¹ I tiyi cio kulo Israel tohi na i rohoi to ketemoni lo Lahitok, manyu to karihin mietare i co Inyi icieng kac kulo cio kulo Midian. ² Tonyio orumu golun lo cio kulo Midian i donyo icieng noo, i fahai cio kulo Israel tuguno kuneicieng kai lo dongecio, locolongi, kunomo ko fajihit kuna i goli. ³ Ka li iti bul cio kulo Israel manatak kuneicieng, o fwonu cio kulo Midian, kulo Amalek ko misiohi kulo ngati lo okangare kulakude i bule kof. ⁴ O fwonu icieng o fik kem kof ko ki palaru manatak kuna fad many Gaza, manyu ida i ngohini lobo tohi i war lo cio kulo Israel kode ker, kine, kiteng, kode sigiria. ⁵ O fwonunu ko sang kuneicieng ko kemahin iya ibulit lo iterebuk. Ida orumu icieng ko lonagahin kuneicieng o tum ki kenuno; i buluno icieng kof lo ki pala. ⁶ Iti kilwahe cio kulo Midian cio kulo Israel many i cirati diho Lahitok to lwaha. ⁷ Ka li cira cio kulo Israel diho Lahitok to cio kulo Midian, ⁸ o culahi Inyi icieng kamocani na lo lotu o joo diho icieng, “Tohi na lo teny Lahitok Lobanga lo Israel inyi ene: Ahi yauno Nan ite to kof lo Ijipt, kof lafa li rahare ite opiihin. ⁹ Ahi lwahu afa Nan ite to kac kulo cio kulo Ijipt, manyu ahi lwahu ite to kac kulo cio fad kulafa lohi iti gema ite. A fuhe Nan icieng fad to ketemoni ningi manyu ahi co ite kof neicieng. ¹⁰ A joo Nan diho ite; Nan Lahitok Lobanga ningi; Ke wor lobangahin lo cio kulo Amor kuna li manya ite kof neicieng, ati ida ite li ning Nan.” ¹¹ O lotu Malaika lo Lahitok i tongohino fotiri lo ciani to Opra na lara lo Joas Abiezarani o rumu kito nenge Gidion i muco geme katua lo tigol na li piyarehin vino i duhare iyo cio kulo Midian. ¹² Ka lo boto Malaika lo Lahitok diho Gidion, o joo diho inyi, "Ki ngon Lahitok ko isi karemoni na i gol." ¹³ O joo Gidion diho Inyi, "Ki lau hati nan Lahitok lei. Ka lohi ngon hati Lahitok ko ohoi, aja hati i tiyihino kuno sangite fad diho ohoi? Aji hati kulafa ticitici kunenge hitoha afa lo tenyita lohitwaha kuniyang diho ohoi o joo, "Ida afa Lahitok ki yauno ohoi to kof lo Ijipt? Ati jijia lohi ngohi Lahitok ohoi manyu ki corahi ohoi kac kulo cio kulo Midian. ¹⁴ I belo Lahitok diho inyi oto o joo, "I loo to na golun li tehita isi to lwahu cio kulo Israel to kac kulo cio kulo Midian, ida Nan ahi cularu isi?" ¹⁵ I nyiahahi Gidion inyi o joo, "Ki lau hati nan Lahitok lei, ati aja ba nga lwahu nan Israel? Agwala niyang li sidi noo to imanit lo Manase manyu nan tungani na lida a cam bebe to agwala niyang." ¹⁶ I nyiahahi Lahitok inyi o joo, "Ahi ngon cia Nan ko isi manyu i keru cia isi cio kulo Midian fad o ru lobo lo fur." ¹⁷ I nyiahahi Gidion o joo, "Ka la rumu nan kisisio to ketemoni Nino jijia, ki co nan kitotori jimitan ara Isi dede li tenya ko nan. ¹⁸ Ki ning nan, ke loo hati many a yauno nan kiciorita nei a fotohi ketemoni Nino." Manyu o joo Lahitok, "A tila cia Nan many i yitu isi." ¹⁹ O loo Gidion kaji nenge o loo o yerahi kilelo na i fufu oto hati o dumu sufia lo kofwo o fun mugati kuna lo ru ibula. O fihahi inyi tyang iyo akuhu, o tek balang to moti i yauno i co iyo Malaika to fotiri lo ciani. ²⁰ O joo Malaika lo Lobanga diho inyi, "To dumu tyang ko mugati to fik kai lo ene moru i juhohi hati balang." I tiyi Gidion ji. ²¹ Oto Malaika lo Lahitok ko tiro