¹ To kifwongi lo wei lo Josua, i tifi cio kulo Israel Lahitok o joo, “Ani imanit to kiji niyang lo jir i tem fworo rem ko cio kulo Kanaan?” ² I nyiahahi Lahitok icieng o joo, “O jir Juda o loo, la co Nan kof kana nenge.” ³ Cio kulo Juda ko jimitan diho cio kulo imanit lo Simeon, Israel kaletok, “Ki fwo ko ohoi iyo kof na lohi caahini ohoi ki iti remo cio kulo Kanaan, ki fwo manyu cia ohoi ko ite iyo ningi.” Oto cio kulo imanit lo Simeon ko fworo ko icieng. ⁴ Ka lo fwo cio kulo imanit lo Juda rem, i co Lahitok cio kulo Kanaan ko cio kulo Perez kac kuneicieng, manyu i fade icieng cio alifi tomon to Bezek. ⁵ Ara afa ijia o rumunore icieng Adoni Bezek o remiti ko inyi, o lanyu icieng cio kulo Kanaan ko cio kulo Perez. ⁶ I fe Adoni Bezek ati iti rwangaru icieng inyi o fwori i niefuni ko ngutoro kafiela kuna hitoha kulo kac ko kulo kejuha. ⁷ Oto Adoni Bezek o joo, “Kabuno keek mietare kuna lo ngutori kafiela kuna hitoha ko kulo kejuha i numo daha to fotiri lo meja nei. Jijia lohi dumahi Lobanga nan tohi na la tiyi nan diho icieng.” I yauno icieng inyi Jerusalem o lotu o weihi ijia. ⁸ Iti rem cio kulo Juda Jerusalem i taluni manyu, i fade icieng cio kuna lo ngoni ijia ko curaroti kang to kima. ⁹ To kifwongi lo na, o fwo cio kulo imanit lo Juda rem ko cio kulo Kanaan kuna lo manya kof lo donge, Negev, ko gum lo dongecio kulo ngati lo lodoyorore lo kolong. ¹⁰ O fwo icieng ki iti remo cio kulo Kanaan kuna lo manya Hebron (lafa lo bara Kirias Arba) manyu o lanyuni Sesai, Ahiman ko Talmai. ¹¹ To inyia o fwori ki iti remo cio kuna lo manya Debir (lafa li lolongoti o joo Kirias Seper). ¹² Oto Kaleb o joo, “A co cia nan kito nei Aksa ara ngorwani diho tungani na lo rem i talu Kirias Seper. ¹³ I talu Osniel kito lo Kenaz la lara rece lo Kaleb, oto Kaleb ko ki cwara kito nenge Aksa ara ngorwani diho inyi. ¹⁴ To far na lo lotunore inyi diho Osniel, o tan inyi Osniel ki lifa apa nenge mana. Ka li culuno inyi to sigiria nenge, i tifi Kaleb inyi o joo, “Nyio nga tum nan ki tiyo diho isi?” ¹⁵ I nyiahahi inyi apa nenge o joo, “Ki tiyihi nan tohi na i cam noo. Iya na li cwarare isi nan kof to Negev, ki co manyu nan ipulahi kulo kifi.” Tona i co Kaleb inyi ipulahi kulo kai ko kulo kof fad. ¹⁶ O fwo lotataha kulo komoni lo Moses, cio kulo Keniz to kang lo lit ko cio kulo Juda manya ko cio kulo kuny lo Juda Negev o nyiha Arad. ¹⁷ To inyia o fwo cio kulo Juda ko kulo Simeon, Israel kaletok kuneicieng iti rem cio kulo Kanaan kuna lo manya Zepas ko keruno na kang tur tona i lolongi na faji o joo Horma. ¹⁸ I talu manyu cio kulo Juda Gaza, Askelon, ko Ekron – kang lobito lobito ko kof nenge. ¹⁹ O ngon afa Lahitok ko cio kulo Juda. I talu icieng kof lo dongecio ati ida afa icieng i fuhe cio kuna lo manya oleng tonyio o ngoni orumu icieng ko gadigadihin kuna li kukumuni to bilieta. ²⁰ Iya na lo cihare Moses, i ciori Hebron diho Kaleb na lo lotu i fuhe tee kulo Anak uni to ijia. ²¹ Oto hati cio kulo imanit lo Benjamin ida i fuhe cio kulo Jebus to Jerusalem, ko jijia o manya cio kulo Jebus ijia ko cio kulo Benjamin. ²² Tona o fwo imaniti kulo Josep o rem Betel manyu orumu Lahitok o ngon ko icieng. ²³ Ka lo cule icieng cio lo fworo sifa Betel (na lorumu o bara Luz) ²⁴ O deu kula kasifak tungani o lotuno to katua lo kang oto icieng o joo diho inyi, “Ki totorohi ohoi kikoi na ngohi rutorore kang hatua ki ito cia ohoi ki de jimitan ki tiyi isi ara na i jir.” ²⁵ Inyi ko ki totorohino icieng, icieng ko fworo ki fadaru cio to katua lo kang fad ati i ngohini na tungani ko cio kulo kalenge fad. ²⁶ Inyi ko johoro iya kof lo cio kulo Hitit, faji na lo loo inyi o duhohi kang na li iti barahi inyi o joo Luz na lara karana nenge ko jijia. ²⁷ Ati ida afa cio kulo Manase i fuhe cio kulo Bet San kode Tanak kode Dor kode Ibleam kode Megido ko lomanyarehin kuna li rit icieng, tonyio o golu afa cio kulo Kanaan manya na kof. ²⁸ Ka lo sodo golun lo cio kulo Israel, i fudahi icieng cio kulo Kanaan tic lo panyar ati ida i fuhe icieng tur. ²⁹ Ida manyu cio kulo Epraim i fuhe cio kulo Kanaan kuna lo manya Gezer, ati o sodoro cio kulo Kanaan manya ijia kiji neicieng. ³⁰ Ida manyu cio kulo Zebulun i fuhe cio kulo Kanaan kuna lo manya Kitron kode Nahalol, tona o manya kuna cio kulo Kanaan kiji neicieng ati i fudahi cio kulo Zebulun icieng tic lo panyar. ³¹ Ida manyu cio kulo Aser i fuhe kuna lo manya Ako kode Sidon kode Ahlab kode Akzib kode Helba kode Apek kode Rehob. ³² O manya cio kulo imanit lo Aser kiji lo cio kulo Kanaan tonyio ida orumu icieng o tum ki fuharu icieng oleng. ³³ Ida manyu cio kulo Naptali i fuhe kuna lo manya Bet Semes kode Bet Anas, o manya manyu cio kulo Naptali kiji lo cio kulo Kanaan kuna afa lara cio kulo na kof, ko kuna lo manya Bet Semes ko Bet Anas o fwonu ara katiyok kulo panyar diho icieng. ³⁴ I tihohi cio kulo Amor cio kulo Dan kai lo dongecio ida o lahahi icieng o fwonu oleng. ³⁵ O goritare manyu cio kulo Amor dongecio kulo Heres, Aijalon ko Saalbim ati ka lo sodo golun lo imaniti kulo Josep, i fudahini manyu icieng iyo tic lo panyar. ³⁶ I ciaha afa lohikori lo cio kulo Amor to lohirwohorore lo Akrabim many Sela o ring.