¹ To kifwongi langun lo dengoti geme, i yaru Samson kine na lo ngarihi o loo waja ngorwani nenge. O joo inyi, “A loro nan kaji lo ngorwani nei.” Ati ida komoni lenge i ruk inyi rutoro kaji lo ngorwani nenge. ² O joo komoni nenge diho inyi, “Orumu nan a yen otoc jimitan i beru isi inyi li co nan a co inyi diho katilihitani nino. Ida kanece nenge na sidi o dwaru i lany? To yem inyi ara faji nenge.” ³ O joo Samson diho icieng, “To kuno faritin a ngon nan ko fire lo ilen diho cio kulo Pelestina, a riafu cia nan icieng otoc.” ⁴ Oto inyi ko loro mwang i niefu lobeyohi mia uni, o tor kaliciha kuneicieng to are to are ko torahino rauno iyo itubiti kulo kaliciha. ⁵ o curahi kima iyo rauno ko lahahino lobeyohi katua lo lomanikor lo manatak kulo cio kulo Pelestina ko curaru manatak kuna lo tohoro o towi ko vinorehin ko oliforehin. ⁶ O joo cio kulo Pelestina i tifia o joo, “Ngai li tiyi ene tohi?” O rihohini icieng o joo, “Samson komoni lo Timnani tona li cwarahinorehin ngorwani nenge diho katilihitani nenge.” Oto cio kulo Pelestina ko fworo curaru na ngorwani ko apa nenge i fadari. ⁷ O rihohi Samson o joo, “Tona li tiyore ite ji, ida dong cia nan ati cung many a lenu nan tohi na li tiyi ite.” ⁸ I burahino inyi icieng many i fade cio beciek, ko loro manya kunom na lo ngon lociolong lo Etam. ⁹ O fwo cio kulo Pelestina o gurohi kem Juda i pudari oleng na lo nyiha ko Lehi. ¹⁰ I tifi cio kulo Juda icieng o joo, “Nyio i fwonunore ite ki iti remo ohoi?” I nyiahahi cio kulo Pelestina icieng o joo, “Ki fwonu ohoi ki niefaru Samson ara mabusoni, li ki tiyo ken nenge tohi na li tiyi inyi diho ohoi.” ¹¹ Oto cio kulo Juda alifi uni o fwo kunom lo locolong to Etam o joo diho Samson, “Ida isi i yen jimitan ara cio kulo Pelestina kalanyunok kuniyang? Nyio i tiyi isi diho ohoi?” I nyiahahi inyi icieng o joo, “A tiyi ja nan diho icieng tohi na li tiyi icieng diho nan.” ¹² O joo icieng diho inyi, “Ki fwonu bo ohoi toraru isi, ki fwo ki ciorihi kac kulo cio kulo Pelestina.” O joo Samson diho icieng, “I butiata re diho nan jimitan ida cia ite to kenite kuningi ki fade nan.” ¹³ O joo icieng, “Ki ruk ohoi, ki toraru ja ohoi isi ki fwo ki fotohi diho icieng. Ida ciao hoi ki fade isi.” Oto icieng ko tora inyi to unohin ngejuho are ko ki yaru inyi many locolong. ¹⁴ Ojo lo goruno inyi Lehi, o fwonu cio kulo Pelestina diho inyi i gorunoti. O lotu Okorif lo Lahitok to golun ken nenge. O ri unoho kuna lo torarehin inyi iya kofi inofi kuna i towi lo cur kima, ko ruruoro to kac kunenge. ¹⁵ I numu koite lo makal lo sigiriati ngejuk ko ki fadarore cio alif lobito. ¹⁶ Oto Samson o joo, “To koite lo makal lo sigiriati, la iti rak nan icieng ara sigiria. To koite lo makal lo sigiriati, la fade nan cio alif lobito.” ¹⁷ Ka lo keru inyi tenya ji, ko ki biroro koite lo makal, manyu iti barahini na faji o joo Ramas Lehi. ¹⁸ Tonyio o ur afa kure inyi noo, i cira inyi diho Lahitok o joo, “Li co isi karwaani nino ene lanyuno hitok, o jir dong kure ki fade nan a urohino kac lo kuno lida i liraru?” ¹⁹ Oto Lobanga ko ngaja ipulak Lehi na lo fwonu kifi to katua nenge. Ka lo mat Samson kuna kifi, o yitu golun nenge manyu ikwaru ken nenge. Tona i lolongi na ipulak lo kifi o joo En Hakore, na lo rihe o ngon ijia Lehi. ²⁰ O lanyu Samson kof lo Israel to karihin keek are to karihin kulo cio kulo Pelestina.