tyang ko mugati to kue lo iluk na orumu lo tehita Inyi to kana. O woju kima to ken lo moru o cure tyang ko mugati, manyu Malaika lo Lahitok ko rijoro. ²² Ka lo yen Gidion jimitan ara Malaika lo Lahitok, ko ki gororo to ryenyahino o joo, "Olo Lahitok na lo lanyu fad! La deu nan Malaika lo Lahitok to konyieha kunei!" ²³ Ati o joo Lahitok diho inyi, "I ngohi kisiliban o ngon ko isi! Ke bang, ida cia isi i wei." ²⁴ Oto Gidion ko duhohino ciali diho Lahitok ijia ko ki iti barahino o joo, "Lahitok Inyi kisiliban." Ko elefar o woita idi Opra lo Abiazar. ²⁵ O joo Lahitok diho inyi na karue bito, "To dumu mongo lo are to twol lo apa nino na lara karihin mietare. To bunye ciali lo Baal lo apa nino i ngode ko na wiriti lo Asera li cido kalele nenge. ²⁶ Ito hati i duhohi ciali na i behi iyo Lahitok Lobanga nino kai lo ene faji i todo. Ito hati i tiyore na wiriti lo Asera li ngod isi ara keyek i fotohi na mongo lo are ara kiciorita locurat." ²⁷ Oto Gidion ko dumuno karwaak kunenge tomon ko ki tiyo iya na lo tenyare Lahitok diho inyi. Ati to bangun nenge cio kulo kaji neicieng ko kulo kang hatua, i tiyi inyi karue ida ara to far. ²⁸ Kiwanyi langun lo kwenyu cio kulo na kang, o rumuni ciali lo Baal lo bunyori o ngodari ko wiriti lo Asera na lorumu i cido kalele nenge manyu mongo lo are i fotohini kai lo ciali na lo duhohini ngejuk. ²⁹ I tifi icieng kenite o joo, "Ngai ba li tiyi ene?" Ojo icieng i ngingiju na tenya caafi, o rihohini icieng o joo, "Gidion kito lo Joas, inyi li tiyi ene tic." ³⁰ I fidia cio kulo na kang Joas o joo, "I yauno kito nino oleng o jir inyi o wei tonyio lo bunye inyi ciali lo Baal manyu o ngode ko wiriti lo Asera to kalele nenge." ³¹ Ati i nyiahahi Joas icieng o joo, "I wak ite kisisio Baal? I wak ite tema lwaha inyi? Tungani na lo baha i sisio Baal o jir i fadari o rihe ara kiwanyi. Ka lara Baal lobanga dede, o jir inyi o rem o lwahu ken nenge ka lo bunyo tungani ciali nenge." ³² Tonyio o bunye Gidion ciali lo Baal, iti barahini inyi o joo Jerub - Baal lafar lo jimitan, "I ngohi Baal to rem ko inyi. ³³ Tona oto cio kulo Midian fad, Amalek ko kulakude misiok kulo ngati lo okangere i morahi golun neicieng ko rangunoti Jordan o fwori o gurohini kem ridat lo Jezril. ³⁴ Oto Okorif lo Lahitok o lotu ken lo Gidion, inyi ko kuta ture lo ki lolongo cio kulo Abiezar ki jifuno inyi, ³⁵ o cule inyi ifahi katua lo Manase fad ki lolongo icieng rem, manyu iya kof lo Aser, Zebulun ko Naptali o jir manyu icieng o fwo ki iti rico inyi. ³⁶ O joo Gidion diho Lobanga, "Ka li lwahu cia Isi Israel to kana nei iya na li cihare Isi - ³⁷ to de a fik cia nan kyela lo fofi kulo ker kilongoni. Ka lo bok lokolukolu fofi kulo ker keken, o tou kof na lo ngon inyia fad; ato cia nan a yen a joo i lwahu cia Isi Israel to kana nei iya na li tenyare Isi." ³⁸ Manyu i tiyihino ji. O woju Gidion berien kiwanyi nenge, i pii inyi kyela lo fofi kulo ker o fwonu kifi kuna li fut ilebu. ³⁹ To inyia o joo Gidion diho Lobanga, "Kehi longojahi nan. Ki co nan itemit lobito ari to kyela lo fofi kulo ker, ati enefar i ngohi kyela lo fofi kulo ker to tou i ngohi to ara kof lo bok lokolukolu." ⁴⁰ Na karue i tiyi Lobanga ji. Ara kyela lo fofi kulo ker keken; o bok lokolukolu kof fad.