¹ Tona lobo tungani to kof lo donge lo Epraim lo bara Mika, ² ko jimitan diho iyang nenge, "Kulafa sekeli kulo rial alif lobito ko mia lobito lo dumari diho isi la ning nan isi i ficio, a tehita nan na rial; nan la dume." ³ Ka li nyiahahi inyi kuna sekeli alif ko mia lobito kulo rial diho iyang nenge, o joo iyang nenge, "A fotohi nan rial nitole to rima diho Lahitok o jir kito nei o duhunore lopidinga na lo dwanyi to rial, ahi nyiahahi nan isi." ⁴ Tona langun li nyiahahi inyi na rial diho iyang nenge, o dumu iya nenge sekeli kulo rial mia are i ciorihi kadongoni lo rial, na li tiyore inyi i dongunore lopidinga na li cidohini kaji lo Mika. ⁵ Tona orumu ene tungani lo bara Mika o ngon ko tifine manyu i kukumu Epod ko kude lobangahin kulo kalenge lara lopidingahin ko fihahino kito nenge lobito ara kadwarani nenge. ⁶ To kunu faritin orumu o ru kabu iyo cio kulo Israel: I tiyo cio iya na lo wak icieng. ⁷ O woju lobo lokilahaji lo imanit lo Levi to Betelehem kof lo Judea na lorumu o manya iyo na imanit ⁸ o taharu lomanyare lobo faji ake. Iyo lotita nenge o goru inyi kolo Mika na lo ngon kof lo donge lo Epraim. ⁹ I tifi Mika inyi o joo, "I lotu isi to aji?" I nyiahahi inyi o joo, "Nan tungani lo imanit lo Levi na la lotu to Betelehem lo Judea, a tahita faji lomanyare." ¹⁰ To inyia o joo Mika diho inyi, "To manya ene diho nan ira apa ko kadwarani nei ato cia nan ahi co isi sekeli tomon kulo rial to kari, kyelani kunino ko daha nino." ¹¹ Tona i ruk na lokilahaji Levini manya kalenge, manyu o lotu na lokilahaji Levini o ri iya lobito to kiji lo tee kunenge. ¹² Oto Mika ko diro na Levini, o lotu na lokilahaji ara kadwarani nenge manyu o manya kalenge. ¹³ Oto Mika o joo, "Jijia a yen nan a joo o jir cia Lahitok diho nan tona larahare ene Levini kadwarani nei."