¹ O tubuno ilulung lo cio kulo Israel fad Silo ko gurohino kema lohiricore ijia. Orumu kof fad lo ngon kac kuneicieng ² ati orumu o rihe imaniti kulo Israel mietare ida lo rumu kicaiti kulo kof lolunyot neicieng. ³ Tona o joo Josua diho cio kulo Israel, "Many ko anu cia i tila ite ki taluno kof na lohi co Lahitok Lobanga lo lohitwaha kuningi diho ite? ⁴ Ito nyumu cio uni to imanit lobito lobito, a cule cia nan icieng ki pimo kof ko ki gero itemiti kunenge ara na li jifita lolunyot lo imaniti tolobito tolobito. Oto hati cia icieng o yitu diho nan. ⁵ O jir ite i kor kof kicaiti mietare. O jir Juda i wasihi faji nenge ngati lo Orof ko imaniti kulo Josep faji neicieng ngati lo kai. ⁶ Langun li ger ite itemiti kulo kuna kicaiti mietare kulo kof, i yaunoti ene diho nan ato cia nan a bir tobotobo to ite to ketemoni lo Lahitok Lobanga niyang. ⁷ Oto hati, ida cia kulo imanit lo Levi o rumu kicait kiji ningi tonyio i tongo tic lo dwarun diho Lahitok ara kicait lolunyot neicieng. Manyu imaniti kulo Gad, Reuben ko nusu lo Manase lo rumahi kicait lo kof lolunyot neicieng ngati lo okangere lo Jordan. I co afa Moses karwaani lo Lahitok diho icieng. ⁸ Ka li ciak kuna cio lotita lo fworo ki pimo ko ki gero itemiti kulo kof, o cik Josua icieng o joo, "I fwo i pimoto kof manyu i geroto itemiti kunenge. Ito hati i yitu ene diho nan ato cia nan a bir lobo to ite tobe ten to Silo to ketemoni lo Lahitok." ⁹ Oto kuna cio o woju o fwori i lori kof fad. I ger icieng itemiti kunenge iyo buk na li tulo, kangite to kangite iyo ikoriti mietare oto hati ko yitunoti diho Josua kem ijia Silo. ¹⁰ Josua dong ko ki biro tobotobo to icieng to Silo to ketemoni lo Lahitok to inyia ko ki caahino kof diho cio kulo Israel i jifita imaniti ko agwalahin kuneicieng. ¹¹ O lotu icait lo ketemoni iyo imanit lo Benjamin i jifita agwalahin kunenge. O hisahino kof na li caahini icieng kiji lo lo imanit Juda ko imaniti kulo Josep. ¹² To ngati lo kai i ciaha lohikori neicieng to Jordan o ring ara sirisiri lo Jeriko ko birahino iya ngati lo lodoyorore lo kolong iya kof lo dongecio i fud mwang lo Bet Aven. ¹³ To inyia o range iya sirisiri lo ngati lo Orof lo Luz (na lara Betel) i culoro iya Ataros Adar iya donge na lo ngon ngati lo Orof lo Bet Horon. ¹⁴ To donge na li lomo Bet Horon to ngati lo Orof i belo lohikori iya ngati lo Orof i tolita ngati lo lodoyorore lo kolong o lotu i fud Kirias Baal (na lara Kirias Jearim) kang na lara lo cio kulo imanit lo Juda. Ara orumu ene ngati lo lodoyorore lo kolong. ¹⁵ I ciak lo ngati lo Orof to kalele lo Kirias Jearim to ngati lo lodoyorore lo kolong o lotu lohikori i fud iyo ipulak lo kifi kulo Neptoa. ¹⁶ I culoro lohikori kof many gum lo donge na li lomo ridat lo Ben Hinom kai lo ridat lo Repaim. O ring i culoro ridat lo Hinom i tole sirisiri to Orof lo kang lo cio kulo Jebus o ring iya En Rogel. ¹⁷ O kudo hati iya ngati lo kai o loo iya En Semes o ringe iya Gelilos na lo deya lohirwohore lo Adumim i culoro hati moru lo Bohan kito lo Reuben. ¹⁸ O loo o ring iya sirisiri lo ngati lo kai lo Bet Araba oto hati o ringe kof iya Araba. ¹⁹ O loo manyu to inyia iya sirisiri lo ngati lo kai lo Bet Hogla o lotu to ngati lo kai lo ladoket lo nam lo Balang kutuk lo Jordan to ngati lo Orof. Ara afa ene lohikori lo ngati lo Orof. ²⁰ O fik Jordan lohikori to ngati lo okangere. Ara afa kuno lohikorihin kuna li rit kof lolunyot lo imanit lo Benjamin to ngatihin fad. ²¹ Imanit lo Benjamin to agwalahin kunenge o ngoni afa ko kuno kangite: Jeriko, Bet Hogla, Emek Keziz, ²² Bet Araba, Zemaraim, Betel, ²³ Avim, Para, Opra, ²⁴ Kepar Amoni, Opni, ko Geba. Kangite tomon ko are ko kangite kuna sidiha kuna li rit icieng. ²⁵ Gibeon, Rama, Beeros, ²⁶ Mizpa, Kepira, Moza, ²⁷ Rekem, Irpeel, Tarala, ²⁸ Zela, Helep, kang lo cio kulo Jebus (na lara Jerusalem), Gibea ko Kirias. Kangite tomon ko ongon ko kangite kuna sidiha kuna li rit icieng.