¹ Kiwanyi berien o goruhi Jerub - Baal (na lara Gidion) ko cio kunenge kem kalele lo ipulak lo kifi na lo ngon Harod. O ngon afa kem lo Midian to ngati lo kai diho icieng katua lo ridat na lo nyiha ko donge lo More. ² O joo Lahitok diho Gidion, "I ngon isi ko cio kuna i borengi noo. Ida Nan a tum ki cwara Midian kac kuneicieng, i co cia Israel ki pufare nan o joo, "Lohi lwahu golun nei token nei nan." ³ Jijia to rihohi karemok to i joo, "Tungani na li hihirita o bang o jir i belo i ngohi donge lo Gilead." Tona o fwo cio alifi keek are, o tong cio alifi tomon. ⁴ Ati o joo Lahitok diho Gidion, "O rihe kuno cio o borengi noo. Yaru icieng kare iyo kifi, a loo cia Nan ahi gegelahi isi icieng to ijia. Ka la joo Nan, "Ki loo cia ene ko isi", O loo cia inyi; ati ka la joo Nan, "Ida cia ene ki loo ko isi", ida cia inyi o loo." ⁵ Tona i yaru Gidion kuna cio iyo kifi. To ijia o joo Lahitok diho inyi o joo, "I gegele cio kuna lo cok i kama kifi to ngadief iyo kuna lo gung mata." ⁶ O cok cio mia uni ki kama kifi to ngadiefo, o gung kulakude fad mata. ⁷ O joo Lahitok diho Gidion, "To kuno cio mia uni li kama kifi to ngadiefo, ahi lwahu cia Nan ite manyu ahi ciorihi cio kulo Midian kac kunino. I ngohi kulakude fad to yite kang." ⁸ To inyia o lahahi Gidion Israel kulakude o fwo kang ati o ric kuna mia uni lo fwonu o luny dahidahi ko turena kulo kaletok. To inyia orumu kem lo cio kulo Midian o ngon kof to inyia lo ngonore inyi, katua lo ridat. ⁹ Tona karue o joo Lahitok diho Gidion, "To woju i loo iti remo kem tonyio a loro Nan ki cwara inyi kac kunino. ¹⁰ Ka li bang isi ki iti remo, i culoro iya ijia kem ko karwaani nino Pura ¹¹ ito hati i ning tohi na lo tenya icieng. To kifwongi ki susuhi cia isi ki burahino ki iti remo kem." Tona o fwo icieng ko karwaani nenge Pura iyo lohiririare lo kem. ¹² Cio kulo Midian, Amalek ko misiok kulakude kulo ngati lo okangere lo manyati katua lo ridat i lwahahino iya ibulit lo iterebuk. Ida lonagahin kuneicieng i kenuno iya singeti lo kutuk lo nam. ¹³ O goru Gidion ijia iti ricohi tungani o rihohino kaletoni kitirija nenge, o joo, " Ki iti rija nan o joo, o lotu mugati lo geme na i lulunga o boboruno iya kem lo cio kulo Midian ko ki tanga kema to golun na li co kema i yoloro ko gilaru." ¹⁴ I fotu morte nenge o joo, "Ida na ara lobo tohi tur ati ngalem latubot lo Gidion kito lo Joas, Israelani. Li co Lobanga cio kulo Midian ko kem fad kac kunenge." ¹⁵ Ka lo ning Gidion na kitirija ko ilahit nenge, oto ko gungon i wor Lobanga. O yite inyi iya kem lo Israel ko ki lolongo o joo, "Ito woju li co Lahitok kem lo cio kulo Midian kac kuningi." ¹⁶ Oto inyi ko kora kuna cio mia uni iyo olehi uni, i co turena ko abinuhin kuna i wati ko rauno kulo ki nuaha katua. ¹⁷ O rihohi icieng o joo, "Ito deyati nan, i jifitati kikoi nei. Ka la goru nan kalele lo kem, i tiyoto iya na la tiyore nan token. ¹⁸ Ka la kut nan ko cio kuna lohi lihita ko nan turena kuniyang, o jir to kalelehin kulo kem fad ito kut kuningi ito hati i gore i joo, "To Lahitok ko to Gidion!" ¹⁹ O goru Gidion ko kuna cio mia bito lo ngon ko inyi kalele lo kem tuk lo karue langun lo tobo kaririak. O kut icieng turena ko bora abinuhin kuna lorumu o ngoni kac kuneicieng. ²⁰ O kut kuna olehi uni fad turena kuneicieng ko bora abinuhin to kac kuneicieng. O tehi kimacio to kac ikajongi ko turena to iteteni kuneicieng kuna lo jir icieng o kut oto i gorori o joo, "Ngalem latubot to Lahitok ko to Gidion!" ²¹ Ka lo woita icieng; tungani lobito lobito o woita faji nenge dee kalele lo kem, i fe cio kulo Midian fad, i feitati adi i luluoti. ²² Ka lo kuti kuna turena mia uni fad, i co Lahitok cio kuna lo ngoni katua lo kem fad i belohinoti remun ake ake to ngalemo kuneicieng. I fe karemok iya Bet Sita iya ngati lo Zerera many lohikori lo Abel Mehola na lo nyiha ko Tabas. ²³ I lolonguni cio kulo Israel to Naptali, Aser, ko Manase fad, iti rwangaru icieng cio kulo Midian. ²⁴ O cule Gidion ifak kof lo donge lo Epraim fad o joo, "I fwonu ki iti remo cio kulo Midian, i niefata ladoketi kulo Jordan many o goru Bet Bara. ²⁵ I niefu manyu icieng kulahitoha kulo Midian are; Oreb ko Zeeb. Iti rwangaru icieng cio kulo Midian manyu i yauni kueci kulo oho Oreb ko Zeeb diho Gidion na lorumu o ngon Jordan.