¹ Tona o fwonu cio kulo Israel fad many to Dan many Beerseba, ko many to kof lo Gilead ko fwonunoti iya tungani lobito ko tubati ketemoni lo Lahitok Mizpa. ² O fwonu kulahitoha kulo cio kulo imanti kulo Israel fad o fwori faji neicieng iyo lotubare lo cio kulo Lobanga, cio alifi mia ongon kuna lo tehita ngalemo latuboti. ³ (O ning cio kulo imanit lo Benjamin o joo lo fwo cio kulo Israel Mizpa). Oto cio kulo Israel o joo, “Ki rihohi ohoi koditi na li tiyihinore ene tenya i bot.” ⁴ Oto na Levini retoni lo na ngorwani li fadari o joo, “Ki fwonu ohoi ko ngorwani nei Gibea geto. ⁵ Karue o fwonu cio kulo Gibea ki jifuno nan i riti na kaji la taware nan, ki wahiti ki fadaru nan. O fwori o getorehin ngorwani nei many o wei. ⁶ A dumu nan ngorwani nei ko ki ngunguto a culahi ingutiti kofikofi lolunyot kulo Israel tonyio i tiyi icieng ene tohi i rohoi i bot to Israel. ⁷ Jijia ite cio kulo Israel ito tenyati bo, ki rihohi nan tohi na li wak ite ki tiyo.” ⁸ O woju cio fad ara lobito, manyu o jimi, “O ru lobo tungani to kiji niyang lo yite iya kang nenge. ⁹ Ati jijia tohi na cia lohi tiyi ohoi iyo kang lo Gibea inyi ene: Ki fwo cia ohoi rem ijia iyo koditi na lohi birore tobotobo. ¹⁰ Ki dumu cia ohoi cio tomon iyo mia lobito to kiji lo cio kulo Israel fad ko mia iyo alif, ko alif iyo alifi tomon lo fworo ki tutubuno daha diho karemok. Oto hati ka lo goru karemok Gibea lo Benjamin o jir i co icieng tohi na lo cam to icieng to ene tic i bot li tiyi icieng to kof lo Israel. ¹¹ Oto cio kulo Israel o woju ara lobito i moraroti to tuban lo ki iti remo na kang. ¹² O cule imaniti kulo Israel iyo kangite kulo cio kulo imanit lo Benjamin fad o joo, “Aja ene kipal hitok i tiyihino kiji ningi? ¹³ Jijia i yaunoti kuna cio kulo Gibea i rohori iyo ohoi o jir ki fade icieng, ki lale ene kibot to Israel.” Ati ida cio kulo Benjamin o ning tenya lo cio kulo Israel kaletok. ¹⁴ O tubunoti to kangite kuneicieng Gibea lo fwonuno rem ko Israel. ¹⁵ Tona cio kulo Benjamin ko ki tutubuno cio alifi keek are ko ile kulo ngalemo latuboti to kangite kuneicieng i morahini ko cio kilahaji karemok mia mietare kuna lorumu lo ngoni Gibea. ¹⁶ To kiji lo kuno karemok fad, orumu o ngoni karemok mia mietare kuna lo nyumuni kuna ikajongi kuna lo tum lobito lobito ngororo moru fotiri lo fofiti ida o diak. ¹⁷ Cio kulo Israel kuna lida ara kulo imanit lo Benjamin, i tutubu cio alifi mia ongon kuna lo tehita ngalemo latuboti, kuna lara fad karemok kuna lo tumohino to jore. ¹⁸ O fwo cio kulo Israel Betel ki tifia Lobanga o jimi, “Ani imanit to kiji niyang lo jir i tem o loo ki iti remo cio kulo imanit lo Benjamin?” I nyiahahi Lahitok o joo, “Juda lo jir i tem.” ¹⁹ Kiwanyi nenge o woju Israel o fwo o gurohi taban o nyiha Gibea. ²⁰ O fwo cio kulo Israel ki iti remo cio kulo Benjamin, o fwo o pariti loparare lo rem ijia Gibea. ²¹ O rutu karemok kulo Benjamin to Gibea ko ki fadaru karemok kulo Israel alifi keek are ko are to par lo rem la far. ²² Ati iti gol karemok kulo Israel taulo ake ake ko fworoti parun langole faji lo parare icieng to far lo ketemoni. ²³ O fwo cio kulo Israel i cirati to ketemoni lo Lahitok many kurou, manyu i tifi icieng Lahitok. O joo icieng, “O jir ohoi ki fwo rem ko cio kulo imanit lo Benjamin Israel kaletok kuniyang?” I nyiahahi Lahitok o joo, “I fwo rem ko icieng.” ²⁴ Oto cio kulo Israel i swalahi cio kulo Benjamin far lo are. ²⁵ To lafar ojo cio kulo Benjamin o rutu to Gibea rem ko icieng, i fade icieng cio alifi tomon ko mietauni cio kulo Israel kude fad