¹ Oto Josua ko ki lolonguno cio kulo imanit lo Reuben, kulo Gad ko kulo nusu lo Manase ² ko jimitan diho icieng, "Li tiyi ite sangite fad kuna lohi cik Moses karwaani lo Lahitok ite manyu i ning nan iyo sangite kuna la cik nan fad. ³ To tik na i loma many to nu - ko elefar, ida ite li corihi cio kulo Israel kaletok kuningi ati li tiyi ite tic na lohi co Lahitok Lobanga ningi ite. ⁴ Dong jijia iya na li co Lahitok Lobanga ningi icieng ki yoma iya lafa lo cihare Inyi, ito yite kof ningi lafa lohi co Moses karwaani lo Lahitok ite lu tode lo Jordan. ⁵ Ati ito geny bebe rica cihicihi ko cik lafa lohi co Moses karwaani lo Lahitok ite, lo ki maruno Lahitok Lobanga ningi, lo lotita to ningo Inyi, lo rica cihicihi Kunenge, lo goritare Inyi manyu lo ki rwaa Inyi to taulo kuningi fad ko to warita kuningi fad." ⁶ To inyia i gat Josua icieng ko lahahino icieng o fwo, icieng ko fworo iya kaleicieng. ⁷ diho nusu lo imanit lo Manase li co Moses icieng kof lo Basan manyu iyo nusu kulakude li co Josua icieng kof iya ngati lo lodoyorore lo kolong lo Jordan ara lobito ko cio kulo Israel kaletok. ⁸ Ka lo lahahino Josua icieng lo fworo iya kang i gat inyi icieng o joo, "Ito yite kangite kuningi ko bara ningi na hitok - ko sang kuna i borengi, ko rial, dahab, mwala ko bilieta ko kyelani dang dang; manyu ito kor sangite kuna li belu ite diho merok kuningi ko Israel kaletok kuningi." ⁹ Oto cio kulo imanit lo Reuben, kulo Gad ko nusu lo imanit lo Manase ko ngerihino ilulung lo Israel kulakude Silo kof lo Kanaan ara na lo yitoroti iya Gilead na lara kof neicieng na lorumu icieng i jifita ciha lo Lahitok ara diho Moses. ¹⁰ Langun lo goru icieng Gelilos lo nyiha Jordan to kof lo Kanaan, oto cio kulo imanit lo Reuben, kulo Gad ko kulo nusu lo Manase ko duhohino ciali na i yeyer ijia kalele lo Jordan. ¹¹ Manyu ka lo ning cio kulo Israel kulakude jimitan lo duhohi icieng ciali lohikori lo kof lo Kanaan idi Gelilos o nyiha ko Jordan, ngati lo kof lo cio kulo Israel.'' ¹² i furohino ilulung lo cio kulo Israel fad Silo lo fworo rem ko icieng. ¹³ Oto Israel o cule Pinehas kito lo kadwarani Eleazar iya kof lo Gilead diho imanit lo Reuben, Gad ko nusu lo Manase. ¹⁴ Iti lihari cio tomon ko inyi, cio kula lara kabolorok kulahitoha kulo agwalahin to imaniti tolobito tolobito to Israel. ¹⁵ Ka lo fwo icieng Gilead diho cio kulo imanit lo Reuben, Gad ko nusu lo Manase, o joo icieng diho icieng, ¹⁶ "O joo tuban lo cio kulo Lahitok fad diho ite, "Aja i gil ite kiruk diho Lobanga lo Israel ji? Aja i belohi ite Lahitok korwonga i duhohi ciali lo ki iti peha Inyi jijia? ¹⁷ Ida afa kipal lo Peor ki tum ohoi? Ko enefar o rihe ohoi ida lohi iti nyu kenite kuniyang iyo na kipal, ko kileng afa lo urohino jiok iyo ilulung lo cio kulo Lahitok! ¹⁸ I belo manyu jijia ite oleng to ketemoni lo Lahitok? Ka li iti pek ite Lahitok elefar, kiwanyi i longo cia Inyi diho ilulung lo cio kulo Israel fad. ¹⁹ Ka lida ene kof ningi o nyu i fwonu iya kof lo Lahitok faji na lo woitare lomanyare lo Lahitok, i fwonu ki ngar