¹ Ari o fwonu cio kulo Israel i tiyi tohi na i rohoi to ketemoni lo Lahitok, tona i co Lahitok icieng iyo kac kulo cio kulo Pelestina to karihin keek ongon. ² Oto lobo tungani lo kaji lo Zera lo bara Manoa lo agwala lo imanit lo Dan orumu o ngon ko ngorwani na lo ru kito na lida o tomon. ³ O boto Malaika lo Lahitok diho na ngorwani ko jimitan diho inyi, "Ikorif isi o ru kito ati i fonga cia isi i tomonu kito retoni. ⁴ Jijia ke mat vino kode lobo mere, manyu ke nyia lobo daha lida o nyu. ⁵ I fonga cia isi manyu i tomonu kito retoni na lo jir ida kidyeli o tir kue tonyio ara cia na kito Naziritani na li fotohini diho Lobanga many to kocehe. Inyi mute li temita iyo lwahuno cio kulo Israel to kac kulo cio kulo Pelestina." ⁶ Oto na ngorwani ko loro rihohino retoni nenge o joo, "O lotu lobo tungani lo Lobanga diho nan, o ri inyi mejo malaika lo Lobanga, iti rima noo. Ida nan a tifi inyi faji na lo lotunore manyu ida inyi ki rihohi nan karana nenge. ⁷ Ati o joo inyi diho nan, "I fonga cia isi manyu i tomonu kito retoni. Jijia dong ke mat vino kode lobo mere manyu ke nyia lobo daha lida o nyu, tonyio ara cia na kito Naziritani lo Lobanga many to kocehe many far lo wei nenge." ⁸ To inyia Manoa ko ki lifa diho Lahitok o joo, "To lau karwaani nino Lahitok. A lelia nan jimitan o jir na tungani lo Lobanga li culu isi diho ohoi o yitu ari lo ki iti yena ohoi koditi na ngohi iti bolunore ohoi ene kito cia lohi tomonuno." ⁹ O ning Lobanga kilifa lo Manoa manyu o lotu Malaika lo Lobanga ari iyo na ngorwani na lo ngonore inyi mana; ati ida o rumu inyi o ngon ko retoni nenge Manoa. ¹⁰ O ruharu na ngorwani loro rihohino retoni nenge o joo, "Langole tungani lo lotu diho nan, ene lo ngon ene!" ¹¹ O woju Manoa i jifaru ngorwani nenge. Ka lo lotu inyi diho la tungani, i tifi inyi o joo, "Isi langole tungani li tenya ko ngorwani nei?" O joo inyi, "Nan ene." ¹² Oto Manoa i tifi inyi o joo, "Ka li iti futahino tenya nino, nyio cik na lo jir o lanyu warun lo na kito ko tic nenge?" ¹³ I nyiahahi Malaika lo Lahitok o joo, "O jir ngorwani nino i tiyi sangite fad kuna la teny nan diho inyi. ¹⁴ Ke co inyi o nyia lobo tohi lo lotu to vinore kode o mat vino kode lobo mere kode o nyia lobo tohi lida o nyu. O jir inyi i tiyi sangite fad kuna la cik Nan diho inyi." ¹⁵ O joo Manoa diho Malaika lo Lahitok, "Ki wak ohoi isi i tila, ki yarahi isi kine na lo ngarihi diho isi, i nyia." ¹⁶ O joo Malaika lo Lahitok diho icieng, "Kileng ngohi tihohi ite nan ene, ngida nan a nyia lobo daha ningi. Ati ka li kukum ite kiciorita locurat, i fotohi diho Lahitok (Orumu Manoa ida o yen o joo ara inyi Malaika lo Lahitok.) ¹⁷ Oto Manoa i tifi Malaika lo Lahitok o joo, "Ngai karana nino? O jir mute ohoi ki rimare isi ka lo lotu ene tenya nino ara dede?" ¹⁸ I nyiahahi inyi inyi o joo, "Nyio i tifiare isi karana nei? O gal na kiniang." ¹⁹ Oto Manoa ko dumuno kine na lo rihe o ngarihi ko kiciorita kuna lara ngamang i fotohi kai lo moru diho Lahitok. Oto Lahitok i tiyi tohi na li iti rima, o deya Manoa ko ngorwani nenge: ²⁰ Ka lo nok kima to ciali iya kai, Malaika lo Lahitok ko ki firioro i lihe ko kima. Ka lo deu oho Manoa ko ngorwani nenge ji ko urohinoti kof lorubuhe. ²¹ Ka lida Malaika lo Lahitok o rihe i totoru ken ari diho Manoa ko ngorwani nenge, o lotu Manoa o yen jimitan ara Malaika lo Lahitok lohi tenya ko icieng. ²² O joo Manoa diho ngorwani nenge, "Lohi wei ohoi! Lohi deu ohoi Lobanga." ²³ Ati i nyiahahi ngorwani nenge o joo, "Ngara ki wak Lahitok ki fadaru ohoi ngida i fotu kiciorita locurat ko kiciorita na lara ngamang to kac kuniyang kode ngida ki iti totorohi ohoi kuno sangite, ngida kileng ki rihohi ohoi kuno tenyitenyi. ²⁴ O tomonu na ngorwani kito retoni iti barahi o joo Samson. O bolo inyi manyu i gatahi Lahitok inyi gum, ²⁵ manyu i ciak Okorif lo Lahitok ki susua inyi to na lo ngonore inyi Mahane Dan na lo ngon kiji lo Zora ko Estaol.