¹ Ari o fwonu cio kulo Israel i tiyi tohi na i rohoi to ketemoni lo Lahitok langun lo wei Ehud. ² Tona i co Lahitok icieng kac kulo Jabin kabu lo cio kulo Kanaan na lo lanyu kof lo Hazor, orumu Sisera lahitok lo karemok kunenge i tongo Haroses Hagoyim; ³ tona lo tehitare inyi gadigadihin mia mietangon kuna li kukumi to bilieta. Manyu iti gem inyi Israel to karihin keek are, i cira icieng diho Lahitok o joo o jir ki lwahi . ⁴ Naha Debora, kamocani, ngorwani lo lobo tungani lo bara Lapidos orumu lo bolorohi Israel to kuna faritin. ⁵ O tubita inyi lokiho fotiri lo Otit lo Debora na lo ngon kiji lo Rama ko Betel to kof lo donge lo Epraim, manyu o fworita cio kulo Israel ijia diho inyi o jir o ngoti lokihohin kuneicieng. ⁶ O cule inyi ifak diho Barak kito lo Abinoam to Kedes to kof lo Naptali ko jimitan diho inyi, "Ki cik Lahitok Lobanga lo Israel isi o joo, "I loo yaru cio alifi tomon to Naptali ko Zebulun i fwo ko icieng many donge lo Tabor. ⁷ A yaru cia nan Sisera karyengani lo karemok kulo Jabin ko gadigadihin kunenge ko karemok kunenge many kare lo Kision a co inyi kac kunino." ⁸ O joo Barak diho inyi, "Ka lohi liharu isi ko nan, a loo cia nan; ojo ka lida isi ki lik ko nan, ida cia nan a loo!" ⁹ O joo Debora diho Barak, "Dede ki lik cia nan ko isi. Ati to na kikoi li lotitare isi, ida cia kwatun ara nino tonyio i co cia Lahitok Sisera kana lo ngorwani." Tona o loo Debora ko Barak iya Kedes. ¹⁰ To ijia i lolong Barak cio kulo Zebulun ko kulo Naptali, oto cio alifi tomon o fwo ara inyi lo bolorohi icieng. I lik manyu Debora ko inyi. ¹¹ Tona orumu Heber Kenitani li ngohi cio kulo Kenit kulakude lotataha kulo Hobab ilesi lo Moses o loo o gurohi kema nenge o nyiha ko ciani na hitok na lo ngon Zaananim na lo nyiha ko Kedes. ¹² Ka lo rihohini Sisera o joo lo loo Barak kito lo Abinoam kai lo donge lo Tabor, ¹³ i lolongu Sisera karemok kunenge to Haroses Hagoyim iya kare lo Kision ko gadigadihin kunenge mia mietangon fad kuna li kukumi to bilieta. ¹⁴ Oto Debora ko jimitan diho Barak, "I loo, far na li cwarare Lahitok Sisera kana nino inyi ene. Ida Inyi Lahitok lo loo ketemoni nino?" Tona Barak ko ki culoro to donge lo Tabor ko kuna karemok alifi tomon li jifita inyi. ¹⁵ To kiwanyuno lo Barak, o lanyu Lahitok Sisera ko kuna gadigadihin kunenge ko karemok kunenge many i culuno Sisera to gadigadi nenge i fe to kejuha. ¹⁶ Iti rwangaru Barak gadigadihin ko karemok many Haroses Hagoyim many i fadari karemok kulo Sisera fad o ru lobo lo fur. ¹⁷ Oto hati Sisera i fe to kejuha many kema lo Jael, ngorwani lo Heber Kenitani tonyio o ngon afa ningoro kiji lo Jabin kabu lo Hazor ko cio kulo kaji lo oho Heber Kenitani. ¹⁸ O rute Jabin ki iti rico Sisera ko jimitan diho inyi, "Ou Lahitok nei, to rutu katua lo kema. Ke bang!" O rute inyi katua lo kema lo Jael i muhohi inyi inyi to linggit. ¹⁹ O joo Sisera diho inyi, "Ki ur kure nan, ki co ja kude kifi." O nga inyi buhula lo lei i co inyi o mat, i muhohi inyi ari. ²⁰ O joo Sisera diho inyi, "To woita agwala lo kema, ka lo lotu lobo tungani ki tifi isi o joo, "O ngon lobo tungani kaji?" to i joo, o ru". ²¹ Ati o dumu Jael ngorwani lo Heber biliet kiguri lo kema ko nyiol ko lyebaru caafi langun lo getoro inyi jio kulo niama ida o yen ken, ko guro onguleha i fa to angati ko angati many kof. Inyi ko weyaru. ²² Deudeu o goru Barak ara na lo tahita Sisera, manyu o loo Jael ki iti rico inyi. O joo inyi iyo Barak, "Ou ahi totorohi na tungani li tahita isi." Oto Barak ko rutoro katua lo kema ko inyi, ko rumuno Sisera na lo gur biliet onguleha lo wei. ²³ To lafar, o lanyu Lobanga Jabin kabu lo cio kulo Kanaan to ketemoni lo cio kulo Israel. ²⁴ I rioci kana lo Israel ken lo Jabin kabu lo Kanaan many i fade inyi.