cio kagolok to rem. ²⁶ Oto cio kulo Israel, karemok fad ko fworo iya Betel. O fwori i tongoti ijia i cirati to ketemoni lo Lahitok, o faran icieng ko kinga la far many kurou. Manyu i fotohini kiciorita locurat ko kiciorita lo kimoraru diho Lahitok. ²⁷ Manyu i tifi cio kulo Israel Lahitok, (To kula faritin o ngon afa Sanduk lo Cik lo Lobanga ijia, ²⁸ ko Pinehas kito lo Eleazar lotata lo Aron i rwaa ketemoni nenge.) i tifi icieng o joo, “O jir ohoi ki fwo ko cio kulo imanit lo Benjamin, Israel kaletok kuniyang?” I nyiahahi Lahitok icieng o joo, “I fwo, manyu a ciorihi cia Nan icieng kac kuningi kiwanyi.” ²⁹ To inyia o fik Israel karaak mar lo Gibea. ³⁰ O fwo icieng ki iti remo cio kulo Benjamin far lo uni, ko parun ketemoni lo Gibea iya na orumu li tiyore icieng berien. ³¹ O fwonu cio kulo Benjamin ki iti remo icieng, oto ko labaroti icieng to kang. I ciak icieng ki fada karemok kulo Israel iya langole berien, i fadari cio keek uni iyo loremore iyo kikoi na lo loro iya Betel, nu o loro Gibea. ³² Ka lo tenya cio kulo Benjamin to taulo o joo, “Ki lanyuno ohoi icieng iya langole.” Cio kulo Israel i dima to taulo o joo, “Ngati labe icieng o lomaha to kang iya kikoihin.” ³³ I fe karemok kulo Israel to fajihit kuneicieng fad ko fworoti tuhohino to Baal Tamar, oto karaak kulo Israel ko ki buruno to loraare neicieng to lodoyorore lo kolong lo Gibea. ³⁴ Oto kilahaji karemok kulo Israel alifi tomon ko fwonuno rutoro ki iti remo Gibea. O gol afa rem noo ida ko cio kulo Benjamin o yen jimitan lo nyiha keroro neicieng. ³⁵ O lanyu Lahitok imanit lo Benjamin to ketemoni lo cio kulo Israel, manyu to lafar i fade karemok kulo Israel karemok kulo Benjamin alifi keek are ko miet ko mia lobito karemok kuna i goli. ³⁶ To inyia cio kulo Benjamin ko deuno jimitan lohi lanyuni icieng. Oto hati orumu cio kulo Israel li co cio kulo Benjamin kikoi to na lo raare icieng o nyiha ko Gibea. ³⁷ Kuna orumu lo ngoni loraare ko ki pusuno katua lo Gibea, i sarihini ko ki fadaru cio to kang hatua fad. ³⁸ Orumu cio kulo Israel o cik karaak jimitan o jir icieng iti furuhi kang. ³⁹ manyu o jir Israel i belunore rem. Orumu cio kulo Benjamin li ciak ki fada cio kulo Israel (kuna lo tum keek uni) orumu icieng lo joo,"Ki lanyuno ohoi icieng iya to langole rem lo ketemoni." ⁴⁰ Ati ojo furo o dudungaru iya kai to katua lo kang, i belo cio kulo Benjamin o deuni lo furu kang fad iya kai. ⁴¹ Oto cio kulo Israel i belohino jore cio kulo Benjamin ko bangun, tonyio lo yen icieng jimitan lo lotu keroro diho icieng. ⁴² Tona i fe icieng to ketemoni lo Israel iya mwang ati ida icieng o tum furan to rem. Manyu i fadahi kunu cio kulo Israel lo rutu to katua lo kang icieng inyia. ⁴³ I rit icieng cio kulo Benjamin, iti rwangaru icieng manyu iti horu icieng kalele lo Gibea to ngati lo okangere. ⁴⁴ O wei cio kulo Benjamin alifi tomon ko mietauni fad, cio kuna lara karemok kuna i goli. ⁴⁵ Ojo icieng i belo i fe iya ngati lo mwang iya locolong lo Rimon, i fad karemok kulo Israel icieng alif miet kikoihin. Iti ring icieng ki iti rwangaru cio kulo Benjamin many Gidom, manyu i fadari alifi are kulakude. ⁴⁶ To la far i fadari karemok kulo Benjamin alifi keek are ko miet, icieng fad karemok kuna i goli. ⁴⁷ Ati i belo mia ile i fejari iya mwang many locolong lo Rimon o fwori i tongoti ijia to ofahin ongon. ⁴⁸ O yite cio kulo Israel kof lo cio kulo Benjamin ko ki fadaru cio to katua lo kangite fad ara lobito ko sang ko sangite pili kuna lo rumu inyi. Ko curaru kangite fad kuna lo goru icieng.