¹ Ara afa kuno misihi kuna li ngohi Lahitok o temare kuno cio kulo Israel fad afa lida i mang rem to kof lo Kanaan. ² (I tiyi Inyi ene ara lo ki iti yena tee kulo Israel (kuna lo rihe ida o yen koditi lo rem o jir o yeniti, tonyio ida icieng o yen) koditi lo fworo jore) ³ Ara afa misihi kuna lo tong: kabuno kulo cio kulo Pelestina miet, cio kulo Kanaan fad, cio kulo Sidon ko cio kulo Hivi kuna lo manya kai lo dongecio kulo Lena many to donge lo Baal Hermon many Lebo Hamas. ⁴ O ngerihi icieng lo tema cio kulo Israel lo deya ka li jif ba icieng cik lo Lahitok lafa li co Inyi lohitwaha kuneicieng ara diho Moses. ⁵ O manya cio kulo Israel kiji lo cio kulo Kanaan, Hitit, Amor, Perez, Hivi ko Jebus. ⁶ O yem icieng tee kariok kulo kuna misihi i co manyu tee kariok kuneicieng diho tee rei kulo kuna misihi manyu i worati lobangahin kuneicieng. ⁷ I tiyi cio kulo Israel tohi na i rohoi to ketemoni lo Lahitok Lobanga neicieng o fwori i wori Baali ko Aserahin. ⁸ O curaru Lahitok ki longo kenite kuneicieng ko ki cwarahino icieng kac kulo Kusan Risasaim kabu lo kof lo Aram Naharim na lo lanyu Israel to karihin mietauni. ⁹ Ati ojo icieng i cira diho Lahitok, iti woju Inyi kalwahani neicieng Osniel kito lo Kenaz rece lo Kaleb na sidi na lo lotu o lwahu icieng. ¹⁰ O lotu Okorif lo Lahitok iyo inyi, o lotu inyi ara kangotoni lo tenyitenyi kulo Israel ko loro rem. I co Lahitok Kusan Risasaim kabu lo kof lo Aram Naharim kac kulo Osniel na lo lotu o lanyu icieng. ¹¹ O lotu kof i yoma to karihin keek ongon many o wei Osniel, kito lo Kenaz. ¹² O fwonu cio kulo Israel i tiyi tohi na i rohoi to ketemoni lo Lahitok ari, manyu to na tohi i rohoi li tiyi icieng i co Lahitok Eglon kabu lo Moab golun o lanyunore cio kulo Israel. ¹³ I yauno inyi cio kulo Amon ko cio kulo Amalek i morihino ko inyi, o lotu Eglon i burahino ki iti remo cio kulo Israel ko fworoti ki taluno kang lo otit. ¹⁴ I tong afa cio kulo Israel iyo lanyuno lo Eglon kabu lo Moab to karihin tomon ko mietauni. ¹⁵ O fwonu cio kulo Israel i cira diho Lahitok ari manyu o lotu Inyi i co icieng kalwahunoni, Ehud, tungani na ikakole kito lo Gera lo imanit lo Benjamin. O cule cio kulo Israel inyi loro ki fotohino mocoro diho Eglon kabu lo Moab. ¹⁶ Tona i dongu Ehud ngalem latubot na i koo angati ko angati na lara futi lobito ko nusu na lo subohi inyi komoc nenge ngati lo bongbong nenge iteten katua lo kyelani kunenge. ¹⁷ I fotohi inyi mocoro diho Eglon kabu lo Moab tungani na lorumu o jir noo. ¹⁸ Langun li fotohi Ehud mocoro o lahahi inyi cio kuna lo lwak ki yuhita o fwo. ¹⁹ Ati langun lo goru inyi faji lo lopidingahin morutok kuna lo nyiha Gilgal, o yitu inyi token iyo Eglon o joo diho inyi, "lahitok a ngon nan ko ifahit ilitit to isi." O joo kabu diho kaririak kunenge, "I fwo ki ngohi ohoi!" Icieng ko fworo i ngohi icieng. ²⁰ Ehud dong ko ki nyiharu diho inyi orumu i tongo ake kaji na lo ngon kai to kang lo okabwe nenge o joo diho inyi, "A ngon nan ko ifahit iyo Lobanga to isi." Ka lo wojuno kabu to seger nenge. ²¹ Ehud ko utuno ngalem latubot to kana ikajong nenge to bongbong lo ngati lo iteten o cuhore kocehe lo kabu ²² o diloro ko kiniefi lo ngalem fad katua o pul monyi kulo kabu ida Ehud o sutu ngalem i muhohi somia ngalem. ²³ Ehud ko rutoro sita i pungahi agwala lo kaji lo kai. ²⁴ Langun lo loo inyi, o fwonu karwaak kulo kabu o rumahi agwala i punga. O joo icieng, "Tolobo o rihe inyi o ngon sitare ijia katua lo kaji." ²⁵ Langun li til icieng kwiik, ida inyi o nga agwala lo kaji, o dumu icieng muhuta o ngaji agwala. To inyia o rumahi icieng lahitok neicieng o urohino kiji lo kaji ara na lo wei. ²⁶ O rihe icieng i tila, o loo Ehud. O ringe inyi ara inyia iyo lopidingahin kulo morutok, o rwe many Seira. ²⁷ Langun lo goru inyi ijia ko kuta ture to kof lo donge lo Epraim, oto cio kulo Israel o sutuno ko ki culoroti to dongecio ara inyi li temitare icieng. ²⁸ O rihohi inyi icieng o joo, "Ki jifuti nan tonyio li co Lahitok merok kuningi Moab kac kuningi." Oto icieng ko ki jifaru inyi o fwori i temohinoti ladoketi kulo kare lo Jordan kuna lo rangaritarehin iya kof lo Moab, ida icieng o lahahi lobo tungani o rang. ²⁹ Tona i fade icieng cio kuna lo tum alifi tomon kulo Moab, cio kuna i goli manyu i lotiri, o ru lobo bito lo fur. ³⁰ Lafar o fwonu Israel o lanyu cio kulo Moab manyu i yoma kof to karihin keek mietauni. ³¹ To kifwongi lo Ehud o lotu Samgar kito lo Anas na li fade cio mia ile kulo Pelestina to igolit kitibali lo mongi, o lotu manyu inyi o lwahu cio kulo Israel.