi tadati lo kiyok iteten lo na tungani li iti nyujoti, kafiele nahitok lo kana iteten ko iyo kafiele nahitok lo keju iteten. ²⁶ O jir kadwarani i tiyitahi lobo ngoroni tadati lo kana nenge ikajong ²⁷ manyu o dutu na ngoroni to kafiele iteten nenge o rwace ketemoni lo Lahitok kakeny mietare. ²⁸ Ngoroni lobo o jir o dutohi iyo kuna fajihit lo dutohi inyi okoto lo kiciorita lo loguce; iyo tadati lo kiyok iteten lo na tungani li iti nyujoti, iyo kafiele nahitok lo kana iteten, ko iyo kafiele nahitok lo keju iteten. ²⁹ Otonge lo na ngoroni to kana nenge o jir kadwarani o twehi kue lo na tungani li iti nyujoti, o cafare inyi ketemoni lo Lahitok. ³⁰ Oto hati inyi i fotohi kurihin kode amami kuna lo tum inyi rumuno; ³¹ lobito ara kiciorita lo kipal ko lobito ara kiciorita locurat ara lobito ko kiciorita na lara ngamang. To na kikoi i tiyi cia kadwarani pulo ketemoni lo Lahitok to na tungani li iti nyujoti. ³² Ara kuno cihicihi na li jifita lobo tungani lo ngon ko mwai lo ken na li iti diho na lida o tum rumuno kiciorita kulangun lo wahiti kulo ki iti nyujo lo tungani. ³³ O joo Lahitok diho Moses ko Aron, ³⁴ "Ka li rute ite kof lo kanaan na la cwara nan ite ara ningi, ato hati nan a fihahi ryok na li iti diho iyo kaji to na kof, ³⁵ o jir monye lo na kaji o loo o rihohi kadwarani jimitan, ' La deu nan lobo tohi lo ri mejo ryok na li iti diho kaji nei'. ³⁶ O jir kadwarani o cik o joo o jir o beluni sangite fad to na kaji o rihe inyi ida lo rute hera ryok, o jir lobo tohi to na kaji ida o tuluni o joo ida o nyu. To kifwongi lo na o jir kadwarani o rute o loo hera kaji. ³⁷ O jir inyi o her ryok to lohitir, ka lo rumu o ngoni ongon madahin kuna i nyoriha kode kuna i doriari kuna lo ri mejo i lukoho to lohitir, ³⁸ o jir kadwarani o rute to na kaji i genahi na kaji to faritin mietare. ³⁹ To far lo mietare o jir kadwarani o yitu hera na kaji. Ka li nyaaru ryok to lohitir, ⁴⁰ o jir inyi o rihohi o dumari kuna morutok lo ngon ryok i birori faji na lara lokuroni oleng to kanghatua. ⁴¹ O jir inyi o rihohi o kotori lohitir lo na kaji o jir na buru ko fur lo kotuni to lohitir lo na kaji i juhori lokuroni na i loma to kanghatua. ⁴² O jir icieng o rumu morutok ngejuho iti lunyorehin kunu ko ryok oto hati o dafi na kaji ari. ⁴³ Ka lo yitu ryok o boto to na kaji ari ati lo bunyori morutok kuna li nief inyi manyu iti ngejuhi kaji dafa, ⁴⁴ o jir kadwarani o loo o her. Ka lo rumu o joo o ngon ryok dede, ara na ryok na i rohoi, ida na kaji o nyu. ⁴⁵ O jir na kaji o bunyori okalaha, lohitir ko keyek kulo kai ko sangite kunenge fad o jir i lieliengari lokuroni na i loma to kanghatua. ⁴⁶ Lobo tungani lo rute na kaji lafar li genahini ida o nyu many kurou. ⁴⁷ Lobo tungani lo get na kaji kode o nyia lobo tohi to katua lo na kaji o jir i lal kyelani kunenge. ⁴⁸ Ati ka lo lotu kadwarani hera inyi ida hati ryok i nyaaru langun lo dafari kaji, o jir inyi o tulu kaji o joo o nyu tonyio lo ru ryok. ⁴⁹ Lo ki iti nyujo kaji o jir inyi o dumu kweny are ko kete lo ciani lo ceda, usi na imalang ko lodwa. ⁵⁰ O jir inyi i fadahi kwenyite lobito kai lo kifi kuna i libi to moti lokulufi. ⁵¹ Oto hati inyi o dumu na kete lo ceda, lodwa, usi na imalang ko na kwenyite i war i lutohi iyo okoto lo na kwenyite li fadari iyo kifi kuna lo ngoni moti lo lokulufi, o dumu o rwacare kaji kakeny mietare. ⁵² Iti nyu cia inyi kaji to okoto lo na kwenyite, kifi kuna i libi, kwenyite na i war, kete lo ceda, lodwa, ko usi na imalang. ⁵³ O jir dong inyi o lahahi na kwenyite i war oleng faji na i nyu. To na kikoi o pul cia inyi kaji o lotu o nyu. ⁵⁴ Ara kuno cihicihi kulo mwai lo ken na li iti diho, lo iifa, ⁵⁵ lo ryok iyo kyelani kode iyo kaji, ⁵⁶ ko lo ulan, kificati, kode faji na i lalabu, ⁵⁷ lo yenun jimitan o nyu lobo tohi kode ida o nyu. Ara kuno cihicihi kulo mwai lo ken na li iti diho ko ryok.