¹ Langun lo fwo karihin beciek manyu orumu Lahitok li co Israel ki yoma iyo merok kuneicieng fad kuna li rit icieng, Josua na lara ngoroyoni noo, ² ko ki lolonguno Israel fad ngoroyok, lohitwaha, kangotok kulo tenyitenyi ko kulahitoha kuneicieng fad oto o joo diho icieng, "La ngoroyon nan. ³ Li deu ite to kenite kuningi tohi na li tiyi Lahitok Lobanga ningi diho misihi fad to ite, ara orumu Lahitok Lobanga lo rem to ite. ⁴ I yioti koditi na lahi korahinore nan ite ara kof lolunyot lo imaniti kuningi kof pili lo misihi kuna lo tong - misihi kuna la lanyu nan kiji lo Jordan ko nam lo Mediterranean ngati lo lodoyorore lo kolong. ⁵ Lahitok Lobanga ningi token cia lo cule icieng oleng to ite, i fuhe cia inyi icieng oleng to ketemoni ningi manyu i talu cia ite kof neicieng iya na lo cihare Lahitok Lobanga ningi diho ite. ⁶ Ito gol noo, ito geny manyu i ric ki jifita sangite fad kuna li gero iyo buk lo cik lo Moses ida i gere kalele iya iteten kode iya ikajong. ⁷ Ke iti mohohi kenite iyo kuno misihi lo tong kiji ningi, ke leleto karanecio kulo lobangahin kuneicieng kode i butia to icieng. ⁸ Ati o jir ite i goritare Lahitok Lobanga ningi iya na li tiyore ite ko jijia. ⁹ Li fuhe Lahitok misihi kuna hitoha, i goli to ketemoni ningi ko elefar o ru lobo lo tum woitahino ite to rem. ¹⁰ Lobito tungani to kiji ningi i fuk cio alif, tonyio o rem Lahitok Lobanga ningi to ite iya na afa lo cihare Inyi token. ¹¹ Tona ito geny manyu i ric ki maruno Lahitok Lobanga ningi. ¹² Ati ka li gere ite manyu iti mohohi kenite ko kafurak kulo lo kuno misihi lo tong kiji ningi manyu ka li yemaru ite ko icieng manyu i lihita ko icieng, ¹³ o jir ha manyu dong i yen jimitan ida cia Lahitok Lobanga ningi o rihe i fuhe kuno misihi to ketemoni ningi. O gal fad, o fwonu cia icieng ara kilabita ko kalohitak kuningi, ara cia laninohin to korwonga kuningi kode kikwa to kejuha kuningi many i keroro to ene kof i jir lohi co Lahitok Lobanga ningi ite. ¹⁴ Jijia lo lelek nan a loo kikoi lo kof fad. I yeni ite to taulo kuningi ko warita kuningi fad jimitan o ru lobo tohi iyo sangite kuna i jiri fad lo cik Lahitok Lobanga ningi lo diahuno. Li iti fut inyi cihicihi kunenge fad, o ru lobo bito lo diahuno. ¹⁵ Ati iya na lo fwonunore sangite kuna i jiri kuna lo cik Lahitok Lobanga ningi ite fad diho ite, jiha o tum manyu sangite kuna i rohori fad lohi sonyare Inyi ite fwonuno kenite kuningi many ki keru Lahitok Lobanga ningi ite to ene kof i jir lohi co Inyi ite. ¹⁶ Ka li gil ite cik lo Lahitok Lobanga ningi na lohi cihare Inyi ite ito hati i fwo ki rwaa lobangahin kude ake, i fwo i gung ketemoni neicieng, o cura cia kilongo lo Lahitok kenite kuningi, ito cia ite i keroro deudeu to ene kof i jir lohi co Inyi ite.