¹ Ara afa ene kof na li caahini imanit lo Manase iya kito okang lo Josep. Makir afa lara fafai lo cio kulo Gilead kuna li caahini kof lo Gilead ko Basan tonyio ara afa cio kulo agwala lo Makir karemok kuna i goli. ² Tona ara afa ene kof na li caahini diho kunakude agwalahin kulo imanit lo Manase, diho; Abiezer, Helek, Asriel, Sekem, Heper, ko Semida. Ara kuna kulakude tee rei kulo Manase kito lo Josep to agwalahin kuneicieng. ³ Dong Zelopead kito lo Heper kito lo Gilead kito lo Makir kito lo Manase o ru afa ko tee rei ati ara afa tee kunenge kariok keken, kuna lara karanecio kuneicieng; Mahala, Noa, Hogla, Milka ko Tirza. ⁴ O fwo icieng diho kadwarani Eleazar, Josua kito lo Nun ko kulahitoha ko jimitan diho icieng, "O cik afa Lahitok Moses lo korahino ohoi kof kiji lo kajieba kuniyang." Oto Josua o korahi icieng kof lolunyot ara lobito ko tee kulo recera kulo apa neicieng iya na lo cihare Lahitok. ⁵ I moru afa kicait lo Manase ikoriti tomon kuna lo sod Gilead ko Basan kuna lo ngoni ngati lo okangere lo Jordan, ⁶ tona lo rumunore tee kariok kulo imanit lo Manase kof lolunyot kiji lo tee rei. O lotu kof lo Gilead ara lo kunakude kulo lotataha kulo Manase. ⁷ I ciak lohikori lo kof lo Manase many to Aser many Mikmesas ngati lo okangere lo Sekem. O loo lohikori iya ngati lo Orof to ijia lo ki moruno cio kuna lo manya Eri Tapua. ⁸ (Ara afa kof lo Tapua lo Manase ati kang la hitok lo Tapua na lo ngon lohikori lo Manase ara afa lo cio kulo imanit lo Epraim). ⁹ To inyia o ringe lohikori iya ngati lo Orof many torit lo Kana. O ngoni afa kangite kulo cio kulo Epraim kuna li teno ko kulo cio kulo imanit lo Manase ati o ngon afa lohikori lo kof lo imanit lo Manase to ngati lo kai lo torit o loo i cung nam lo Mediterranean. ¹⁰ Iya ngati lo Orof ara kof lo Epraim ojo ngati lo kai ara lo Manase. O goru kof lo Manase nam lo Mediterranean i korio ko Aser to ngati lo kai ko Isakar to ngati lo okangere. ¹¹ To katua lo Isakar ko Aser, o ngon afa Manase ko Bet San, Ibleam, ko cio kulo Dor, Endor, Taanak ko Megido ara lobito ko lomanyarehin kuna li rit icieng (Lo uni iyo kitipari inyi Napos). ¹² Ati ida afa cio kulo imanit lo Manase o tum manya kuna kangite tonyio o goritare afa cio kulo Kanaan na ngati lo kof. ¹³ Oto hati tiktik ka lo sodo golun lo cio kulo Israel, i fudahita icieng cio kulo Kanaan tic lo panyar ati ida i fuhe icieng tur. ¹⁴ O joo cio kulo Josep diho Josua, "Nyio ki co isi ohoi icait lo kof lobito keken o joo o jir ara lolunyot niyang? Kira cio kuna i borengi manyu lohi gatahi Lahitok ohoi gum noo." ¹⁵ I nyiahahi Josua icieng o joo, "Ka li borengi ite bebe na lida na kof lo donge lo Epraim ki tum ite, i fwo bo tim i ngodu kof ningi to ijia to kof lo cio kulo Perez ko cio kulo Repi." ¹⁶ I nyiahahi cio kulo Josep inyi o joo, "Ida kof lo donge ki tum ohoi manyu cio kulo Kanaan fad kuna lo manya oleng, o ngoni ko gadigadihin kuna li kukumi to bilieta, kunu fad lo ngoni Bet San ko lomanyarehin kuna li rit inyi ko kunu lo ngoni ridat lo Jezreel." ¹⁷ Ati o joo Josua iyo imaniti kulo Josep; iyo Epraim ko Manase, "I borengi ite manyu i goli noo, ngida ara kicait lo kof lobito ki ciori ite ¹⁸ ati o jir adi ko tim na lo ngon nu kof lo donge. Ito ngode oto cia ara ningi many lohicungi kileng ngo ngoni cio kulo Kanaan ko gadigadihin kuna li kukumuni to bilieta manyu kileng ngo goli icieng, i tum ite ki fuharu icieng oleng."