¹ Lobo far, o loo Samson iya Gaza faji na lo deunore inyi lobo mulayani. O loo inyi geto ko inyi na karue. ² O rihohini cio kulo Gaza o joo, “O ngon Samson ene!” Oto icieng ko ki rita na faji o getoti karue fad lokoli lo kang. Ida icieng i halinga karue o tenyi o joo, “Ki fade cia inyi tomorong.” ³ Ati o get Samson ijia o goru tuk lo karue keken. Oto inyi ko wojuno o loo iti jijik kigeni lo lokoli ko dutaru fad ko kigingihin kunenge fad, ko ryongohino okoko o tingoro many lobo donge sidi li lomo Hebron. ⁴ Kude faritin to kifwongi o dam tau nenge lobo ngorwani to ridat lo Sorek lo bara karana Delila. ⁵ O fwo kalanyunok kulo Pelestina o joo diho inyi, “To de ba ka li tum isi laba inyi ki rihohi isi ilitit lo detore lo golun nenge, jimitan ngo tum cio lanyuno inyi ko tora inyi aja? Ki co cia ohoi isi to lobito tungani riali alif lobito ko mia lobito.” ⁶ Tona o joo Delila diho Samson, “Ki rihohi nan ilitit lo golun nino, koditi na ngohi torarehin manyu ki lanyunorehin isi.” ⁷ I nyiahahi Samson inyi o joo, “Ka lohi tor tungani nan to kofi kulo kawo mietare kuna lo rihe ara ngejuho ida lo towi, ato cia nan a lotu a fotahino iya cio kulakude.” ⁸ Oto kalanyunok kulo Pelestina i yauno kofi kulo kawo kuna lo rihe ida lo towi mietare o torare inyi Samson. ⁹ O rumu cio i duha kudule lo kaji, o joo inyi diho inyi, “Samson lo fwonu cio kulo Pelestina ki niefa isi! Ati o dung inyi kuna kofi kulo kawo mejo o tiri to lairan lo kima. Tona o rihe ilitit lo golun nenge ida lo rumahino. ¹⁰ To inyia o joo Delila diho Samson, “Lohi iti date isi nan, lohi iti nonong isi nan. Ou dong jijia ki rihohi nan koditi na ngohi torarehin isi.” ¹¹ O joo inyi, “Ka lohi tor tungani nan rod to kofi ngejuho kuna lo rihe ida lo temi, ato cia nan a fotahino iya cio kulakude.” ¹² Tona o dumu Delila kofi ngejuho o torare inyi. Oto hati ko cio i duha kudule lo kaji, i gore diho inyi o joo, “Samson lo fwonu cio kulo Pelestina ki niefa isi!” Ati o dung inyi kuna kofi to kana nenge mejo ara usihin. ¹³ To inyia Delila ko jimitan diho Samson, “Kuno faritin fad ki iti dataru isi ko ki iti nononga nan. Ki rihohi nan koditi na ngohi torarehin isi.” I nyiahahi inyi o joo, “Ka li kadahi isi kuno ikaditi kulo fofi kunei mietare iyo lohikadare lo kyelani ito hati i bohohi o toc ara lobito ko usi iyo kyela i niefahino otoc, ato cia nan a fotahino iya cio kulakude.” Tona ojo inyi o getoro, Delila ko dumuno kuna ikaditi kulo kue nenge mietare i kadahi iyo usihin kulo kyela ¹⁴ ko bohohino to kitigolita otoc. Ari i lolong inyi o joo, “Samson lo fwonu cio kulo Pelestina ki niefa isi!” Inyi ko kwenyuno i pihu fofi kunenge to lohikadahinore lo kyela. ¹⁵ To inyia o joo diho inyi, “Aja i joo isi diho nan, “Ahi maru nan isi” ati hati ida ki geno nan to tau nino fad? Lara kakeny lo uni ene na lohi iti datare isi nan ida ki rihohi nan ilitit lo lodetore lo golun nino.” ¹⁶ Tona kififida o tum na ngorwani inyi to tenya tiktik, many o tum tenya inyi many o sohona to tau nenge na lo tum wei. ¹⁷ Tona