¹ To lafar o wol oho Debora ko Barak kito lo Abinoam ene wole: ² Ka lo woju kabuno to Israel i temiti diho cio; Ka li co ci okenite to kwerun lo taulo, nga iti maj Lahitok! ³ Ito ning ene ite kabuno! Ito ning ite kalanyunok! Nan, kileng nan, a wol cia diho Lahitok; A maj cia nan Lahitok Lobanga lo Israel, to wole. ⁴ Ka li loo Isi Lahitok to kue lo donge lo Seir, ka li dororo Isi to kof lo Edom; iti jijiho kof, manyu i juho kai, i juhu idis kifi kof. ⁵ Iti ninienga dongecio ketemoni lo Lahitok to donge lo Sinai, ketemoni lo Lahitok Lobanga lo Israel. ⁶ To faritin kulo Samgar kito lo Anas, to faritin kulo Jael li mura kikoihin; li ngohini kikoihin, lo tahita kalotitak kikoihin kuna i kudoho. ⁷ Lida cio kulo kangite kulo Israel o rem, i tongo icieng many a woju nan, Debora; many a woju nan ara iyang to Israel. ⁸ O nyumu Lobanga kabolorok ngejuho, langun lo goru rem lokoliho kulo kang ati o ru buhu kode fere na lo boto to kiji lo alifi keek ongon to Israel. ⁹ O ngon tau nei ko kabuno kulo Israel ko cio kuna li pote kenite to kwerun lo taulo to kiji lo cio. Nga iti maj Lahitok! ¹⁰ Ite kuna li feita to sigiriahin kuna i kweri, kuna li tongo segeri kulo korwong lo sigiria linggiti; ko ite kuna li lot i tolita kikoihin, i buhati. ¹¹ ogoroho kulo kawolok to faji lohitimatare lo kifi. O wolo icieng jorena kuna lo lanyu Lahitok, jorena kuna lo lanyu cio kulo kangite kunenge to Israel. Oto cio kulo Lahitok o fwo lokoliho kulo kang. ¹² To kwenyu, to kwenyu Debora! To kwenyu, to kwenyu, i cura wole! To woju Barak! I niefe kuna li niefaru isi kito lo Abinoam! ¹³ O fwonu otonge kulo kulahitoha, o fwonu cio kulo Lahitok diho nan ki iti remo kagolok. ¹⁴ O fwonu kude to Epraim kuna lo loo kerdati neicieng many Amalek: O ngon afa Benjamin ko cio kuna lohi jifita isi. O fwonu kulahitoha kulo rem to Makir ko to Zebulun kuna lo tehita iluhi kulo kabolorok kulo rem. ¹⁵ O ngoni afa kabuno kulo imanit lo Isakar ko Debora; Ibo o ngoni afa Isakar ko Barak, o cule inyi icieng to ciha nenge katua lo ridat; Iyo ikorit lo kof lo Reuben o ngon afa kibuha lo taulo noo. ¹⁶ Nyio lohi co isi i tongo kiji lo twoli kulo kera, ningo kififila lo katibalak? Iyo ikorit lo kof lo Reuben o ngon afa kibuha lo taulo noo. ¹⁷ I tongo Gilead many tode lo Jordan ko Dan, nyio i lolorita inyi kiji lo tigoli? I wasihi Aser kutuk lo nam, i tongo iti base to lo rangitare nenge. ¹⁸ O lau cio kulo Zebulun kenite ko warita kuneicieng, i tiyi manyu cio kulo Naptali kuna lo nyiha manatak. ¹⁹ O fwonu kabuno manyu o remiti; o rem kabuno kulo kof lo Kanaan to Taanak na lo nyiha ko kifi kulo Megido, ida icieng i yaru rial na lo beluni. ²⁰ To kai o rem Kanger, to lo lotitare neicieng o rem icieng ko Sisera. ²¹ O wore kare lo Kision icieng; kare ongore lo karihin – kare lo Kision. I dororo ketemoni warun nei, to gol. ²² Oto mececehi kulo lakwenyi i guruno, i firitati i kurdangati. I firitati to kejuha kuneicieng kuna i lotiri. ²³ O joo Malaika lo Lahitok, “I fice Meroz, i fice cio kunenge to kutuk na i dwar, tonyio ida icieng o fwonu lwaha Lahitok; Lwaha Lahitok iyo kagolok.” ²⁴ I ngohi Jael to ara ngorwani na li gati noo, ngorwani lo Heber Kenetani; I ngohi inyi to ara ngorwani na li gati noo to kiji lo ngorwo kuna lo manya katua lo kema. ²⁵ I lifa meroni kifi, inyi i ciorihi lei; I yauno lei kuna lo rifohi ngoroni to ilebu na lo cam to kabuno. ²⁶ O dumu kana nenge biliet kiguri lo kema, iteten nenge o dumu ngol lo kadongok; O gur inyi Sisera, o bor inyi kue nenge. O gur inyi iti sara onguleha kunenge. ²⁷ O urohino inyi kejuha kunenge, o uroro inyi ko geto inyia; O urohino inyi kejuha kunenge, o uroro. Faji na lo urohino inyi, o uroro ijia ko geto – o wei. ²⁸ I gigilo ba ngoto Sisera to lotupulec, to korwong lo igeniti i lolongo ba inyi. Nyio i rungo gadigadi nenge lotuno? Nyio i miningaru kigorita lo kejuha kulo gadigadi nenge? ²⁹ I nyiahahi kagenyani lo kariok katiyok kunenge o joo; Dede iti ringa manyu inyi tenya ake ake o joo, ³⁰ “Ida ba icieng o tahita ko kora sangite kuna lo beluni? Ngorwani kode ngorwo are iyo tungani lobito lobito, ko kyelani kuna i dwaruha kuna lo beluni ara kulo Sisera; Ko kyelani kuna i dwaruha, kuna li iti bibili kuna i dwaruha kulo murut nei; kuno fad lara sangite kuna lo beluni? ³¹ I ngohi merok kunino to keroro fad ji, olo Lahitok; Ati i ngohi cio fad kuna lohi maru isi o ri iya kolong, ka lo tuluno to golun nenge. To inyia i yoma kof to karihin keek ongon.