kof ko ohoi. Ati ke iti pek Lahitok kode ohoi to duhohino ciali ningi na lida ara ciali lo Lahitok Lobanga niyang. ²⁰ Afa ka lida Akan kito lo Zera i genoro iyo sangite kuna li fotori, ida afa kilongo lo lotu iyo ilulung lo cio kulo Israel fad? Ida afa ara inyi ake lo wei to kipal nenge." ²¹ Oto Reuben, Gad ko nusu lo Manase i nyiahahi kulahitoha kulo kajihit kulo imaniti kulo Israel o joo, ²² "Na lo lanyu fad, Lobanga Lahitok!Na lo lanyu fad, Lobanga Lahitok! O yen Inyi! Ka li tongo orumu ene ara lo ki iti peha kode lo beruno ningo Lahitok, kehi ngohi ohoi elefar. ²³ Ka lohi duk ciali niyang ake lo ki beloro oleng iyo Lahitok lo ki fotohino kiciorita locurat kode kiciorita kuna lara ngamang kode lo ki fotohino kiciorita lo kimoraru kai nenge, i ngohi Lahitok token Nenge ki co ohoi kidak." ²⁴ Ida! Ki tiyi ohoi ji to bangun jimitan, ngo fwonu ha mute lotataha kuningi o joo diho kuniyang, "Nyio lo ngon kiji ningi ko Lahitok Lobanga lo Israel? ²⁵ Lo fik Lahitok Jordan ara lohikori kiji niyang ko ite cio kulo imanit lo Reuben ko kulo Gad! I ru ite ko ngara diho Lahitok." tona ngo tum lotataha kuningi ki cwara kuniyang i ngohi bangun Lahitok. ²⁶ Inyi na tenya na lohi jimitare ohoi, "Nga kukumahinoti ki duhohi ciali - ati ida ara lo ki fotohita kiciorita kode kikumihin." ²⁷ I lany o jir i tongo ara saden kiji niyang ko ite ko kofiang kuna lo fwonuno, jimitan ki wora cia ohoi Lahitok faji Nenge na i Nyu to kiciorita locurat kuniyang, kikumihin ko kiciorita kulo kimoraru. O jir mute ida lotataha kuningi o joo diho kuniyang, "Ida ite i ngon ko ngara diho Lahitok." ²⁸ Ohoi ko jimitan, "Ka lo joo mute icieng ji diho ohoi kode diho lotataha kuniyang, ki nyiahahi cia ohoi ki joo, "Ito de kitiririta lo ciali lo Lahitok lafa lo duk fafaicio kuniyang ida ara lo ki fotohino kiciorita locurat kode kikumiti ati ara saden kiji niyang ko ite." ²⁹ Ki lomaha ohoi iyo tenya lo ki iti peha Lahitok kode ki beloro oleng iyo Inyi elefar to duho ciali lo ki fotohita kiciorita locurat, kiciorita kuna lara ngamang kode kikumihin ida ara ciali lo Lahitok Lobanga niyang na lo woita ketemoni lo lomanyare Nenge. jimitan Lahitok Inyi Lobanga." ³⁰ Ka lo kadwarani Pinehas ko kulahitoha kulo ilulung - kabolorok kulo agwalahin kulo imaniti kulo Israel tohi na lo teny cio kulo Reuben, Gad ko Manase, oto icieng ko kwama. ³¹ Oto Pinehas kito lo kadwarani Eleazar o joo diho Reuben, Gad ko Manase, "Elefar ki yen ohoi jimitan ki ngon Lahitok ko ohoi tonyio ida ite i pale diho Lahitok to ene tenya. Jijia li lwahu ite Israel to kana lo Lahitok." ³² Oto Pinehas kito lo kadwarani Eleazar ko kulahitoha ko yitoroti iya kof lo Kanaan to lohiricore neicieng ko cio kulo Reuben, Gad ko Manase to Gilead o fwori o rihohini cio kulo Israel na tenya. ³³ O kwama icieng ningo na tenya manyu o maji Lobanga ko ki iti cungoti tenya lo fworo rem ko icieng lo fworo ki iti sararu kof na lo manyare cio kulo Reuben, Gad ko Manase. ³⁴ Manyu iti barahi cio kulo Reuben ko Gad na ciali ene karana o joo, "Saden kiji niyang -