ko rihohino inyi sangite fad o joo, “Ida lo tiri kue nei to kidyeli, tonyio ara nan Nazaritani na li fotohini diho Lobanga many to kocehe lo iyang nei. Ngo giti kue nei golun nitole ko ngerihino nan, nan ko fotahino iya cio kulakude fad.” ¹⁸ V18 Ka lo deu Delila jimitan lohi rihohi inyi inyi sangite fad, oto o cule tenya diho kalanyunok kulo Pelestina o joo, “Ito yitu ba ari, lohi rihohi inyi nan sangite fad.” Tona o yitu kalanyunok kulo Pelestina ko rial to kac kuneicieng. ¹⁹ Langun li iti getohi inyi lerok o getoro iyo bongibongi kunenge, i lolongu inyi lobo tungani o lotu o gite ikaditi kulo fofi kunenge mietare to kue. Tona ko lanyunoti inyi, i ngohi golun nenge inyi. ²⁰ Oto ko ki lolongo inyi o joo, “Samson lo fwonu cio kulo Pelestina ki niefaru isi!” O kwenyu inyi to jio i yio o joo, “A lanyu ja cia iya langun.” Ati ida orumu inyi o yen jimitan li ngohi Lahitok inyi. ²¹ To nyia i niefu cio kulo Pelestina inyi ko wolohosunoti konyieha kunenge ko ki yaroti inyi iya Gaza. Ko torati inyi to nyororo kulo mwala o fihi ara kariani lo ngamang to mabus. ²² Ati i ciak fofi kulo kue nenge litan ari la ngun lo gitari. ²³ To inyia o tubuno kalanyunok kulo Pelestina ki fotohino kiciorita na hitok diho lobanga neicieng Dagon ko daha karama lo jimitan, “Lohi co lobanga niyang meroni niyang Samson kac kuniyang.” ²⁴ Ka lo deu cio kulo Pelestina inyi, o maji lobanga neicieng o joo, “Li fotohi lobanga niyang meroni niyang kac kuniyang, tungani lafa li pale kof niyang manyu i fad cio kuniyang beciek. ²⁵ Langun lo rumaha icieng lo kweri taulo i gorori o joo, “Ito lahu Samson o lotu kiti kwera taulo kuniyang.” Tona i lolongu icieng Samson to mabus, o lotu inyi i songa ketemoni neicieng. Ka li iti woitahini inyi kiji lo wiri, ²⁶ o joo Samson diho karwaani na lo rihita inyi to kana, “Ki fik nan faji na nga tirore nan wiri kuna li iti woita ene kaji o jir nan a ganga diho icieng.” ²⁷ To inyia orumu na kaji lo lobanga neicieng i fut cio noo rei ko ngorwo manyu orumu ko kalunyunok kulo Pelestina fad o ngoni ijia, manyu kai lo kaji orumu o ngoni cio alifi uni rei ko ngorwo o deyati Samson i songa. ²⁸ To inyia i lifa Samson diho Lahitok o joo, “Lahitok na li lanyu fad, ki yiu nan. Hoto Lobanga ki iti gol nan ari kakeny lobito keken, manyu ki co nan to boho lobito a lenu cio kulo Pelestina to konyieha kunei.” ²⁹ Oto Samson ko ki niefa wiri kulo kiji are kuna li iti woita nak aji, oto ko ki niefa lobito to kana iteten lobito to kana ikajong. ³⁰ I gore Samson o joo, “I ngohi a wei nan ko cio kulo Pelestina! Oto ko cula wiri to golun nenge fad, kaji ko urohino iyo kalanyunok kulo Pelestina ko cio pili kuna lorumu o tuba ijia. Tona i fade inyi merok beciek to far lo wei nenge i lany kuna li fade inyi to faritin kulo warun nenge. ³¹ To inyia o fwo recera kunenge ko cio kulo kaji lo apa nenge fad ki yamaru inyi. O fwo icieng i yauno inyi o fwonu o nuhahini kiji lo Zera ko Estaol iyo kwecere lo apa nenge Manoa. Orumu inyi lo lanyu Israel to karihin keek are.