¹ O loo Malaika lo Lahitok to Gilgal many Bokim o rihohi cio o joo, “Ahi yauno afa nan ite to kof lo Ijipt, ahi yauno kof lafa la buti nan diho fafaicio kuningi. A joo nan, “Ida cia nan a gil ciharu nei ko ite.” ² manyu o jir ite ida i ciharu ko cio kulo ene kof ati o jir ite i buny cialitok kuneicieng. Ati i fwonu ite iti bahas tenya nei. Nyio i tiyi ite ji? ³ Manyu a lotu nan a joo, ida cia nan a fuhe icieng oleng to ketemoni ningi, ara cia icieng kilohita ningi manyu o fwonu cia lobangahin kuneicieng ara kilabita ningi.” ⁴ Ka lo teny Malaika lo Lahitok kuno tenyitenyi diho Israel fad, i cira cio to ogoroho kuna i kwati; ⁵ O fwonu icieng iti barahi na faji o joo Bokim, to inyia i fotohi icieng kikumita diho Lahitok. ⁶ Langun li iti sara Josua cio kulo Israel to lotubare, o fwo icieng tero fajihit kuneicieng lobito lobito iyo kof na li caahini imanit nenge ara lolunyot. ⁷ I rwaa cio kulo Israel Lahitok to warun lo Josua fad ko kulo ngoroyok kuna lo gal inyi kulafa lo deu sangite kuna hitoha kulafa li tiyi Lahitok to cio kulo Israel fad. ⁸ O wei Josua kito lo Nun karwaani lo Lahitok orumu lo goru karihin kunenge mia lobito ko tomon. ⁹ manyu o nuhahini inyi kof lolunyot nenge na lo ngon Timnas Heres iyo kof lo donge lo Epraim ngati lo kai lo donge lo Gaas. ¹⁰ Langun li furoro na kofiangiti fad diho fafaicio kuneicieng, lo weiha, o lotu kofiangiti na lida o yen kode Lahitok kode tohi na li tiyi Inyi to cio kulo Israel. ¹¹ Oto Israel ko ki tiyo tohi na i bot to konyieha kulo Lahitok i rwaati Baali. ¹² I ngohi icieng Lahitok Lobanga lo fafaicio kuneicieng na li yauno icieng to kof lo Ijipt. I jif icieng manyu i worati lobangahin gelegele kulo cio kuna li rit icieng. Iti woju icieng kilongo lo Lahitok ¹³ tonyio li ngohi icieng Inyi, i worati Baali ko Astoreshin. ¹⁴ To kilongo Nenge iyo cio kulo Israel, i co Lahitok icieng iyo kac kulo kakatak kuna lo bel icieng. Iti lotohi Inyi icieng kac kulo merok kuneicieng kuna li rit icieng, kuna lida icieng o rihe o tum lanyuno. ¹⁵ Lobo far keken ka lo fwo Israel rem, i rioci kana lo Lahitok ngati neicieng lo lanyuno icieng iya lafa lo cihare Inyi token. O ngoni dong icieng iyo ki udo ko kidak na hitok noo. ¹⁶ Oto Lahitok iti woju kangotok kulo tenyitenyi kuna lo lwahu icieng to kac kulo kuna kakatak. ¹⁷ Oto hati ida manyu icieng o ningo kangotok kulo tenyitenyi kuneicieng, ati o fwori ki wora lobangahin kude ake to ticitici kulo somun manyu o rubuhiti ketemok kuneicieng. I belo icieng deudeu to kikoi lo lohitwaha kuneicieng kulafa lo ningo cik lo Lahitok. ¹⁸ Ka lo nyumu afa Lahitok kangotoni lo cik to kiji neicieng, o ngon afa Inyi ko la tungani manyu o lwahu icieng to kac kulo merok kuneicieng ka lo rihe na kangotoni lo tenya o war tonyio i nief afa kisa Lahitok to icieng ka li tudita icieng to ki iti gema na li iti gemare kasongarek kuneicieng icieng. ¹⁹ Ati ka lo wei kangotoni lo tenya, o yitorita icieng iyo kuna kikoihin kuneicieng kuna i rohori i lany ko kulo fafaicio kuneicieng lo ki jifita lobangahin kunakude ko ki wora icieng. Ida icieng i ruk ki ngohino kuna; ki tiyo kuna ticitici kuneicieng lo kiwora lobangahin kude ake ko sodoro ko kuna ticitici kuneicieng i boti. ²⁰ Tona i longo Lahitok diho cio kulo Israel noo many o joo, “Tonyio lo gil ene misi cik Nitole lafa lati gol Nan ko lohitwaha kuneicieng, manyu ida ki ningo Nan, ²¹ ida cia Nan a rihe a fuhe kuno misihin afa li totongohi Josua lafar lo weyarore inyi to ketemoni neicieng. ²² A tiyore cia Nan icieng lo tema cio kulo Israel ka lo tumiti rica tahita kikoihin kulo Lahitok iya na afa li tiyo lohitwaha kuneicieng.” ²³ I co Lahitok kuna misihi o tong, ida afa Inyi i fuhe icieng ara lobito to ki cwara icieng kac kulo Josua.