¹ To inyia o joo Lahitok diho Josua, ² "To rihohi cio kulo Israel o nyumu kangite kuna lara lotafare, iya na lahi cihare Nan ite to Moses, ³ o jir tungani na li fade kaletoni lohiriafe, ara na lida o rinyahi i fe ijia, o tafu ken nenge diho kalenoni lo okoto. ⁴ Ka li fe icieng iyo lobo to kiji lo kuno kangite, o jir icieng o woita lokoli lo kang i titimahi tenya neicieng diho lohitwaha kulo na kang. To inyia o jir kuna lohitwaha i fotu inyi kang hatua i co inyi lohitongore kiji neicieng. ⁵ Ka li iti rwanguno kalenoni lo okoto na tungani o jir lohitwaha kulo na kang ida i co na kafejunoni kac kulo kalenoni, tonyio i fade na kafeitani loryehat nenge lohiriafe na lo ru lobo kivita berien. ⁶ O jir inyi i tongo na kang many o woita lokiho ketemoni lo ilulung, manyu many o wei kadwarani na hitok na lorumu o ngon kula faritin. To inyia o tum icieng yitoro kangite kuna li fejunore icieng." ⁷ Tona oto icieng iti ngade Kedes, to Galilaia to kof lo donge lo Naptali, Sekem to kof lo donge lo Epraim ko Kirias Arba (na lara Hebron) to kof lo donge lo Juda. ⁸ To ngati lo okangere lo Jordan (to lu ngati lo Jeriko) o nyumu icieng Bezer to mwang to kof na i fete to kai lo donge na lo ngon kof lo imanit lo Reuben, Ramos to Gilead na lo ngon kof lo imanit lo Gad, ko Golan to Basan na lo ngon kof lo imanit lo Manase. ⁹ O jir lobo tungani lo Israel kode misiohoni na lo manya kiji neicieng na li fade tungani lohiriafe o tum ki fejaru iyo lobo to kuno kangite lo nyumuni ida kalenoni lo okoto i fade o rihe ida lo woita lokiho ketemoni lo ilulung.