¹ To inyia o tubu Josua imaniti kulo Israel fad Sekem, i lolongu inyi ngoroyok, lohitwaha, kangotok kulo tenyitenyi ko kulahitoha kulo Israel manyu iti botohi icieng kenite kuneicieng ketemoni lo Lobanga. ² O joo Josua diho cio, "Tohi na lo teny Lahitok Lobanga lo Israel ene: "Afa berien o manya afa lohitwaha kuningi ara lobito ko Tera apa lo Abraham ko Nahor tode lo kare lo Yuparets manyu i worati lobangahin kude ake. ³ ati a dumu Nan apa ningi Abraham to kof lo tode lo Yuparets a rihuno inyi a loritare kof lo Kanaan fad manyu a co inyi lotataha kuna i borengi. A co Nan inyi Isako ⁴ manyu diho Isako a co Jakob ko Esau. A caahi Nan kof lo donge lo Seir iyo Esau ati o fwo Jakob ko cio kulo kaji nenge kof lo Ijipt. ⁵ Tona a cule Nan Moses ko Aron manyu ati gem Nan cio kulo Ijipt to sangite kuna la tiyi Nan ijia manyu ahi yauno ite to ijia. ⁶ Langun la yauno Nan cio kuningi to kof lo Ijipt, i fwonu ite nam, manyu ki iti rwanguno cio kulo Ijipt ite to lakwenyi ko gadigadihin many nam na i Do. ⁷ Ati i cir ite diho Lahitok to lwaha oto Inyi o fik lokimuyuk kiji ningi ko cio kulo Ijipt; O lahahi Inyi nam o dile icieng ko ki muhoro icieng. Li deu ite to kenite kuningi sangite kuna la tiyi Nan kenite kulo cio kulo Ijipt. Ito ite i fwonu i many mwang hatua to karihin beciek. ⁸ Ahi yauno Nan ite kof lo cio kulo Amor kuna lo manya ngati lo okangere lo Jordan. Ki iti rem icieng ite ati a co Nan icieng kac kuningi, a keru Nan icieng to ketemoni ningi manyu i talu ite kof neicieng. ⁹ Ka li kukumahino afa Balak kito lo Zipor kabu lo Moab kikukumahino lo rem ko Israel, i lolongu inyi Balam kito lo Beor lo ki ficio ite. ¹⁰ Ati ida Nan a ning Balam ati ki gat inyi ite kakeny beciek manyu ahi lwahu Nan ite to kana nenge. ¹¹ To inyia i rangu ite Jordan i fwonu Jeriko. Ki iti rem cio kulo Jeriko ite iya na lohi iti remore cio kulo Amor, Perez, Kanaan, Hitit, Girgas, Hivi ko Jebus ati a co Nan icieng kac kuningi. ¹² A cule Nan irode ketemoni ningi na li fuhe icieng oleng to ketemoni ningi, oto manyu kunu kabuno kulo cio kulo Amor are. Ida afa ite iti rem icieng to ngalemo ko kawona kuningi. ¹³ Dong ahi cwarare Nan ite kof na lida ite i tiyi to kac kuningi ko kangite kuna lida ite i fak i manya katua, manyu i daha ngak kulo vino ko kulo olif kuna lida ite iti bul." ¹⁴ Jijia ito bang Lahitok manyu i rwaati Inyi to kigenoro fad. I bireti lobangahin kulafa li wora fafaicio kuningi to tode lo kare lo Yuparets ko to kof lo Ijipt ito hati i rwaa manyu i wor Lahitok. ¹⁵ Ati ka lida ki rwaa Lahitok o cam diho ite, dong ito nyumu na li wak ite elefar ngai i wak ite ki rwaa kode lobangahin kulafa li rwaa fafaicio kuningi to tode lo kare lo Yuparets kode lobangahin kulo cio kulo Amor kuna li