¹ O loo Samson iya Timna ko loro deuno lobo ngorwani Pelestinani. ² Ka lo yitu inyi o lotu o rihohi apa nenge ko iyang nenge o joo, " A deu nan lobo ngorwani Pelestinani to Timna, jijia i fwo i yaunoti inyi diho nan ara ngorwani." ³ I nyiahahi apa nenge ko iyang nenge inyi o joo, "O ru lobo karioni i jir to kiji lo cio kuniyang fad? O cam diho isi to loro rumuno ngorwani to kiji lo cio kulo Pelestina kuna lida i liraru?" Ati o joo Samson diho apa nenge, "Ki iti yemahi nan inyi. Inyi lo tumohino to nan." ⁴ (Ida orumu katomonok kunenge o yen jimitan ara Lahitok li susua inyi o jir a lanyunore cio kulo Pelestina tonyio orumu ara icieng lo lanyu cio kulo Israel to kula faritin.) ⁵ O loo Samson iya Timna i lihari ko apa nenge ko iyang nenge. Langun lo nyiharu icieng vinorehin kulo Timna, to inyia o ngwauno ngatuny o lotuno iya ken nenge. ⁶ O lotu Okorif lo Lahitok to na i gol, inyi ko cira na ngatuny to kac iya na ngo cirare kilelo. Ati ida inyi o rihohi kode apa nenge kode iyang nenge tohi na li tiyi inyi. ⁷ Oto inyi ko loro tenya ko na ngorwani, manyu i maru inyi. ⁸ Kude faritin to kifwongi langun lo loro inyi yema na ngorwani, o gere inyi loro deya lafa ngatuny li fade inyi. O loo o rumahi lohinehine i futahi ijia o fik ko otoro, ⁹ ko wosuno na otoro o tek to kana o dadaharu lokaikai. Ka li iti horu inyi katomonok kunenge, i co icieng o nyia manyu icieng. Ati ida inyi o rihohi icieng jimitan a wosu inyi na otoro to katua lo ngatuny na i wei. ¹⁰ To inyia o loo apa nenge deya na ngorwani. To inyia i kukumahi Samson karama iya na lo mohunore to kilahaji. ¹¹ Ka lo deu kunu cio inyi, o nyumuni kilahaji keek uni kuna lo jir i lihita ko inyi. ¹² O joo Samson diho icieng, “I ngohi ahi rihohi nan ite ipatit. Ka lohi tulohi ite nan fotiri nenge to kuno faritin mietare kulo karama, ahi co cia nan ite kyelani iribi kuna i joroha keek uni ko itubiti kulo kyelani keek uni. ¹³ Ka lida ite ki tulohi nan fotiri nenge, ite ki co nan kyelani iribi kuna i joroha keek uni ko itubiti kulo kyelani keek uni.” O joo icieng, “Ki rihohi ohoi na ipatit nino, i ngohi ki ning.” ¹⁴ I nyiahahi inyi o joo, “To katua lo kadahani o lotu daha; To katua lo kagoloni o lotu tohi na i il.” To faritin uni, ida icieng i nyiahahi fotiri lo na ipatit. ¹⁵ To far lo ongon o joo icieng diho ngorwani lo Samson, “Iti songa retoni nino i ngohi ki tulohi ohoi fotiri lo na ipatit, ka lo ru ki cure ohoi isi ko cio kulo kolo apa nino. Ki lolongu ite ohoi ene lo kokolaru sangite kuniyang?” ¹⁶ Oto ngorwani lo Samson o loo i birohi ken ken lo retoni nenge i cira, o joo, “Ki beru isi nan! Ida isi ki maru nan dede. I rihohi isi cio kunei ipatit ati ida ki tulohi nan ilahit nenge.” I nyiahahi inyi o joo, “Ida nan a titimahi kileng apa nei kode iyang nei, tona ngahi titimahi nan isi to nyio?” ¹⁷ I cira inyi to faritin mietare kulo karama fad. Dong to far lo mietare oto ko rihohino inyi to na li fudahinore ngorwani nenge inyi. Na ngorwani ko loro rihohino cio kunenge. ¹⁸ O rihe kolong ida lo doi to far lo mietare, o joo cio kulo na kang diho inyi, “Nyio lo il i lany otoro? Nyio lo gol i lany ngatuny?” O joo Samson diho icieng, “Ngara ida ite i remore kace botor nei, ngida ite i lak ipatit nei.” ¹⁹ To inyia o lotu Okorif lo Lahitok to golun ken nenge. O loo inyi iya Askelon ko ki fadaru cio keek uni, o pucu kyelani ko sangite kuneicieng fad o lotu i co kalahak kulo ipatit nenge. To kilongo na hitok noo o yite inyi kolo apa nenge. ²⁰ Oto ko ki cwarati ngorwani lo Samson diho lobito to kiji lo katilihitak kunenge na lorumu o rica inyi to far lo karama.