¹ To kunu faritin orumu o ru kabu iyo cio kulo Israel. Tona lobo tungani lo imanit lo Levi na lo manya kang na i loma noo to kof lo donge lo Epraim orumu i yaru ngorwani nenge na lara karwaani to Betelehem lo Judea. ² Ati ida inyi i genoro iyo retoni nenge, i ngohi inyi retoni nenge o yite kang diho katomonok kunenge Betelehem lo Judea. Langun li tong inyi ijia to ofahin ongon. ³ o loo retoni nenge diho inyi tana inyi o jir o yitu. O loo inyi ko karwaani nenge ko sigiriahin are. I fotu inyi retoni nenge i yaru kolo katomonok kunenge. Ojo apa nenge o deu komoni nenge, i fotu inyi to kwama. ⁴ O rihohi komoni nenge inyi o joo o jir re i tongo. Oto inyi i tong ijia faritin uni, o daha, o mata, o geto manyu ijia. ⁵ To far lo ongon o woju icieng berien i kukumahinoti ara lo lotita ati o joo apa lo na ngorwani diho komoni nenge, “Ito nyia lobo daha i fworore.” ⁶ Oto inyi ko komoni nenge i tongohinoti o nyai daha manyu o mati vino ara lobito. To kifwongi o joo apa lo na ngorwani, “To get ja ene karue keken i yoma.” ⁷ Ojo lerok lo woju ara kalotitani o tan komoni nenge inyi, i ruk manyu inyi geto na karue. ⁸ To kiwanyi lo far lo miet, langun lo wak inyi lotita. O joo apa lo na ngorwani diho komoni nenge, “Ito nyia re lobo daha, i tila i fwo cia kurou!” Tona o daha icieng ara lobito. ⁹ Langun lo woju lerok ko ngorwani nenge ko karwaani nenge lo wahiti lotita, o joo komoni nenge, apa lo na ngorwani, “To de lara kof kurou. Ito get ene tonyio lo ru elefar. I tongoti i yoma, kiwanyi berien i tum ite wojuno i fwo iya kang.” ¹⁰ Ati tona lida inyi o wahare geto ari, o woju lerok o loo iya kang lo Jebus (na lara Jerusalem) ko sigiriahin kunenge are ko ngorwani nenge. ¹¹ O joo icieng lo nyiha Jebus manyu lo mutohuno kof, o joo karwaani diho lahitok nenge, “Ou lohi fwo ene kang lo cio kulo Jebus ki get ijia.” ¹² I nyiahahi lahitok nenge inyi o joo, “Ida. Ida ohoi ki tum fworo kang na lida ara lo cio kulo Israel, nga iti ringe iya Gibea.” ¹³ O sodoro inyi tenya o joo, “Ou nga iti tem goruno Gibea kode Rama ki fwo ki get iyo lobo kang to kiji neicieng.” ¹⁴ Oto icieng o ringe, manyu o doyoro kolong na lo gorunore icieng Gibea kof lo cio kulo Benjamin. ¹⁵ O fwo icieng kang hatua ara kagetok ijia. O fwo icieng i tongoti par lo kang, ati o ru lobo tungani li yaru icieng kalenge. ¹⁶ Na kurou o lotu lobo tungani ngoroyoni lo kof lo donge lo Epraim na lorumu o manya Gibea (na lara cio kulo na kangite kulo imanit lo Benjamin) to mana nenge. ¹⁷ Ka lo ngolo inyi o deu kuna kalotitak to par lo katua lo kang, i tifi na ngoroyoni icieng o joo, “Aji ite i fworo? Adi ite i fwonu to aji?” ¹⁸ I nyiahahi na Levini inyi o joo, “Ki fwonu ohoi to Betelehem lo Judea ki fworo kang na i loma noo lo kof lo donge lo Epraim, faji na la manyare nan. A loo afa nan Betelehem lo Judea, manyu jijia a loro nan kaji lo Lahitok. O ru tungani lohi fotu nan kalenge to ene karue.” ¹⁹ Ki ngoni ohoi ko ngarum ko nyiari kuna i towi ara daha lo sigiriahin kuniyang, ko mugati ko vino, daha lo kenite kuniyang; nan ko ngorwani nei ko ene lokilahaji lohi ngon ko ohoi. Ida ohoi ki wak lobo tohi.” ²⁰ O joo na ngoroyoni diho icieng, “Ahi fotu nan ite kalitole, i ngohi ahi co nan ite tohi na li wak ite. Ke get hati par.” ²¹ Oto na ngoroyoni i yaru inyi ko cio kunenge kalenge, o loo i co sigiriahin kunenge daha. Langun lo keru icieng ki lala kejuha kuneicieng, oto icieng ko daha ko mata. ²² O rihe icieng i yoma to kwama, o fwonu kude karohojak kulo na kang i rit kaji na lo ngoni icieng. O cihoti agwala, i goritati diho na ngoroyoni monye lo kaji o joo, “I yauno na tungani lo lotu kaji nino ki getore ohoi.” ²³ O rute na monye lo kaji oleng o loo o joo diho icieng, “Ida, morot kunei, ke rohori ji. Iya ene la rahare ene tungani weloni nitole, ke tiyi na tic i bot. ²⁴ To de o ngon kito karioni nei na lo rihe ida li tongo ko retoni ko ngorwani nenge, a yauno jijia nan oleng diho ite jijia. I tum ite ki tiyore icieng, i tiyi diho icieng tohi na li wak ite. Ati to ene tungani, ke tiyi tohi na i bot ken nenge.” ²⁵ Ati ida kuna cio o ningo inyi. Tona o dumu na tungani ngorwani nenge o culahi oleng diho icieng, oto icieng i songare inyi manyu i nywari inyi mwaa o lahahini inyi tomorong. ²⁶ To kiwanyi o loo na ngorwani iya na kaji lo ngonore retoni nenge, ko urohino agwala o geto ijia many o tulu kolong. ²⁷ Ka lo kwenyu retoni nenge kiwanyi o nga agwala lo kaji o rutu oleng, o wak sodoro ko lotita nenge. O rumahi ngorwani nenge o urohino, o geto agwala ko kac kunenge lohileleri lo agwala. ²⁸ O joo retoni nenge diho inyi, “To woju, lohi lot.” Ati ida inyi i fotu tenya nenge, tona lerok ko tingohino inyi kai lo sigiria ko ki ciaha lotita iya kang. ²⁹ Ka lo goru inyi kalenge, o dumu inyi ngalem ko ki ngunguto ngorwani nenge bongibongi ko okokoho ko ken fad ko cularu kuna ingutiti kunenge tomon ko are fajihit pili kuna lo manya cio kulo Israel. ³⁰ Cio fad kuna lo deu ene tohi, o tenyati kiji neicieng ake ake o joo, “Ida koditi lo ene tohi lo boto kode li tiyihino many to far lo fwonuno lo Israel to kof lo Ijipt. I na i yioto ba! O wak ohoi ki tiyi lobo tohi! Dong ito tenyati!”