1 I lolongu karemok kulo imanit lo Epraim kenite ko rangaroti Zapon. O joo icieng diho Jepsa, "Nyio i loo isi rem ko cio kulo Amon ida ki lolong ohoi ki fwo ko isi? Ki curahi ohoi isi katua lo kaji nino." 2 I nyiahahi Jepsa o joo, "A ngon ngole afa nan ko cio kunei ko ki didiha na hitok ko cio kulo Amon, manyu kileng la lolongo nan ida ite i fwonu i lwahu nan to kac kuneicieng. 3 Lafar ka la deu nan jimitan ida ite i fwonu lwaha, a fik nan warun nei kac kunei a range loro remun ko cio kulo Amon manyu ki co Lahitok nan a lanyu icieng. Jijia, nyio i fwonuno ite ki iti remo nan?" 4 Jepsa ko ki lolonguno cio kulo Gilead ko remun ko cio kulo imanit lo Epraim. I fad cio kulo Gilead icieng tonyio o joo orumu icieng, "Ira ite cio kulo Gilead kasilarok to kiji lo cio kulo Epraim ko Manase." 5 I temohino cio kulo Gilead iyo ladoketi kulo Jordan kuna lo rangaritarehin iya Epraim na ka lo lotu lobo kafurani lo cio kulo Epraim o joo, "Ki ngohiti a rang." I tifi cio kulo Gilead inyi o joo, "Ira isi Epraimani?" Ka li nyiahahi inyi o joo, "Ida." 6 O joo icieng, "O jir, to i joo, "Shiboleth". Ka lo joo inyi, "Siboleth" tonyio i ngatomo inyi, i niefuni inyi i fadahini ladoket lo Jordan. I fadari cio kulo Epraim alifi keek ongon ko are to kula faritin. 7 O lanyu Jepsa Israel to karihin ile. Oto Jepsa Gileadani ko weyaru, o jir inyi lobo kang to Gilead. 8 To kifwongi nenge o lanyu Ibzan lo Betelehem Israel. 9 O ngon afa inyi ko tee kilahaji keek uni ko tee kariok keek uni. Iti yeme inyi tee kariok kunenge oleng iyo imaniti kude ake manyu to tee kilahaji kunenge i yauno inyi kariok keek uni to imaniti kude ake. O lanyu Ibzan Israel to karihin mietare. 10 To inyia o wei Ibzan o nuhahini Betelehem. 11 To kifwongi nenge o lotu Elon Zebulunoni o lanyu Israel to karihin tomon. 12 To inyia o wei Elon o nuhahini kang lo Aijalon to kof lo Zebulun. 13 To kifwongi nenge o lotu Abdon kito lo Hilel, to Pirason o lanyu Israel. 14 O ngon afa inyi ko tee rei keek ongon ko lotataha keek uni kuna lo lot to sigiriahin keek mietare. O lanyu inyi Israel to karihin mietauni. 15 To inyia o wei Abdon kito lo Hilel, o nuhahini Kirason to kof lo Epraim iyo kof lo donge lo cio kulo Amalek.