ngoni ite kof neicieng. Ati to nan ko kalitole, ki rwaa cia ohoi Lahitok." ¹⁶ To inyia i nyiahahi cio o joo, "I ngohi to loma diho ohoi ngerihino Lahitok lo fworo ki rwaa lobangahin kude ake! ¹⁷ Ara afa Lahitok Lobanga niyang token Nenge lohi yauno ohoi ko monyieri kuniyang to kof lo Ijipt to nu kof lo rahun opiihin, manyu i tiyi kunu kitotorita hitoha to konyieha kuniyang. Inyi lohi ric ohoi iyo ene owele niyang fad manyu iyo misihi fad kuna lohi galuno ohoi. ¹⁸ Manyu i fuhe Lahitok misihi fad to ketemoni niyang ara lobito ko cio kulo Amor kuna lorumu o manya ene kof. Kileng ohoi, ki rwaa cia ohoi Lahitok tonyio Inyi Lobanga niyang." ¹⁹ O joo Josua diho cio, "Ida ite i tum ki rwaa Lahitok, ara Inyi Lobanga na i Nyu; ara Inyi Lobanga kakainoni. Ida cia inyi o lau silan ningi ko kipal ningi. ²⁰ Ka li ngohi ite Lahitok manyu i rwaa lobangahin misiok, i belo cia Inyi i yauno jiok diho ite ko ki iti cungo koditi ningi kileng orumu lo jir Inyi diho ite." ²¹ Ati o joo cio diho Josua, "Ida! Ki rwaa cia ohoi Lahitok." ²² Tona o joo Josua, "Ite lira sadeni kulo kenite kuningi jimitan li nyumu ite ki rwaa Lahitok." ²³ O joo Josua, "Jijia dong, i bireti lobangahin misiok kuna lo ngoni kiji ningi manyu i fotohiti taulo kuningi diho Lahitok Lobanga lo Israel." ²⁴ Manyu o joo cio diho Josua, "Ki rwaa cia ohoi Lahitok Lobanga niyang manyu ki ningo Inyi." ²⁵ To lafar o fik Josua ciharu to cio manyu to ijia to Sekem i nyiahatahi inyi diho icieng isingiti ko cihicihi. ²⁶ Manyu i gerohi Josua kuno tenyitenyi iyo buk lo cik lo Lobanga. Oto hati ko dumuno moru na hitok i cidohi ijia fotiri lo ciani o nyiha ko faji na i Nyu lo Lahitok. ²⁷ O joo inyi diho cio fad, "Ito de. Ene moru cia lara saden iyo ohoi fad. Lo ning inyi tenyitenyi fad kuna lo teny Lahitok diho ohoi, ara cia inyi saden diho ite ka lida ite i tongo to dede diho Lobanga ningi." ²⁸ Oto Josua ko ki iti sararu cio, lobito lobito diho kof lolunyot nenge. ²⁹ To kifwongi lo kuno sangite, o lotu Josua kito lo Nun karwaani lo Lahitok o wei orumu lo goru karihin mia lobito ko tomon. ³⁰ Manyu o nuhahini inyi kof lolunyot nenge na lara Timnas Sera iyo kof lo donge lo Epraim ngati lo kai lo donge lo Gaas. ³¹ I rwaa Israel Lahitok to karihin kulo warun lo Josua fad ko kulo ngoroyok kuna lo sodoro to kifwongi nenge kuna lo deu sangite fad kuna li tiyi Lahitok diho Israel. ³² Manyu koi kulo Josep kuna afa li yauno cio kulo Israel to kof lo Ijipt, o nuhahini Sekem iyo ingutit lo kof lafa li nyiangu Jakob to riali mia lobito diho tee kulo Amor, apa lo Sekem. O lotu na kof ara lolunyot lo lotataha kulo Josep. ³³ Manyu o wei Eleazar kito lo Aron, o nuhahini inyi Gibea na lorumu i caahini kito nenge Pinehas to kof lo donge lo Epraim.